Danieli 7 - ÎVUKU RÎA ÛVORO MWARO

Danieli nîwonire nyamû inya kîonekirî gîake

¹ Mwaka wa mbere Belishazaru arî Mûthamaki wa Babuloni, Danieli arî toro nîwarotire na akîona kîoneki. Nîwacokire akîandîka kîroto kîu gîake.

² Aandîkire atîrî, “Ûtukû nîmonire kîoneki Kîam ngûngi inya ikîvurutana îgûrû rîa îria rîrîa rînene na ikîriunjuga.

³ Nyamû inya cia mîthemba ngûrani nîciaumîrire îriarî.

⁴ Ya mbere yekariî ta mûnyambû, na yarî na mathagu maîrî mekariî ta ma nderi. Wa ndoretie, mathagu mayo nî maagûkire na îgîûkîrua îkîrûngama ta mûndû; na îgîcoka îgîkîrwa meciria ta ma mûndû.

⁵ “Nayo nyamû ya kaîrî yekariî ta Kîamthi nîyaumîrire na îkîrûgama na magûrû mayo ma vuva. Nyamû îo yanyitîte mbaru ithatû na magego. Nayo nîyerirwe atîrî, ‘Rîa nyama nyîngî wata ûrîa ûkavota.’

⁶ “Na wandoretie, nînoonire nyamû îngî. Nayo yekariî ta gîtang'a na yarî na mathagu mana mekariî ta ma gîconi mûrukuthurî wayo. Nyamû îo yarî na ciongo inya, na nîyaverwe wathani îgûrû rîa icio ciîngî.

⁷ “Na wandoretie, nyamû ya kana nîyaumîrire. Nayo yarî ya kûmakania na ya magegania, nîûndû wa ûrîa yanenevete. Yarî na magego manene mûno ma cuuma. Nîyatamburûrangire nyamû icio ciîngî inuku, îgîcoka îgîikinyanga na magûrû mayo. Nyamû îo yarî ngûrani na nyamû icio ciîngî cionthe irîa noonete mbere yayo, nîûndû yarî na mvîa îkûmi.

⁸ Na vîndî îrîa naaroretie mvîa cia nyamû îo, nînoonire karûvîa kanini keyumîria gatagatî ka mvîa icio ciîngî, na gagîkûûra mvîa icio ciîngî ithatû. Karûvîa kau kaarî na metho ta ma mûndû, na kanyua kaaragia na mwîtîîo.

Îtuîro rîa Ngai

⁹ “Ndoretie wa ûguo, nînoonire itî cia ûthamaki ikigwa vandû va cio. Nake ûrîa wîthîrîtwe atûûrîte tene na tene nîwekarîre gîtî kîmwe. Nguo ciake ciacerûvîte ta îra, nacio njuîrî ciake cia kîongo ciacerûvîte ta guoya wa ng'ondu. Gîtî gîake Kîam ûthamaki Kîamrî na nthugû ciavenagia ta nînîmbî cia mwaki.

¹⁰ Mwaki waumaga gîtîrî kîu ta rûnjî. Andû ngiri makûmi meengî nîmaarûngamire mbere yake, îgooti nîrîambîrîrie, na mavuku makîguûrua.

¹¹ “Wa ndoretie ûguo, nwa negucaga ciugo cia mwîtîîo irîa ciaumaga rûvîarî rûu; na ndoretie wa ûguo, nînoonire nyamû îo ya kana îkîûragwa, na mwîrî wayo ûgîcûkangua na ûgikua mwakirî ûvîe.

¹² Nyamû icio ciîngî nîciacunirwe itî ciacio cia ûthamaki nwatî nîcietîkîrirue ithiî na mbere gûtûûra gwa kavinda kanini.

¹³ “Ûtukû vîndî îrîa naarî na kîoneki kîu, nînoonire mûndû wekariî ta mûriû wa mûndû aûkîte arî matuurî îgûrû, na akîthiî kûrî ûrîa wîthîrîtwe atûûrîte tene na tene, na akîviravirwa vakuvî nake.

¹⁴ Nake nîwaverwe wathani, riiri, wana ûthamaki, nîguo andû a iruka cionthe, mavûrûri monthe, na nthiomi cionthe mamûtungatagîre. Wathani ndûkaathira rî kana rî, na ndûgaacûkangua.

Cioneki ciîgiî nyamû inya nîciataûrirwe

¹⁵ “Rîrîa nie Danieli noonire cioneki icio, nînavavûkire na ngîthînîka mûno ngororî.

¹⁶ Nînathiîre kûrî ûmwe wa arîa maarûngamîta vau na ngîmûthaitha anyumbûrîre ûma wîgiî maûndû mau monthe. Kwoguo nîwandaûrîre maûndû mau na akîmbîra atîrî,

¹⁷ ‘Nyamû icio inya nene ûguo, nî athamaki ana arîa makeyumîria gûkû nthî.

¹⁸ Nwatî andû a Ngai Ûrîa Ûrî Îgûrû mûno nîmakaavewa ûthamaki, na ûtûûre ûrî wao tene na tene.’

¹⁹ “Nînaacokire ngîenda kûmenya nama ûvoro wîgiî nyamû ya kana, îo yarî ngûrani na nyamû icio ciîngî cionthe. Nyamû îo yarî mbaganu mûno, na nîyatamburûrangire nyamû icio ciîngî inuku na magego mayo ma cuuma na ngûnyû ciayo cia gîcango, na îgîkinyanga matigari ma cio na makinyo mayo.

²⁰ Nînendire kûmenya ûvoro wa mvîa îkûmi irîa ciarî kîongorî Kîamyo na ûvoro wa rûvîa rûrîa rwîngî rwacokire kûmera na rûgîtûma mvîa icio ciîngî ithatû igûûke. Rûvîa rûu rwarî na metho na rwaragia na mwîtîîo, na nîruo rwonekaga rûrî rûnene gûkîra mvîa icio ciîngî.

²¹ Wa ndoretie, rûvîa rûu nîrwarûire na andû a Ngai, na rûkîmavoota.

²² Nake ûrîa ûtûûrîte tene na tene, nîwatuîrîre andû a Ûrîa Ûrî Îgûrû Mûno, na kavinda nîgaakinyire rîrîa andû a Ngai maamûkîre Ûthamaki.

²³ “Nînaumbûrîrwe ngîrwa atîrî, ‘Nyamû ya kana nî ûthamaki wa kana ûrîa ûkaaumîra gûkû nthî. Ûthamaki ûcio ûkethîrwa ûrî na ngûrani na mothamaki mau mengî monthe. Ûthamaki ûyû nîûgaatambururanga nthî yonthe na ûmîkinyange na ûmîcûkangie yonthe.

²⁴ Nacio mvîa icio îkûmi, nî athamaki îkûmi arîa makaathana ûthamakirî ûcio. Mûthamaki wîngî nîagaacoka eyumîrie. Akethîrwa arî ngûrani mûno na athamaki arîa a mbere, na nîakaavoota athamaki athatû gatagatî ka acio îkûmi.

²⁵ Ke nîakaaria maûndû macûku megiî Ngai Ûrîa Mûnene na avinyîrîrie andû a Ngai. Nîakaagarûra mawatho mao na irugo ciao, na andû acio nîmakaathwa nîke îvinda rîa mîaka îthatû na nuthu.

²⁶ Nîagaacoka acirithue kûu îgûrû, na vuva wa ûguo acoke acunwe wathani wake, na acûkangue athirue viû.

²⁷ Naguo ûthamaki na wathani, na ûnene wa mothamaki monthe ma nthî ûkavewa andû a Ngai Ûrîa mûnene, na ûthamaki wao ndûkaathira, na athamaki onthe a nthî nîmakaamathîkîra na mamatungatagîre.’

²⁸ “Ûcio nîguo mûthiia wa maûndû marîa nonire. Nie Danieli, nînathînîkire mûno ngororî na ngîtukia kîthithi, nwatî nînaigire maûndû mau monthe ngororî yakwa.”