Danieli 6 - ÎVUKU RÎA ÛVORO MWARO

Danieli arî îrimarî rîa mînyambû

¹ Dario nîwonire wagîrîru wa kûthuura anene îgana rîmwe rîa mîrongo îîrî a thirikari nîguo marûngamagîrîre kûrîa kuonthe aathanaga.

² Nîwacokire akîthuura Danieli na andû engî aîrî aûgî nîguo marûngamagîrîre anene acio a thirikari; nîguo mûthamaki ndakagîe na athaara.

³ Wîra wa Danieli nîwonekire ûrî mwaro mûno gûkîra wa arûngamîrîri na anene acio engî onthe, nîûndû ethagîrwa arî na ngoro mbaro. Kwoguo mûthamaki nîwamûtwire mûrûngamîrîri wa vûrûri wonthe.

⁴ Nao arûngamîrîri acio engî na anene a thirikari nîmambîrîrie gûcaria ûndû mangîcuka Danieli naguo wîgiî wîra wake wa kûrûngamîrîra vûrûri. Nwatî mationa ûndû mangîmûcuka naguo, kana îvîtia wana rîmwe nîûndû Danieli aarî mûndû mwîvokeku na gûtirî îvîtia kana ûndû mûcûku ekîte.

⁵ Nao nîmeeranire atîrî, “Tîtwona ûndû tûngîcuka Danieli naguo tiga nwa ûndû ûcio wîthîrîtwe wîgiî Ngai wake.”

⁶ Kwoguo arûngamîrîri na anene a thirikari nîmaagîre ndundu na makîthiî kûrî mûthamaki na makîmwîra atîrî, “Mûthamaki Dario, ûrotûûra tene na tene!

⁷ Tue atongoria onthe a vûrûri: arûngamîrîri onthe, anene onthe, athuuri onthe arîa magûtaaraga na anene onthe icunjî cia thirikari twona atî we Mûthamaki nîwagîrîrwe nî kûruta watho na wone atî watho ûcio nîwarûmîrîrwa nî andû onthe. Athana atî îvinda rîa mîthenya mîrongo îthatû, gûtirî mûndû ûgetîkîrua kûvoya ngai îngî kana mûndû wîngî tiga we mûthamaki; na mûndû ûrîa ûkaauna watho ûyû nîagaaikua îrimarî rîa mînyambû.

⁸ Rîu mwathi wetû mûthamaki ruta watho na wandîkwe na ûwîkîre kîrore, nîguo ndûkagarûrwe. Watho ûyû ûkaarûmagîrîrwa nî andû a Mede na a Perisi, na ndûkaagarûrwa.”

⁹ Kwoguo mûthamaki Dario nîwekîrire watho ûcio kîrore.

¹⁰ Rîrîa Danieli amenyire atî watho nîwekîrwa kîrore nî mûthamaki, nîwathiîre nyomba gwake na agîtwa ngorovarî akîthiî kanyombarî karîa kaarî na ndirica cierekerete Jerusalemu. Wata ûrîa aamenyerete, nîwaturirie maru na akîambîrîria kûvoya na gûcokia ngatho kûrî Ngai maita mathatû wa mûthenya.

¹¹ Nao andû acio maavangîte maûndû macûku megiî Danieli, nîmaathiîre na makîthîrîria Danieli akîvoya akîthaithaga Ngai wake.

¹² Nao onthe nîmaathiîre kûrî mûthamaki na magîcuka Danieli atîrî, “Mûthamaki wetû, kinthî ndûrutire watho na wekîra kîrore, wauga atî îvinda rîa mîthenya mîrongo îthatû, mûndû ûrîa ûkaavoya ngai kana mûndû wîngî tiga we Mûthamaki wetû, nîkwa agaaikua îrimarî rîa mînyambû?” Mûthamaki nîwacokirie atîrî, “Nîguo kûrî, kûringana na watho wa Amede na Aperisia, ûrîa ûtangîgarûrwa.”

¹³ Nîmaacokire makîra mûthamaki atîrî, “Danieli, ûmwe wa andû arîa maathamîrîtue gûkû kuuma Juda, ndagûtîîaga we mûthamaki wetû, kana athîkîra watho ûrîa wavecanire na ûgîkîra kîrore. Ke avoyaga maita mathatû wa mûthenya.”

¹⁴ Rîrîa mûthamaki egwire ûguo, nîwathînîkire mûno na agîîciria ûrîa angîtethûra Danieli. Aatindire mûthenya mûgima akîgeragia ûrîa angîvonokia Danieli.

¹⁵ Nwatî nthû cia Danieli nîciacokire kûrî Mûthamaki na ikîmwîra atîrî, “Mûthamaki wetû, menya atî kûringana na mawatho ma Amede na Aperizi, gûtirî, îtua kana watho ûvecanîtwe nî Mûthamaki ûngîgarûrwa.”

¹⁶ Kwoguo mûthamaki nîwathanire Danieli ocwe na aikue îrimarî rîa mînyambû. Nîwacokire akîra Danieli atîrî, “Ngai waku ûrîa ûtungatagîra wa mûthenya arokûvonokia.”

¹⁷ Narîo îthiga nîrîaigîrîrwe mûromorî wa îrima rîu na mûthamaki akîvûra mûvûûri wake na wîngî wa atongoria ake onthe vau îthigarî nîguo gûtikagîe na mûndû ûngîvonokia Danieli.

¹⁸ Mûthamaki nîwacokire gwake mûciî, na akîraara ûtukû wonthe atoona toro, na ndaarîa kana anyua kîndû.

¹⁹ Na kîvwaî mûthamaki nîwaûkîrire na akîthiî îrimarî na îvenya.

²⁰ Rîrîa aakuvîvîrie îrima, nîwetire Danieli arî na kîeva kîngî mûno na akîmwîra atîrî, “Ûûi Danieli, ndungata ya Ngai ûrîa ûtûûra mwoyo! Ngai ûrîa ûtungatagîra wa mûthenya nîaravotire gûgûtethûra kûrî mînyambû?”

²¹ Nake Danieli nîwacokerie mûthamaki atîrî, “Mûthamaki wetû, ûrotûûra tene na tene!

²² Ngai wakwa nîatûmire mûraika avinge mînyambû tûnyua nîguo ndîkanjûkangie. Ekire ûguo nîûndû ndianamûvîtîria kana ngûvîtîria we mûthamaki wetû.”

²³ Nake mûthamaki nîwakenire mûno, na akîathana atî Danieli aguucue arutwe îrimarî rîa mînyambû. Nake nîwarutirwe kuo atarî mûtivie wanarî vandû, nîûndû nîwevokete Ngai wake.

²⁴ Mûthamaki nîwacokire akîathana atî andû acio onthe maacukîte Danieli na magîtûma aikue îrimarî rîa mînyambû, maikue îrimarî rîu vamwe na aka ao na ciana ciao. Nao onthe nîmaakîrirue vinya nî mînyambû na makiunangwa mavîndî wana mbere ya makinya gîtina Kîam îrima rîu.

²⁵ Nake mûthamaki Dario nîwandîkîîre andû a mavûrûri monthe, iruka, na andû a nthiomi cionthe arîa maatûûraga nthî yonthe akîmeera atîrî, “Mûrorathimwa!

²⁶ Nînathana nauga atî kûrîa kuonthe ûthamaki wakwa ûkinyîte, nwanginya andû onthe metigagîre na matîage Ngai wa Danieli. Nîûndû ke nî Ngai wî mwoyo na ûtûûraga tene na tene. Ûthamaki wake ndûkaathira rî kana rî na nîatûûra athanaga tene na tene.

²⁷ Nîke ûvonokagia andû na akamatethûra marî thînarî, aringaga ciama na akonania morirû, îgûrû wana gûkû nthî. Nîavonoketie Danieli kuuma ithuurî cia mînyambû.”

²⁸ Kwoguo Danieli nîwekindîrie na akîganîra vîndî ya wathani wa mûthamaki Dario na vîndî ya wathani wa mûthamaki Cairasi wa Perisi.