Danieli 5 - ÎVUKU RÎA ÛVORO MWARO

Kîrugo kîa Belishazaru

¹ Vîndî îmwe mûthamaki Belishazaru nîwagwatire anene ake ngiri ûgeni kîrugorî kînene, na makînyua ndivei vamwe.

² Wa akînyunyaga ndivei, nîwathanire avirîrwe ikombe na mbakûri cia thaavu na cia sîlûva irîa îthe Nebukadinezarû aarutîte Jerusalemu hekarûrî ya Ngai-Mûnene. Mûthamaki etirie indo icio nîguo ke, aka ake, aka ake a kwigwa manyue ndivei nacio.

³ Kwoguo indo cia thaavu na sîlûva irîa ciarutîtwe hekarûrî, nyomba ya Ngai îrîa yarî Jerusalemu nîciavirirwe, na andû onthe arîa maarî kûu kîrugorî makînyua ndivei nacio.

⁴ Maanyuire ndivei magîkumagia ngai irîa ciarûthîtwe na thaavu, sîlûva, gîcango, cuuma, mîtî na mathiga.

⁵ Na wa rîmwe njara ya mûndû nîyaumîrire, na îkîambîrîria kwandîka rûthingorî rûtenderie na thimiti rwa nyomba ya mûthamaki varîa vaarî na ûtheri mûnene. Mûthamaki nîwonire ûrîa njara yandîkaga.

⁶ Mûthamaki nîwatukirie kîthithi, akîvavûka, akinaina na akîthirwa nî vinya.

⁷ Nîwanîrîre na mûgambo mûnene akiuga aringi ciama, aragûri na andû arîa maarî na ûûgî wa njata mavirwe gwake. Rîrîa maakinyire, mûthamaki nîwamerire atîrî, “Mûndû ûrîa ûkûthoma mandîko mama, na ambîre ûrîa maugîte, nîagwîkîrwa nguo cia njambarawe, na acurue mûkathî wa thaavu ngingorî yake na ethîrwe arî wa kathatû ngathîrî ya wathani wa vûrûri.”

⁸ Nao arûme onthe arîa maataraga mûthamaki nîmaatonyire, nwatî matiavota kûthoma rûthingo kana gûtaûra mandîko mau maarî rûthingorî.

⁹ Nake mûthamaki Belishazaru nîwatukirie kîthithi mûno, nao atongoria ake nîmaamakire.

¹⁰ Nake ng'ina wa mûthamaki nîwegwire înegene rîa mûthamaki na atongoria ake na agîtonya nyomba kûrîa kwarî na kîrugo akiuga atîrî, “Mwathi wakwa, ûrotûûratûûra! Nakûthaitha ûtige kûmaka na ûtige gûtukia kîthithi.

¹¹ Gûkû vûrûrirî ûyû wathanaga kûrî na mûndû ûrî na Roho wa ngai irîa ntheru. Kuuma vîndî îrîa aguo aarî mûthamaki, mûndûmûrûme ûyû nîwonanirie wara, ûtaûku na ûûgî mwîngî ta wa ngai. Aguo, mûthamaki Nebukadinezarû nîwamûtwire mûtongoria wa aragûri, arogi, aringi ciama na andû maarî na ûûgî wa njata.

¹² Ke arî na ûvoti wa mwanya na wara mwîngî wa gûtaûra iroto, gûtaûra ndaî, na arî na ûvoti wa kûthiria mathîna. Rîîtwa rîa mûndû ûcio nî Danieli, nwatî mûthamaki aamwîtire Baliteshazaru. Mwîte na nîagûgûtaûrîra mandîko mama.”

Danieli nîwataûrire mandîko

¹³ Kwoguo Danieli nîwavirirwe kûrî mûthamaki. Nake Mûthamaki nîwamûririe atîrî, “Nîwe Danieli ûmwe wa andû arîa maathamirue kuuma Juda, na ûkîretwe gûkû nî vava mûthamaki?

¹⁴ Nîmbîguîte atî roho wa ngai irîa ntheru arî ndaarî yaku, na atî ûrî na wara, ûmenyo na ûûgî.

¹⁵ Andû arîa marî na ûûgî, arogi nîmaretirwe gûkû nîguo mathome na mandaûrîre mandîko mama menye ûrîa marauga, nwatî nîmaremirwe nî gûtaûra.

¹⁶ Nwatî nîmenyithîtue atî we nwa ûvote gûtaûra maûndû wana gûtaûra ndaî. Kwoguo, ethîrwa nîûkûvota kûthoma mandîko mama na ûmbîre ûrîa maugîte, nîûgekîrwa nguo cia ûthamaki cia rangi wa njambarawe, na wîkîrwe mûkathî wa thaavu ngingo na wîthîrwe ûrî wa kathatû ngathîrî ya ûthamaki.”

¹⁷ Danieli nîwacokerie mûthamaki Belishazaru atîrî, “Nwa wîkare na iveo ciaku mûthamaki kana ûve mûndû wîngî. Kûnarî ûguo Mûthamaki, nîngûkûthomera mandîko mama na ngûtaûrîre mo.

¹⁸ We mûthamaki, Ngai ûrîa ûrî Îgûrû Mûno nîwatwire aguo, Nebukadinezarû mûthamaki mûnene, ûrî na riiri na gîtîîo.

¹⁹ Nîûndû wa ûnene ûcio Ngai aamûveere, andû a mîvîrîga yonthe, mavûrûri monthe na andû a nthiomi cionthe, nîmaainainire mûno na makîmwîtigîra. Nebukadinezarû aarî na ûvoti wa kûûraga mûndû wa wonthe kana kûrega kûûraga mûndû ûrîa angîendire. Aarî na ûvoti wa kûnenevia mûndû ûrîa wonthe eendaga kûnenevia kana kûnyivia mûndû ûrîa wonthe eendaga kûnyivia.

²⁰ Nwatî rîrîa aambîrîrie kûgîa na rwetho, na akîûmia ngoro akîgia na mwîtîîo mwîngî, nîwacunirwe ûthamaki, na riiri wake ûkîthira.

²¹ Nîwarutirwe gatagatîrî ka andû namo meciria make nîmaagarûrûkire magîtuîka ta ma nyamû. Ke aatûûranagia na nyûmbû, aarîcaga nyaki ta ndegwa, na aararaga nja akîrivagwa nî îme, nginya rîrîa atî Ngai Ûrîa ûrî Îgûrû mûno nîke wathaga mothamaki ma andû na nîke ûthuuraga ûrîa akwenda athanage mothamakirî mau.

²² Nwatî we Belishazaru, mûvîcî wa Nebukadinezarû nîûregete wînyivia wana ethîrwa nîwaicî maûndû mama monthe.

²³ Vandû va ûguo, we nîûreganîte na Ngai-Mûnene wa îgûrû; na indo kuuma hekarûrî yake nîiretetwe kûrî we. We na atongoria aku, aka aku, na aka aku a kwiga mwacoka mwanyuîra ndivei indorî icio, na mwambîrîria gûkumia ngai irîa ciûmbîtwe na thaavu, sîlûva, gîcango, cuuma, mûtî na mathiga; irîa itangîona, ciîgua kana imenya ûndû. Nwatî we nîûregete gûtîîa Ngai ûrîa ûkûvecaga mwoyo na ûrîa ûrûmbûyagia maûndû maku monthe.

²⁴ Kîu nîkîo gîatûmire Ngai atûma njara yandîke rûthingorî.

²⁵ “Yandîkire ciugo ino; ‘MENE, MENE, TEKELI na PARESI.’

²⁶ Ciugo ino ciataûrirwe ta û: MENE; nî kuga atî Ngai nî mûtaru mîaka ya ûthamaki waku, na akaûthiria.

²⁷ TEKELI nî kuga, atî we wî mûthime na ratiri ûkoneka ûtarî mwagîrîru.

²⁸ PARESI; nî kuga atî ûthamaki waku nîmûgaanie kûrî Aamende na Aaperisi.”

²⁹ Na wa rîmwe Belishazaru nîwathanire Danieli ekîrwe nguo ya ûthamaki ya rangi wa njambarawe, na ekîrwe mûkathî wa thaavu ngingo. Nîwacokire akîanîrîra, atî Danieli nîke mûtongoria wa kathatû ngathîrî ya wathani.

³⁰ Ûtukû wa mûthenya ûcio, Belishazaru, mûthamaki wa Babuloni nîwaûragirwe,

³¹ na Dario wa kuuma vûrûri wa Mede nîwatwîkire mûthamaki arî na ûkûrû wa mîaka mîrongo îtandatû na îîrî (62).