Danieli 4 - ÎVUKU RÎA ÛVORO MWARO

Kîroto gîa kaîrî kîa Nebukadinezarû

¹ Mûthamaki Nebukadinezarû nîwatûmire ndûmîrîri îno kûrî andû a iruka cionthe, mavûrûri monthe na andû a nthiomi cionthe arîa matûûraga nthî yonthe akîmeera atîrî, “Mûrogîa na thayû!

² Nîmonete arî ûndû mwaro nîmûmenyithie ciama na morirû marîa Ngai ûrîa ûrî îgûrû ambîkîrîte.

³ Ciama ciake nî nene na morirû make marî vinya mûno. Ûthamaki wake nî wa tene na tene na nîatûûra athanaga njiarwa na njiarwa.

⁴ “Rîrîa naarî gwakwa mûciî mbîganîrîte na nîrî na gîkeno nyombarî yakwa ya ûthamaki,

⁵ nînarotire kîroto Kîammbîgwithirie guoya; na nîrî ûrîrî, nînonire cioneki ciamakirie mûno.

⁶ Kwoguo nînathanire atî, andû onthe aûgî a Babuloni maindwe varî nie nîguo mandaûrîre kîroto kîu.

⁷ Kwoguo arogi, aringi ciama, oni na andû arîa aûgî, nîmaaûkire, na ngîmeera kîroto gîakwa, nwatî matiavota kûndaûrîra.

⁸ Nwatî vîndî wa îo Danieli nîwatonyire mbere yakwa, (ûrîa na rîîtwa rîngî etagwa Baliteshazaru, rîîtwa rîa ngai yakwa. Ke aarî na roho kuuma kûrî ngai irîa ntheru) na nînaamwîrire kîroto gîakwa atîrî,

⁹ Beliteshazaru, mûnene wa aringi ciama, nie nîmbicî atî wîthagîrwa ûrî na roho kuuma kûrî ngai irîa ntheru na gûtirî nthitho ûtaicî; rîu ta ndaûrîra kîoneki kîrîa nonire na njîra ya kîroto.

¹⁰ Rîrîa naarî toro, nînoonire mbica ya mûtî mûnene ûrî gatagatî ka nthî.

¹¹ Naguo nîwathiîre ûkînenevaga nginya ûgîkinya matuurî na nîwonagwa nî andû onthe arîa maarî nthî.

¹² Mathangû ma guo maarî mathaka, na warî na matunda meengî ma kwîgana andû onthe a nthî. Nyamû cia kîthaka nîciathiîcaga mwîgunyîrî wa mûtî ûcio, iconi nîciatumaga ciomba mvûarî ciaguo na ciûmbe cionthe ciarîcaga matunda ma mûtî ûcio.

¹³ “Na wa mamîte ûrîrî, nînonire mbica ya mûrangîri, mûndû mûtheru anyûrûrûkîte kuuma îgûrû.

¹⁴ Nake nîwanîrîre na mûgambo mûnene atîrî, “Tema mûtî ûcio na ûvarie nvûa ciaguo. Ûrivarive mathangû na ûnyagie matunda ma guo. Îngata nyamû cionthe irîa irî rungu rwa guo na iconi cionthe irîa itumîte ciomba mvûarî ciaguo.

¹⁵ Nwatî tiga kîthukî na mîri ya kîo itigwe na kûu nthî ciovetwe na mûcivi wa cuuma na gîcango. Mûndû ûcio nîekarage kîthakarî akîrîcaga nyaki na akîrivaga îme ta nyamû cia kîthaka.

¹⁶ Meciria make nîmagarûrûke matige gwîkara ta ma mûndû, na avewe meciria ta ma nyamû îvinda rîa mîaka mûgwanja.

¹⁷ Îtua rîîrî rîathanirwe kûvîtûkîrîra kûrî mûrangîri ûrîa mûvinyaru. Kwoguo andû onthe a nthî nîmamenye atî Ûrîa ûrî Îgûrû Mûno nîke wathaga mothamaki na andû, na nîke ûvecanaga ûthamaki kûrî mûndû ûrîa akwenda, wana ethîrwa nî mûndû ûrîa ûtarî îgweta.”

¹⁸ Gîkî nîkîo kîroto gîakwa, nie Mûthamaki Nebukadinezarû. Rîu, we Beliteshazaru, ndaûrîra kîroto gîkî, nîûndû arûme onthe arîa marî na ûûgî ûthamakirî wakwa nîmaaremirwe nî kûndaûrîra kîo, nwatî we nîûkûvota nîûndû roho wa ngai irîa ntheru arî vamwe nawe.

Danieli nîwataûrire kîroto

¹⁹ Rîrîa Danieli ûrîa wîtagwa Beliteshazaru eeguire ûguo, nîwamakire na agîtangîka mûno meciriarî make. Kwoguo mûthamaki nîwamwîrire atîrî, “Danieli, ndûkathînîke nîûndû wa kîroto, kana nîûndû wa ûrîa kiugîte.” Nwatî Beliteshazaru nîwamûcokerie atîrî, “Mwathi wakwa, kîroto gîkî na ûrîa kiugîte kîroethîrwa kîgiî arîa makûmenete na nthû ciaku.

²⁰ Mûtî ûrîa wonire ûgîkûra na ûkîracava ûgîkinya matuurî na wonagwa nî andû onthe a nthî;

²¹ na warî na mathangû mathaka na matunda meengî ma kûrîwa nî andû a nthî yonthe; na rungu rwaguo vaarî na mwîgunyî wa nyamû cia kîthaka, na iconi igatuma ciomba mvûarî ciaguo,

²² nîwe mûthamaki. Nîwe ûgîte na vinya nyîngî na ûvoti wa maûndû ma na îgûrû, na wathani waku wîcûrîte nthî yonthe.

²³ Navo varîa we Mûthamaki wonire mûrangîri ûrîa mûtheru anyûrûrûkîte kuuma îgûrû na akiuga atîrî, ‘Tema mûtî na ûûcûkangie viû, nwatî tiga kîthukî na mîri yakîo îtigwe na kûu nthî ciovetwe na mûcivi wa cuuma na gîcango. Tiga arivagwe nî îme; na atûûrage kîthakarî akîrîcaga nyaki ta nyamû cia kîthaka îvinda rîa mîaka mûgwanja.’

²⁴ “Mûthamaki wetû, kîroto gîkî kîrauga atî Ngai ûrîa wî îgûrû mûno athanîte akauga, atî maûndû marîa ûkwîthîrwa namo mwathi wakwa, we mûthamaki nî ma ma:

²⁵ We nîûkengatwa ume kûrî andû ûthiî ûgatûûranagie na nyamû cia kîthaka, na ûtuîke wa kûrîcaga nyaki ta nyamû cia kîthaka. Ûkararaga nja na ûrivagwe nî îme îvinda rîa mîaka mûgwanja, nîguo ûmenye atî Ngai ûrîa wî îgûrû mûno nîke wathaga mothamaki monthe ma nthî na avecanaga ûthamaki ûcio kûrî mûndû wa ûrîa angîenda.

²⁶ Navo varîa mûrangîri aathanire kîthukî na mîri itigwe na kûu nthî, nî kwonania atî, we nîûgaatuîka mûthamaki rîngî rîrîa ûkaamenya atî Ngai nîke wathanaga nthî yonthe.

²⁷ Kwoguo Mûthamaki wetû, nakûthaitha wîtîkîre mataaro makwa. Tiga kwîvia na gwîka maûndû ma waganu, na wambîrîrie gwîka maûndû ma ûthingu na kwîguîra andû arîa athîni ntha. Weka ûguo, wavota kwongererwa mavinda ma gûtûûra wîganîrîte.”

²⁸ Mûthamaki Nebukadinezarû nîwacemanirie na maûndû mama monthe.

²⁹ Mûthiia wa mweri wa îkûmi na îîrî, rîrîa Nebukadinezarû ethîrîtwe agîceracera îgûrû rîa nyomba yake ya ûthamaki,

³⁰ nîwaugire atîrî, “Ta roria îtûûra rîîrî rînene ûguo rîa Babuloni! Nînie nîrîtumîte nîguo monanie vinya, ûvoti riiri na wathani wakwa.”

³¹ Mbere ya mûthamaki arîkia ûrîa aaragia, mûgambo nîwaumire îgûrû ûkiuga atîrî, “Mûthamaki Nebukadinezarû, tathikîrîria ûrîa ngûkwîra! Rîu nînathengutia ûthamaki kûrî we.

³² We nîûkengatwa ume kûrî andû, ûthiî mûgatûûrage na nyamû cia kîthaka. Ûkaarîcaga nyaki ta ndegwa îvinda rîa mîaka mûgwanja. Vîndî îo nîûkaamenya, atî Ngai Ûrîa ûrî Îgûrû Mûno nîke ûrî vinya îgûrû rîa mothamaki monthe ma nthî na nîavecaga mûndû wa ûrîa akwenda ûthamaki.”

³³ Na vîndî wa îo ûndû ûcio nîwavingire kûrî Mûthamaki Nebukadinezarû. Nîwathengutirwe gatagatîrî ka andû, na akîambîrîria kûrîa nyaki ta ndegwa. Nîwagîre na îme kuuma îgûrû mwîrîrî wake wonthe. Njuîrî ciake nîciaracavire ta mbûî cia nderi, na ngûnyû ciake ikîracava ta ngûnyû cia iconi.

Nebukadinezarû nîwakumirie Ngai

³⁴ Mîaka mûgwanja yathira, nie mûthamaki Nebukadinezarû nînaroririe îgûrû kûrî Ngai na ngîcokerwa nî ûgima wa meciria na ngîambîrîria kûgooca Ngai ûrîa wî îgûrû mûno; nînaamûkumirie na ngîmûva gîtîîo na riiri, ûcio ûtûûraga tene na tene nîûndû: Nîatûûra athanaga tene na tene naguo wathani wake ûgaakinyagîra njiarwa na njiarwa.

³⁵ Andû onthe a nthî nî a mana methorî make. Nîke wathaga araika arîa marî îgûrû Vamwe na andû arîa matûûraga gûkû nthî. Gûtirî mûndû ûngîregana na wendi wake kana ûngîgîa na kîûria îgûrû rîa ciîko ciake.

³⁶ Narîkia gûcokerwa nî meciria makwa, nînagîre ngumo nene, wathani na riiri rîngî. Atongoria na athani a vûrûri wakwa nîmaaûkire kûnjaria na ngîcokua ûthamakirî wakwa rîngî, na ngîgîa vinya wa wathani wana gûkîra mbere.

³⁷ Na rîu, nie Mûthamaki Nebukadinezarû, nînîragooca, ngakumia na ngava Mûthamaki wa îgûrû riiri, nîûndû mawîra make monthe nî ma kîvooto, njîra ciake nî cia ma, na nîanyivagia arîa etîi.