Danieli 3 - ÎVUKU RÎA ÛVORO MWARO

Nebukadinezarû Nîwathire andû onthe magooce mûvuanano wa thaavu

¹ Mûthamaki Nebukadinezarû nîwarûthithirie mûvuanano wa thaavu wa mita mîrongo îîrî na mûgwanja na îgûrû na wariî wa mita ithatû. Nîwaugire wigwe Dura, kûndû kûrîa kwaraganu vûrûrirî wa Babuloni.

² Nebukadinezarû nîwathanire kûgîe na mûcemanio wa anene a thirikari, tûrani twa thirikari, arîrîria a thirikari, andû arîa mataaraga thirikari, arûngamîrîri a igîîna, acirithania, na aathani a mavûrûri make monthe mathiî mamburarî ma kwambîrîria kûgooca mûvuanano ûcio warûthithîtue nî mûthamaki.

³ Kwoguo atongoria acio onthe nîmaathiîre mamburarî mau ma kwambîrîria kûgooca mûvuanano ûcio warûthithîtue nî mûthamaki na makîrûngama mbere yaguo.

⁴ Nake mûnjaama wa mûthamaki nîwathiîre akîanagîrîra na mûgambo mûnene atîrî, “Andû a mavûrûri monthe, iruka cionthe na nthiomi cionthe!

⁵ Rîrîa mûkegua coro yavuvwa, mûcoke mwîgue mîtûrirû, ngita, wandîndî, na inanda cia mîthemba yonthe, mûkegwîthia nthî mûgooce mûvuanano wa thaavu ûrîa ûrûthithîtue nî mûthamaki Nebukadinezarû.

⁶ Mûndû wa wonthe ûtakawînamîrîra aûvoe, nîakaanyitwa wa rîmwe akînaikua mwakirî mûnene mûno.”

⁷ Kwoguo rîrîa andû onthe meegwire mîgambo ya coro, mîtûrirû, ngita, wandîndî na inanda, nîmeenamîrîre na makîgooca mûvuanano ûcio wa thaavu ûrîa warûthithîtue nî Mûthamaki Nebukadinezarû.

⁸ Vîndî wa îo andû amwe a Babuloni nîmaathiîre kûrî mûthamaki Nebukadinezarû na makîthitanga Ayahudi.

⁹ Nîmaamwîrire atîrî, “Mûthamaki! Ûrotûûra tene na tene.

¹⁰ We mûthamaki nîwathanîte atî rîrîa andû onthe makeegua mûgambo wa coro, Mîtûrirû, ngita, wandîndî na inanda, na nyîmbo mwanya mwanya, nîmakenamîrîra magooce mûvuanano ûcio wa thaavu.

¹¹ We nîwaugire atî, mûndû wa wonthe ûtakawînamîrîra aûgooce, nîagaikua mwakirî mûnene mûno.

¹² Kûrî na Ayahudi ûthuurîte a kûrûngamagîrîra vûrûri wa Babuloni; na nîo: Shadiraka, Mîsheki na Abedinego. Mûthamaki wetû, andû aya matikwathîkagîra, wana matigoocaga ngai ciaku kana menamîrîra mûvuanano wa thaavu ûrîa ûrûthithîtie.”

¹³ Vîndî wa îo, Nebukadinezarû arî na marakara meengî mûno nîwathanire Shadiraka, Mîsheki na Abendinego mavirwe kûrî ke. Nao nîmaavirirwe kûrî mûthamaki.

¹⁴ Nake nîwamerire atîrî, “Nî ûvoro wa ma atî, mue Shadiraka, Mîsheki na Abendinego, nîmûregete kûgooca ngai ciakwa na kwînamîrîra mûvuanano wa thaavu ûrîa naarûthithirie?

¹⁵ Rîu-î, rîrîa mûkegua rîngî mîgambo ya coro, mîtûrirû, ngita, wandîndî, na inanda cia mîthemba yonthe, mûkenamîrîria mothiû menyu mûgooce mûvuanano ûcio naarûthithirie wa thaavu. Ethîrwa mûtikaaûgooca, nîmûgaaikua wa rîmwe mwakirî mûnene mûno. Nî ngai îrîkû îngîmûvonokia kuuma kûrî nie?”

¹⁶ Nao Shadiraka, Mîsheki na Abendinego nîmaacokerie mûthamaki atîrî, “Mwathi wetû Nebukadinezarû, gûtirî na vata wa kwîgitîra maûndûrî mama.

¹⁷ Ethîrwa nîtûgwikua mwakirî ûcio, Ngai wetû ûrîa tûtungataga nîagûtûvonokia kuuma mwakirî ûcio mûnene ûguo, na kuuma njararî ciaku.

¹⁸ Nwatî wana arega gûtûvonokia, Mwathi wetû tue tûtikenamîrîra tûgooce ngai ciaku, kana mûvuanano ûcio wa thaavu warûthithirie.”

Arata acio athatû a Danieli nîmatuîrîrwe kûûragwa

¹⁹ Nebukadinezarû nîwatûmbirwe nî marakara na agîtunîvia metho nîûndû wa Shadiraka, Mîsheki na Abendinego. Nîwathanire mwaki wongererwe na wakane maita mûgwanja makîria ya ûrîa wakanaga.

²⁰ Nîwathire athigari ake a mbaara arîa maarî na vinya move Shadiraka, Mîsheki na Abendinego na mîkanda, na maikue mwakirî ûcio.

²¹ Kwoguo nîmaamovire marî na sati, mîvuto, ngovia na makîmaikia mwakirî ûcio.

²² Nîûndû Mûthamaki nîwathanîte mwaki wongererwe wakane mûno, nînîmbî cia mwaki nîciavîvirie athigari arîa maikirie Shadiraka Mîsheki na Abendinego mwakirî.

²³ Nwatî Shadiraka, Mîsheki na Abedinego, nîmaaikirue wa marî ove kûu mwakirî. Nao Shadiraka Mîsheki na Abendinego, nîmaagwîre kûu mwakirî ûcio mûnene marî ove na mîkanda.

²⁴ Nake Mûthamaki Nebukadinezarû nîwarûgire na îgûrû amakîte mûno na akîûria atongoria atîrî, “Na kinthî tûtiikirie arûme athatû mwakirî marî ove?” Nao nîmaacokerie Mûthamaki atîrî, “Nîma nîguo mwathi wetû.”

²⁵ Mûthamaki nîwathiîre na mbere na akiuga atîrî, “Nwatî nîrona arûme ana magîceera mwakirî matarî ove na matakûvîa nî mwaki. Mûndû wa kana ekariî ta mûraika.”

Nebukadinezarû nîwarekirie arûme acio athatû

²⁶ Kwoguo Nebukadinezarû nîwathiîre vakuvî na mûromo wa varîa mwaki ûcio warî na agîtana augîrîrîtie atîrî, “Shadiraka, Mîsheki na Abendinego, ndungata cia Ngai ûrîa Mûnene mûno, umani mûke ava!” Nao Shadiraka, Mîsheki na Abendinego nîmaumîrire mwakirî ûcio mûnene.

²⁷ Nao athani, anene, arîa marî rungu rwa anene, na atongoria arîa engî a mûthamaki nîmacemanirie kwîyonera arûme acio athatû arîa mwaki waremirwe nî kûmavîvia. Njuîrî na nguo ciao itiavutua nî mwaki, na matianunga ndogo.

²⁸ Nebukadinezarû nîwaugire atîrî, “Ngai wa Shadiraka Mîsheki na Abedinego arokumua! Ke nîatûme mûraika wake nîguo avonokie arûme aya arîa mamûtungatagîra nama mamwîvokete. Nîmaaregire kwathîkîra watho wakwa na makiuga atî, nîkava gûkua îthenya rîa kwînamîrîra nthî, nîguo mavoe ngai îngî tiga Ngai wao.

²⁹ “Kwoguo nie nathana atî mûndû wana ûrîkû kuuma iruka cionthe, mavûrûri monthe, wana andû a nthiomi cionthe arîa mangîaria ûndû wa kûmenereria Ngai wa Shadiraka, Mîsheki na Abedinego, agaatemangwa icunjî na nyomba ciao ciomomorangwe; nîûndû gûtirî ngai îngî îngîvota kûvonokania ûguo.”

³⁰ Mûthamaki Nebukadinezarû nîwacokire akîva Shadiraka, Mîsheki na Abendinego wîra mûnene kûu vûrûrirî wa Babuloni.