Danieli 2 - ÎVUKU RÎA ÛVORO MWARO

¹ Mwaka wa kaîrî wa Nebukadinezarû arî mûthamaki, nîwagîre na kîroto. Nebukadinezarû nîwathînîkire mûno nî kîroto kîu nginya agîtura toro.

² Mûthamaki nîwathanire Akalidei onthe arîa maarî aringi ciama, ooni maûndû, aragûri, na arogi, mathiî mamûtaûrîre kîroto kîu gîake. Kwoguo nîmaatonyire kwa Mûthamaki na makîrûgama mbere yake.

³ Nake Mûthamaki nîwamerire atîrî, “Nîragîre na kîroto na nîkînthînîtie, na rîu nîrenda kûmenya ûrîa kiugîte.”

⁴ Akalidei acio nîmacokerie Mûthamaki na Kîhibirania atîrî, “Mûthamaki wetû ûrotûûratûûra! Ta twîre kîroto gîaku, na nîtûgûgûtaûrîra kîo.”

⁵ Mûthamaki nîwamerire atîrî, “Nie nînduîte îtua atî nwanginya mûmbîre kîroto, na mûcoke mûndaûrîre kîo. Ethîrwa tî mûmenyithia kîroto kîu na mûndaûrîre kîo, ngatûma mûtinangue icunjî icunjî, na nyomorithie nyomba cienyu.

⁶ Nwatî ethîrwa nî mûkûmbîra kîroto kîu na mûndaûrîre kîo, nîngaamûva iveo mbaro, na nîmûve gîtîîo kînene. Rîu ta mbîrani kîroto kîu na mûndaûrîre kîo.”

⁷ Nao nîmaacokerie mûthamaki rîngî atîrî, “Mûthamaki, twîre kîroto kîu, natue ndungata ciaku nîtûgûgûtaûrîra.”

⁸ Mûthamaki nîwamagûkîre akîmeera atîrî, “Nie nînîramenya nama atî nîkwa mûrageria gûta mathaa, nîûndû nîmûramenya atî nîndîkîtie gûtua îtua,

⁹ atî ethîrwa tîmûmbîra kîroto kîu, muonthe nînîmûverithia ûndû ûmwe. Muonthe mûtuîte ûrîa mûkûmvenia mwîrîgîrîte atî wa ûrîa mathaa marathira, navota kûgarûra îtua rîakwa. Mbîrani kîroto kîu, nîguo menye kana mwavota gûgîtaûra.”

¹⁰ Nao Akalidei acio nîmaamûcokerie atîrî, “Gûtirî mûndû gûkû nthî kuonthe mûthamaki wetû, ûngîvota kûvingia maûndû marîa ûrenda. Gûtirî Mûthamaki mûnene na wî vinya, wanaûria ago, aringi mbûgû, aringi ciama na arogi kana Akalidei maûndû ta mama.

¹¹ Maûndû marîa we Mûthamaki wetû ûraûria nî maûmû mûno na gûtirî mûndû ûngîkwîra mo tiga ngai irîa itatûûranagia na andû.”

¹² Nake Mûthamaki egua ûguo nîwarakarire mûno na akîathana atî andû onthe arîa maarî aûgî kûu Babuloni maûragwe.

¹³ Kwoguo watho nîwaumire atî andû onthe aûgî maûragwe. Nao Danieli na arata ake nîmaacarirue nîguo maûragwe.

Danieli nîwavotithirue nî Ngai gûtaûra kîroto

¹⁴ Na rîrîa Arioki mûnene wa andû arîa maarangagîra kwa mûthamaki aathiîte kûûraga andû arîa aûgî a Babuloni, Danieli nîwamwarîrie ciugo irî na ûûgî na wara,

¹⁵ na akîmûria atîrî, “Nîndûî gîtûmîte mûthamaki athane gwîkwe ûndû ta ûyû mûrûrû ûguo?” Arioki nîwerire Danieli ûrîa maûndû mekariî.

¹⁶ Danieli nîwathiîre kûrî mûthamaki narua, na akîmûvoya amûve kavinda nîguo amûtaûrîre kîroto.

¹⁷ Kwoguo Danieli nîwathiîre mûciî na akîra arata ake Hanania, Mishaeli na Azaria ûrîa gwekîkîte.

¹⁸ Nîwamerire mavoe Ngai wa îgûrû nîguo ameguîre ntha na amaguûrîrie nthitho îo nîguo matikaûragwe vamwe na anake arîa engî maathûrîtwe a gûtaaraga Mûthamaki.

¹⁹ Ûtukû wa ûcio Ngai nîwaguûrîrie Danieli nthitho îo na njîra ya kîoneki. Nake nîwagoocire Ngai wa îgûrû,

²⁰ na akiuga atîrî, “Rîîtwa rîa Ngai rîrorathimwa tene na tene! Ke nî mûûgî na arî vinya.

²¹ Nîke ûcenjagia mathaa na mavinda. Nîke ûthuuraga na akagwîthia athamaki. Nîke ûvecanaga ûûgî kûrî arîa aûgî na ûtaûku kûrî arîa marî na ûmenyo.

²² Ke nîaguûragia maûndû marîa mathithe; nîaicî maûndû marîa marî ndumarî, na ke mwene nî ûtheri.

²³ We Ngai wa methe metû ma tene, nînîragûcokeria ngatho na ngagûkumia, nîûndû nîûmvete vinya na ûûgî; na rîu nîûnguûrîrîtie maûndû marîa twakwîrire na ûgatwonia ûrîa tûkwîra mûthamaki.”

Danieli nîwataûrîre mûthamaki kîroto

²⁴ Kwoguo Danieli nîwacokire kûrî Arioki ûrîa wathîtwe nî Mûthamaki athiî akaûrage anake arîa maataraga Mûthamaki. Nîwerire Arioki atîrî, “Ndûkaûrage andû acio. Mvira kûrî Mûthamaki na nî ngûmûtaûrîra kîroto gîake.”

²⁵ Wa rîmwe Arioki nîwocire Danieli na akîmûvira kûrî Mûthamaki Nebukadinezarû. Nîwerire Mûthamaki atîrî, “Nie nîmonete ûmwe wa Ayahudi arîa maatavirwe Juda ûngîvota gûgûtaûrîra kîroto gîaku.”

²⁶ Mûthamaki nîwaûririe Danieli, ûrîa na rîîtwa rîngî eetagwa Beliteshazaru atîrî, “Nwa ûvote kûmbîra kîroto gîakwa na ûndaûrîre kîo?”

²⁷ Nake Danieli nîwacokerie mûthamaki atîrî, “Mûthamaki, gûtirî mûrogi, mûringi ciama, oni kana aûgî a njata mangîkwîra maûndû mau mûthamaki aûria.

²⁸ Nwatî îgûrû, kûrî Ngai ûrîa ûguûragia maûndû marîa marî nthithorî, na nîaguûrîrîtie Mûthamaki Nebukadinezarû ûrîa gûkethîrwa gwîkariî vuvarî. Kîroto na cioneki irîa warî nacio rîrîa wamamiî nî îno:

²⁹ “Mûthamaki, rîrîa wamamiî, nîwarotire ûvoro wa maûndû marîa magekîka vuvarî, nake Ngai ûrîa ûguûragia maûndû marîa marî nthithorî, nîwakwonirie maûndû marîa magekîka.

³⁰ Naguûrîrue nthitho îno tî atî nîûndû wa ûrîa naarî mûûgî gûkîra andû arîa engî onthe, nwatî nîguo we Mûthamaki ûtaûkîrwe nî kîroto gîaku nîguo ûmenye ûrîa wîciragia.

³¹ “We Mûthamaki, nîwonire mûvuano mûnene ûrî mbere yaku. Mûvuano ûcio nîwakengaga mûno nginya ûkeguithia andû guoya.

³² Kîongo Kîam mûvuano ûcio Kîamrî Kîam thaavu ntheri; kîthûri na njara ciaguo ciarî cia sîlûva. Îvu na ciaû ciaguo ciarî cia gîcango.

³³ Mîthumo yayo yarî ya cuuma, nacio itende ciarî cia cuuma kûgûrûrî kûmwe, na kûu kwîngî yûmba.

³⁴ Vîndî îrîa waroretie mûvuano ûcio, îthiga rînene nîrîavarûkire kuuma nguvarî rîtavutîtue nî mûndû, na rîkîringa itende icio ciarî cia cuuma na yûmba ikîvaragana.

³⁵ Nayo cuuma, yûmba, gîcango, sîlûva na thaavu nîciaunîkangire tûcunjî, na igîtuîka ta mavûngo ma ngano îtîrirî vîndî ya riûa. Nîciagûrûkîrue nî rûkûngi cionthe, na gûtirî wa naarî gacunjî gaatigarire. Nwatî îthiga rîrîa rîaringire mûvuano ûcio, nîrîatuîkire kîrîma kînene na gîgîcûra nthî yonthe.

³⁶ “Kîu nîkîo Kîamrî kîroto gîaku, na rîu nîngûgûtaûrîra kîo.

³⁷ We Mûthamaki wa athamaki, Ngai wa îgûrû nîke ûgûtuîte Mûthamaki na agakûva ûvoti, vinya na riiri.

³⁸ Nîagûtuîte Mwathi wa andû onthe arîa matûûraga gûkû nthî, nyamû cia kîthaka, na iconi cia rîerarî. We nîwe kîongo kîu Kîam thaavu.

³⁹ Vuva waku, nîgûgaaûka ûthamaki wîngî ûtarî na vinya ta waku, na vuva wa ûcio, gûke ûthamaki wîngî wa kathatû. Ûthamaki ûcio wa kathatû ûkethîrwa ûrî wa gîcango, na ûkaatha nthî yonthe.

⁴⁰ Nîgûkethîrwa na ûthamaki wîngî wa kana ûrî na vinya ta cuuma. Nîûndû cuuma yunangaga na îgacûkangia indo cionthe, ûthamaki ûcio nîûkaunanga viû mothamaki mau mengî marî mbere.

⁴¹ We nîwonire atî itende na ciara; kûmwe kwarî kwa yûmba na kûu kwîngî gwa cuuma. Ûguo nîkwonania atî ûthamaki ûcio ûkethîrwa ûrî mûgaûkanu. Gîcunjî kîmwe Kîam ûthamaki gîkethîrwa na vinya ta cuuma nîûndû kûmwe kwarî gwa cuuma na kûmwe kwa yûmba.

⁴² Kwoguo, wata ûrîa ciara imwe cia magûrû ciarî cia cuuma na icio ciîngî cia yûmba, ûguo nî kwonania atî gîcunjî kîmwe Kîam ûthamaki gîkethîrwa kîrî na vinya na kîu kîngî gîtarî na vinya.

⁴³ Wata ûrîa we wonire cuuma îtukanîtue na yûmba nwa ta guo athamaki a mothamaki mau makaageria gûtukana na njîra ya kûvikania nwatî matikaavota, wata ûrîa cuuma îtatukanaga na yûmba.

⁴⁴ Îvinda rîu rîa athamaki acio, Ngai ûrîa wî îgûrû nîakaarûngamia ûthamaki ûtakaathira. Ûthamaki ûcio ndûkaavotwa, na nîûgaacûkangia mothamaki mau mengî monthe mathire viû, ûcoke ûtûûre wathanaga tene na tene.

⁴⁵ Nîwonire ûrîa îthiga rîavarûkire kuuma nguvarî rîtavutîtue nî mûndû, na ûkîona ûrîa rîaringire mûvuano ûcio wa cuuma, gîcango, yûmba, sîlûva na thaavu. Ngai ûrîa mûnene nîakûmenyithîtie we mûthamaki, maûndû marîa magekîka vuvarî. Kîrooto gîkî nî Kîam ma na ûguo nagîtaûra nî ûvoro wa ma.”

Mûthamaki nîwavere Danieli kîveo

⁴⁶ Mûthamaki Nebukadinezarû nîwaturumithirie ûthiû wake nthî na akîathana Danieli arutîrwe iveo cia irio na ûbani.

⁴⁷ Mûthamaki nîwaugire atîrî, “Nama Ngai waku nî Ngai wa ngai irîa ciîngî, na Mwathani wa athamaki onthe. Nîke ûguûragia maûndû marîa marî nthithorî, nîûndû we nîûvotete gûtaûra nthitho îno.”

⁴⁸ Mûthamaki nîwacokire agîtua Danieli mûnene na akîmûva iveo nyîngî, na akîmûtua mûndû wa kwatha vûrûri wonthe wa Babuloni wana akîmûtua mûrûngamîrîri wa andû onthe arîa maataaraga mûthamaki.

⁴⁹ Danieli nîwaûririe mûthamaki amûthuurîre Shadiraka Mîsheki na Abendinego, matuîke a kûrûngamagîrîra maûndû monthe ma vûrûri wa Babuloni. Nwatî Danieli ekarire kûu kwa mûthamaki.