Danieli 12 - ÎVUKU RÎA ÛVORO MWARO

Îvinda rîa mûthiia

¹ “Mavinda mau, Mikaeli, mûraika mûnene ûrîa ûgitagîra andû aku nî akaaumîra. Nî gûkethîrwa na mavinda ma thîna nyîngî îtanonekana kuuma rîrîa kwagîîre na vûrûri wa Isiraeli. Rîrîa kavinda kau gagaakinya mûndû wa wonthe, ûrîa rîîtwa rîake rîkethîrwa rîrî îvukuurî rîa mwoyo nîakaavonokua.

² Andû eengî arîa makethîrwa marî mbîrîrarî nî makaariûka, amwe magîe na mwoyo wa tene na tene, nao acio engî matûûre manyamarîkaga.

³ Andû arîa aûgî magaakenga ta ûtheri wa îgûrû, nao arîa mekaga ciîko cia ûthingu nî magaakenga ta njata tene na tene.

⁴ Nwatî we, Danieli, vinga îvuku na ûrîkîre rûtumo, nginya kavinda ka mûthiia wa nthî. Andû eengî nî makaavinyûra ava na vaarîa na nî makoongerera ûûgî.

⁵ “Nwatî nie, Danieli nînaroririe ngîona andû aîrî marûngamîte rûtere rwa rûnjî, ûmwe arî mwena ûmwe nake ûcio wîngî, mwena ûcio wîngî.

⁶ Nînaûririe ûcio warûngamîte mwena wa îgûrû wa rûnjî, ekîrîte nguo mbaro, kavinda karîa maûndû mama ma kûmakania magwîkara magîkaathira.

⁷ Mûndû ûcio wekarîte mwena wa îgûrû wa rûnjî ekîrîte nguo mbaro, nîwaûkîrîrie njara ciake cioîrî na îgûrû. Nînaacokire ngîgua akîîvîta na rîîtwa rîa ûrîa ûtûûraga tene na tene akiuga atî, ‘Nî kavinda ka mîaka îthatû na nuthu. Vîndî îo andû arîa atheru a Ngai nîmagaatiga kûnyamarua na nîrîo maûndû monthe makethîrwa makîvinga.’

⁸ “Nînegwire ûrîa augire, nwatî ndiataûkîrwa. Kwoguo nînaûririe atîrî, ‘Ngai-Mûnene gûkethîrwa gwîkariî atîa?’

⁹ “Nake nîwanjokerie atîrî, ‘Danieli, ûthiî rîu, nîûndû nwanginya maûndû mama methîrwe marî nthitho nginya îvinda rîa mûthiia rîkinye.

¹⁰ Andû eengî nîmakaatherua, nwatî andû arîa aganu nîmakaathiî na mbere gwîka waganu na gûtirî wanarî ûmwe gatagatîrî kao ûgaataûkîrwa. Nwatî andû arîa aûgî nîmagaataûkîrwa.

¹¹ “ ‘Kuuma vîndî îrîa matega ma kûvîvua ma wa mûthenya maarûngamirue, na ûndû ûrîa ûrî mûgiro ûgîkîka, mîthenya ngiri îmwe na magana maîrî ma mîrongo kenda (1,290) îkethîrwa îrî mîvîtûku.

¹² Gûkena nî arîa magekara marî evokeku mîthenya ngiri îmwe na magana mathatû ma mîrongo îthatû na îthano (1,335).

¹³ “ ‘Nawe Danieli, tuîka mwîvokeku nginya îvinda rîa mûthiia. We nîûgaakua, nwatî îvinda rîa mûthiia rîakinya nîûkaariûka na wamûkîre kîveo kîrîa wigîrîtwe.’ ”