Danieli 11 - ÎVUKU RÎA ÛVORO MWARO

¹ “Kuuma mwaka wa mbere wa mûthamaki Dario wa kuuma Mede mûraika Mikaeli nîke ûnyûmagîrîria na akambîkîra vinya.

² Na rîu nîngûkwîra ûvoro wa ma.” Mûraika nîwaugire atîrî, “Athamaki engî athatû nî makaatha Perisi. Nî gûgaaûka mûthamaki wa kana ûrîa ûkethîrwa arî mûtongu mûno gûkîra acio engî. Ûtonga ûcio wake nî ûkaamûvotithia kûtharîkîra ûthamaki wa Ngiriki.

Mothamaki ma Misiri na Sîria

³ “Nîgûgaacoka kuumîre mûthamaki njamba ûrîa ûkaatha vûrûri mûnene na ekage wa ûrîa akwenda.

⁴ Rîrîa akamaarîra wathanirî wake, vûrûri waku nîûgaatûkana na wîgaanie icunjî inya. Andû matarî a rûciaro rwake nîmagaatuîka athamaki vandûrî vake, nwatî matikethîrwa marî na ûvoti take.

⁵ “Mûthamaki wa mwena wa îveti akethîrwa arî na vinya, nwatî ûmwe wa atongoria ake a mbaara nîakethîrwa arî na vinya na athage vûrûri mûnene makîria.

⁶ Vuva wa mîaka îtarî mîngî, mûthamaki wa Misiri nî makaanyitanîra na mûthamaki wa Sîria na mwarî wa mûthamaki wa Misiri avikue nî mûthamaki wa Sîria nîguo magîe na thayû. Nwatî ngwatanîro îo ndîgaatûûra. Mwarî ûcio, rûciaro rwake, ndungata ciake, vamwe na mûthamaki ûcio ûkaamûvikia nîmakaathirua.

⁷ Vuva wa kavinda kanini mûndû ûmwe kuuma mûvîrîgarî wa mwîrîtu ûcio nî agaatuîka mûthamaki, na nî akaatharîkîra athigari a mbaara a mûthamaki wa Sîria na atonye nginya kûrîa kwirigîre na amavoote.

⁸ Wana nî agaakuua ngai ciao cia mîvuanano athiî nacio Misiri wa vamwe na indo cia thaavu na cia sîlûva irîa itegeretwe ngai icio. Gûkethîrwa kûrî na thayû mîaka mîîngî.

⁹ Mûthamaki wa Sîria nî akaathithûkîra Misiri, nwatî nîagaacokithua na vinya.

¹⁰ “Anake a mûthamaki wa Sîria nîmakevarîria mbaara na magomanie vamwe athigari eengî mûno a mbaara. Athigari acio nî makaathiî na matharîkîre kûrîa kîgitîre kwa nthû ciao.

¹¹ Nake mûthamaki wa Misiri ecûrîtwe nî marakara, nîagaaûka na atharîkîre mûthamaki wa Sîria, ûrîa ûkethîrwa arî na gîkundi kînene Kîam mbaara, nwatî nîagaakîvoota.

¹² Nîagaakena mûno arîkia kûvoota gîkundi kîu Kîam athigari a Sîria, nwatî ndagaatûûra avootanaga.

¹³ “Mûthamaki wa Sîria nî agaacoka avarîrîrie gîkundi kînene Kîam athigari gûkîra kîrîa Kîam mbere. Nwatî vuva wa mîaka mîîngî, nî agaacoka arî na athigari marî na indo nyîngî cia mbaara.

¹⁴ Andû eengî nî magaacoka maregane na mûthamaki wa Misiri. Nao andû aganu kuuma vûrûrirî waku, we Danieli nî makaaregana na mûthamaki wa Sîria nîguo kîoneki Kîamo kîvinge, nwatî nî makaavootwa.

¹⁵ Mûthamaki wa Sîria nîakaarigicîria îtûûra rîu ririgîre waro na nthingo cia vinya na arînyite. Athigari a Misiri matikaathiî na mbere kûrûa. Wana athigari arîa aro mûno matikethîrwa marî na vinya mwîganu.

¹⁶ Mûthamaki ûrîa ûkathithûkîra andû a Sîria nî akaameka wa ûrîa akwenda na gûtirî mûndû ûkaaregana nake. Nîa kaarûngama vûrûrirî wa Isiraeli na vûrûri ûcio wonthe ûkethîrwa ûrî rungu rwa wathani wake.

¹⁷ “Mûthamaki wa Sîria nî agaatua îtua rîa kûthiî na athigari ake onthe a mbaara kûrî mûthamaki wa Misiri, na nîmakaarûtha kîrîkanîro Kîam thayû nake. Nî akaamûva mwîrîtu wake nîguo megucane, ûrî mûvango wa gûcûkangia ûthamaki wake, nwatî mûvango ûcio ndûkaathiî na mbere.

¹⁸ Vuva wa ûguo, nî akaatharîkîra mavûrûri marîa marî rûtere rwa îria na avoote meengî ma mo. Nwatî mûtongoria mûgeni nî akaamûvoota na amûverithie nîûndû wa ûng'endu wake; nama nîakaaverithia mûthamaki wa Sîria nîûndû wa ûng'endu wake.

¹⁹ Nî akaagarûrûka acoke vûrûrirî wake ûrîa mwirigîre na rûthingo rwa vinya, nwatî nî akaavootwa na ndakeguîka rîngî.

²⁰ “Mûthamaki wîngî nîagaaûka na athane vuva wake. Mûthamaki ûcio nîagaatûma mwîtia mbia cia gooti nîguo avinyîrîrie andû kûruta gooti nîguo ongerere ûtonga wa ûthamaki wake. Nwatî kavinda gatarî karaca, mûthamaki ûcio nî akaaûragwa. Nwatî ndakaaûragîrwa mbaararî kana aûragîrwa andû makîonaga.”

Mûthamaki mûcûku wa Sîria

²¹ Mûraika nîwathiîre na mbere kuga atîrî, “Nîgûgaaûka mûthamaki wîngî wa Sîria mûcûku. Mûthamaki ûcio ndakethîrwa arî na kîvooto Kîam gûtuîka mûthamaki. Agaaûka atakûmenyekana na oce wathani na njîra ya wara.

²² Athigari a mbaara arîa makaaregana nake, wana ethîrwa nî mûthînjîri-Ngai mûnene; nî makaaûragwa mathirue viû.

²³ Ke nîakaaveenia mavûrûri marîa mengî na njîra ya kûrûtha kîrîkanîro nao na nîakaagîa na vinya mûno, wana ethîrwa akaathaga andû anini.

²⁴ Ke nî akaathithûkîra gîcunjî Kîam vûrûri kîrîa gîtongu andû a kuo matakûmenya. Nîageka maûndû wana mataanekwa nî methe make arîa maathanaga mbere yake. Nîagaacoka agaîre arûmîrîri ake na andû arîa aatavire, ûtonga na indo irîa aatavîte mbaararî. Nîakaavanga ûrîa akaatharîkîra kûndû kûrîa kwirigîre, nwatî ûndû ûyû ûgeekîka kavinda kanini.

²⁵ “Nîakoonania ûcamba na ûmîrîru wake rîrîa akaatharîkîra mûthamaki wa Misiri na gîkundi kînene Kîam athigari a mbaara. Nake mûthamaki wa Misiri nî akaavarîria gîkundi kînene mûno Kîam mbaara nîguo erîvîrîrie. Nwatî mûthamaki wa Misiri nîakaavootwa, nîûndû nî akaarûthîrwa mîvango ya wara ya kûmûvoota.

²⁶ Andû arîa marî vakuvî mûno nake nîmagaacaria njîra ya kûmûûraga. Athigari ake a mbaara nîmakaathirua na engî ao maûragwe.

²⁷ Athamaki acio aîrî nîmagaacoka marîcanîre vamwe, nwatî wa oîrî makaaveenanagia na makathugundaga maûndû macûku megiî ûrîa wîngî. Nwatî gûtirî mûvango wanarî ûmwe ûkaavinga, nîûndû kavinda ka guo gatikeethîrwa karî gakinyu.

²⁸ Mûthamaki wa Sîria nîagaacoka vûrûri wake na indo cionthe irîa aatavîte arî mbaararî. Nwatî meciriarî make, akethîrwa akîthugunda ûrîa agûcûkangia ndini ya andû a Ngai. Ke nîageka ûrîa akenda, akînacoka vûrûrirî wake.

²⁹ “Vîndî îrîa yagîrîrîte yakinya, nî akaathithûkîra Misiri rîngî, nwatî ndakaavootana ta ûrîa aavootanire rita rîa mbere.

³⁰ Andû kuuma Kitimu nîmakaamûtharîkîra. Nîakegua guoya na ecûrîtwe nî marakara, nî akaageria gûcûkangia ndini ya andû a Ngai. Nîagaacoka athikagîrîrie mataaro ma andû arîa mareganîte na ndini îo.

³¹ Athigari amwe ake nî mageekîra hekarû na rûthingo rwayo mûgiro. Nî magaatigithia andû kûruta matega ma wa mûthenya, na macoke matûme hekarû îgîe mûgiro.

³² Mûthamaki ûcio nîakaagucîrîria na njîra ya maveeni arîa onthe mareganîte na ndini yao, nwatî arîa marûmagîrîra Ngai nîmakaaregana nake.

³³ Andû aûgî gatagatîrî ka andû acio nîmagaatûma andû eengî mataûkîrwe. Nwatî vuva wa kavinda kanini amwe gatagatîrî kao nîmakaaûragîrwa mbaararî kana mavîvue makue, nao engî nîmagoocwa na mathamue.

³⁴ Vîndî îrîa makethîrwa makîûragwa, andû a Ngai nîmakaanyita ûtethio mûnini, wana ethîrwa andû eengî makanyitanagîra nao na njîra ya kînyûrûri.

³⁵ Atongoria amwe arîa aûgî nî makaaûragwa. Vuva wa ûguo andû acio engî nî makaatherua macerûve ta îra. Ûndû ûcio nîûkaathiî na mbere nginya mavinda ma mûthiia marîa Ngai avarîrîtie.

³⁶ “Mûthamaki wa Sîria nîageka kwenda gwake. Ke nîakenenevia gûkîra ngai cionthe na arume Ngai Ûrîa Mûnene gûkîra Ngai cionthe. Ageka ûguo nginya rîrîa Ngai akaamûverithia; nîûndû ûrîa Ngai avangîte gwîka nwanginya ûkaavinga.

³⁷ Mûthamaki ndakaathîkîra ngai irîa ciavoyagwa nî methe make ma tene, kana ngai irîa ciendeetwe nî aka. Ke nîakaaregana na ngai cionthe, nîûndû nîageetua mûnene gûkîra ngai cionthe.

³⁸ Vandû va ûguo, nîkava ngai îrîa îgitagîra îtûûra rîrîa ririgîre gîtîîo, îrîa methe mao mataavecaga gîtîîo. Ke nîakaarutîra ngai îo thaavu, sîlûva, mathiga ma goro na iveo ciîngî cia goro.

³⁹ Mûthamaki akaatharîkîra matûûra marîa mairigîre na nthingo cia vinya, na ûtethio wa ngai ng'eni. Andû arîa mamûtucaga mûthamaki nîakaamava gîtîîo kînene. Nîakamava mawîra manene na ma vata na amagaîre gîcunjî Kîam vûrûri kîrî kîveo.

⁴⁰ Rîrîa kavinda ka mûthiia ka mûthamaki wa Sîria gagaakinya, nîakaatharîkîrwa nî mûthamaki wa Misiri. Nwatî mûthamaki wa Sîria nîakeyûmîrîria arûe nake, amûtharîkîre na ikaari cia mbarathi, athigari arîa mathiîcaga mekarîrîte mbarathi na meri nyîngî. Nî akaatharîkîra mavûrûri mengî, na amavatîrîrie ta ûrîa mwîcûro wa manjî wîkaga.

⁴¹ Nî akaatharîkîra vûrûri wa kîîranîro na aûrage andû ngiri makûmi mengî. Nwatî vûrûri wa Edomu, Moabu na gîcunjî kînene Kîam Amoni nîikaavonokua kuuma kûrî ke.

⁴² “Nî akaatharîkîra mavûrûri monthe, wana nginya vûrûri wa Misiri ndûgaatigîrîrwa.

⁴³ Kûrîa kuonthe ûtonga wa Misiri wa thaavu, sîlûva, na indo cia goro ûkethîrwa ûrî, nî gûgaatavwa nî mûthamaki wa Sîria. Nîakaavoota vûrûri wa Lîbia na wa Ethiopia.

⁴⁴ Nwatî ndûmîrîri kuuma mwena wa îrathîro na wa rûgûrû, nîgaatûma amake, na arûe ang'ûrîkîte mûno na acûkangangie mavûrûri meengî mathire viû.

⁴⁵ Nîakaamba magema make ma ûthamaki gatagatî ka îria na kîrîma kîrîa kîtheru, varîa hekarû îtumîtwe. Nwatî kavinda gake ga gûkua gakinya, gûtirî mûndû ûkamûtethia.”