Danieli 10 - ÎVUKU RÎA ÛVORO MWARO

Danieli nîwonire kîoneki kîa mûndû

¹ Mwaka wa kathatû Cairasi arî mûthamaki wa Perisi, Danieli, ûrîa watuîrîrwe rîîtwa Beliteshazaru, nîwaguûrîrue ndûmîrîri. Ndûmîrîri îo yarî ya ma, nwatî yarî nyûmû mûno, na ndîereekaga. Danieli nîwereithirue ûrîa ndûmîrîri îo yaugaga na njîra ya kîoneki.

² Vîndî îo nie Danieli, nînethîrîtwe ngîcakaya îvinda rîa ciumia ithatû.

³ Ndiarîa irio mbaro, nyama, wana ndiacama ndivei, kana njanûra njuîrî, îvinda rîa ciumia icio ithatû.

⁴ Mûthenya wa mîrongo îrî na îna mweri wa mbere rîrîa naarûngamîte rûtere rwa Rûnjî rûnene rwa Tigiri,

⁵ nînaroririe îgûrû na ngîona mûndû wekîrîte nguo mbaro, na weyovete mûcivi wa thaavu ntheri.

⁶ Mwîrî wake wakengaga ta mathiga ma goro. Ûthiû wake wavenagia ta rûveni, namo metho make maakanaga ta nînîmbî cia mwaki. Njara na magûrû make ciatherete ta gîcango kîthûîtwe mûno. Mûgambo wake weguîkaga ta înegene rîa andû eengî.

⁷ Nie Danieli, nienga nînie noonire kîoneki kîu. Arûme arîa twarî nao mationa kîndû. Nwatî nîmaavavûkire mûno na makîvinyûra makîîthitha.

⁸ Kwoguo natigirwe nienga, ngîonaga kîoneki kîu Kîam magegania. Ndîarî wanarî kavinya gatigaru, naguo ûthiû wakwa nîwagarûrûkire mûno ûndû gûtarî mûndû ûngîamenyire.

⁹ Na rîrîa neguire mûgambo wake nînaarivanire nthî na ngîkara vo ndurumithîtie ûthiû nthî ndakwîîgua.

¹⁰ Wa rîmwe nînaanyitirwe njara na ngîûkîrîrua ngîrûngama ngîtetemaga.

¹¹ Nake mûraika nîwambîrire atîrî, “Danieli, Ngai nîakwendete mûno. Rûngama na ûthikîrîrie waro ûrîa ngûkwîra. Nie ndûmîtwe kûrî we.” Rîrîa aambîrire ûguo, nînarûngamire wa nginainaga.

¹² Nîwacokire akîmbîra atîrî, “Danieli, ndûgetigîre. Ngai nîeguîte mavoya maku kuuma vîndî îrîa wenyivirie mbere yake nîguo ûtaûkîrwe nî kîoneki. Nie naûka gûgûcokeria mavoya maku.

¹³ Nwatî mûraika ûrîa ûgitagîra vûrûri wa Perisi nîwareganire nanie îvinda rîa mîthenya mîrongo îîrî na ûmwe. Nake Mikaeli, ûmwe wa araika arîa anene nîwaûkire kûndethia nîûndû natigîtwe tûrî na athamaki a Perisi.

¹⁴ Nie naûka gûgûtethia gûtaûkîrwa nî maûndû marîa mageekîka kûrî andû aku mavinda marîa magaaûka. Nîûndû kîoneki gîkî nîkîa mavinda marîa magaaûka.”

¹⁵ Rîrîa aambarîrie ûguo nînaroririe nthî na ngîremwa nî kwaria.

¹⁶ Vîndî wa îo, mûraika ûrîa wekariî ta mûndû nîwavutirie mîromo yakwa na njara yake. Nanie nînamwîrire atîrî, “Mwathi wakwa, kîoneki gîkî nî kîmbîkagîra guoya na ngathirwa nî vinya.

¹⁷ Nie mbîkariî ta ngombo îrûngamîte mbere ya mwathi wayo. Nîngîaria nawe atîa? Ndirî wanarî kaavinya kana mîvevû ndigarîtie.”

¹⁸ Warîngî ûcio wekariî ta mûndû nîwamvutirie na njara yake na ngîgîa na vinya.

¹⁹ Nîwambîrire atîrî, “We mûndû ûyû, Ngai nî mûkwendu mûno, ndûgetigîre! Gîa na thayû, gîa na vinya na ûmîrîrie!” Na rîrîa aambîrire ûguo, nînaagîre na vinya na ngiuga atîrî, “Mwathi wakwa, rîu mbîra ûrîa ûkwenda, nîûndû nîwambîkîra vinya.”

²⁰ Nîwacokire akîmbûria atîrî, “Nîwîcî kîrîa gîtûmire mbûke kûrî we? Rîu nwanginya njoke ngarûe na mûraika wa vûrûri wa Perisi. Na narîkia kûthiî kûrûa nake, mûraika wa vûrûri wa Ngiriki nîakaaumîra.

²¹ Nwatî nîngaakwîra ûrîa kwandîkîtwe îvukuurî rîa ûma. Ndirî na wa kûndethia kûrûa na nthû ino tiga Mikaeli, mûraika ûrîa ûmûgitagîra.