Ciîko 9 - ÎVUKU RÎA ÛVORO MWARO

Saûlo nîwagarûrûkire

¹ Nwatî kavindarî wa kau Saûlo nîwekaraga akîvavûraga arûmîrîri a Mwathani, akiuga atî nîakûmaûraga. Kwoguo nîwathiîre kûrî Mûthînjîri-Ngai ûrîa mûnene,

² na agîtia maarûa cia kûmûmenyithania mavoerorî marîa maarî îtûûrarî rîa Damesiki, nîguo angîona arûmîrîri a njîra ya Mwathani, arûme kana aka, amanyite na amacokie Jerusalemu.

³ Na rîrîa Saûlo aakuvîvîrie Damesiki ûtheri nîwaumire îgûrû na ûkîmûmûrîka wa rîmwe kuuma mîena yonthe.

⁴ Nake nîwarivanire nthî na akîgua mûgambo ûkîmwîra atîrî, “Saûlo, Saûlo! Ûnyariraga nîkî?”

⁵ Nake nîwaûririe atîrî, “We wî û Mwathani?” Nake nîweguire mûgambo ûcio ûgîcokia atîrî, “Nie nînie Jesû ûrîa ûranyarira.”

⁶ “Nwatî ûkîra wa rîu, ûthiî îtûûrarî, na nîûkwîrwa ûrîa wagîrîrîtwe nî gwîka.”

⁷ Nao andû arîa maathiîcanîtie na Saûlo nîmaarûngamire vau, nwatî matiauga wa naarî ûndû. Nîmegwire mûgambo, nwatî mationa mûndû.

⁸ Nake Saûlo nîwarûngamire na akîvingûra metho, nwatî ndangîavotire kwona kîndû. Kwoguo andû arîa maarî nake nîmaathiîre mamûnyitîte njara nginya magîkinya Damesiki.

⁹ Nake nîwekarire mîthenya îthatû atakûvota kwona na atakûrîa kana kûnyua wa naarî kîndû.

¹⁰ Nakuo kûu Damesiki kwarî na mwîtîkia ûmwe wetagwa Anania. Nake Mwathani nîwamumîrîre na njîra ya kîoneki na akîmwîra atîrî, “Anania!” Nake nîwamûcokerie atîrî, “Nie nîrî ava, Mwathani.”

¹¹ Nake Mwathani nîwamwîrire atîrî, “Ûkîra ûthiî njîrarî Nûngarû, na wona wakinya mûciî kwa Judasi, ûrîrîrie mûndû ûmwe wa kuuma îtûûrarî rîa Tarishisi wîtagwa Saûlo. Rîu ke arî kûu akîvoya,

¹² na nîagîte na kîoneki na akona mûndû wîtagwa Anania akîthiî kûrî ke na akîmwigîrîra njara nîguo amûvotithie kwona rîngî.”

¹³ Nwatî Anania nîwacokirie atîrî, “Mwathani, andû eengî nîmambîrîte ûvoro wîgiî mûndû ûcio, na wîgiî maûndû monthe macûku marîa ke ekîte andû aku atheru arîa marî kûu Jerusalemu.

¹⁴ Rîu ke nîarîkîtie gûka gûkû Damesiki. Nao anene a athînjîri-Ngai nîmamûvete wathani wa kûnyita mûndû wa wonthe ûrîa ûkûgoocaga.”

¹⁵ Nwatî Mwathani nîwerire Anania atîrî, “We thiî, nîûndû nie nînthuurîte Saûlo nîguo atuîke ndungata yakwa. Ke nîke ûgûtûma rîîtwa rîakwa rîmenywe nî Andû a Ndûrîrî, athamaki na andû a Isiraeli.

¹⁶ Na nie mwene nîngûmwonia ûrîa ke akathînua nîûndû wakwa.”

¹⁷ Kwoguo Anania nîwathiîre, agîtonya mûciî kwa Judasi, akigîrîra Saûlo njara na akîmwîra atîrî, “Saûlo mûriû wa îthe wetû, nie nînatûmwa nî Mwathani Jesû ûrîa ûrakumîrîre vîndî îrîa we ûraûkîte gûkû. Ke andûma nîguo we ûvote kwona rîngî na wîcûrwe nî Roho Mûtheru.”

¹⁸ Na wa rîmwe tûnyamû twekariî ta tûkoro twa rûûo rwa nthamaki nîtwagwîre kuuma methorî ma Saûlo na akîvota kwona rîngî. Nake nîwacokire akîrûngama na akîvatithua;

¹⁹ na arîkia kûrîa irio agîcokwa nî vinya. Kwa îvinda rîa mîthenya mînini Saûlo nîwekaranirie na etîkia arîa maarî Damesiki.

Saûlo nîwavunjirie Damesiki

²⁰ Na vîndî wa îo ke nîwambîrîrie kûthiî mavoerorî. Nake nîwavunjirie kuo akiugaga atî Jesû nî Mûriû wa Ngai.

²¹ Nao andû onthe arîa maamwîgwire nîmaamakire mûno na makîûrania atîrî, “Na kinthî mûndû ûyû tîke ûrîa ûrarî Jerusalemu, na nîke ûraûragaga andû arîa magoocaga mûndû ûcio wîtagwa Jesû? Wana kinthî ke twake ûraûkire gûkû nîûndû wa gîtûmi wa kîu gîa kûnyita arûmîrîri acio a Jesû akîmacokagia kûrî anene a athînjîri-Ngai?”

²² Nwatî Saûlo nîwavunjirie na vinya mûno. Nake nîwonanagia nama atî Jesû nîke Mesaya, ûndû nginya Ayahudi arîa maatûûraga Damesiki matangîavotire gûkararania na Saûlo.

²³ Nayo mîthenya mîîngî yarîkia kûvîtûka, Ayahudi amwe nîmaacemanirie na makîvanga maûrage Saûlo.

²⁴ Nao nîmaamwetagîrîra kîvingorî Kîam îtûûra rîu makîenda kûmûûraga, nwatî Saûlo nîwamenyire mûvango ûcio wao.

²⁵ Nwatî ûtukû ûmwe arûmîrîri ake nîmaamwagararîrie rûthingorî îgûrû makîmûnyûrûrûkia arî gîkavurî.

Saûlo arî Jerusalemu

²⁶ Nake Saûlo nîwathiîre Jerusalemu na akîgeria gûtonya gîkundirî Kîam arutwa, nwatî onthe nîmaamwîtigîre nîûndû matietîkagia atî ke aarî mûrûmîrîri.

²⁷ Nwatî Baranaba nîwamwîtîkîre na akîmûvira kûrî atûmwa. Baranaba nîwamataarîrie ûrîa Saûlo arî njîrarî oonire Mwathani na Mwathani akîmwarîria. Nîwacokire akîmeera ûrîa Saûlo aavunjirie na rîîtwa rîa Jesû arî na ûmîrîru mwîngî mûno kûu Damesiki.

²⁸ Kwoguo Saûlo nîwekaranirie na atûmwa. Nake nîwathiîcaga kûu Jerusalemu kuonthe akîvunjagia rîîtwarî rîa Mwathani arî na ûmîrîru mwîngî.

²⁹ Mavinda meengî ke nîwaragia na agakararania na Ayahudi arîa maaragia Kîngiriki, nwatî nao nîmaageragia kûmûûraga.

³⁰ Rîrîa etîkia maamenyire ûvoro ûcio, nîmaamûvirire Kaisarea na makîmwîra athiî îtûûrarî rîa Tarishisi.

³¹ Kwoguo kanitha ya kûu kuonthe Judea, Galili na Samaria nîyekarire îrî na thayû. Nayo îgîtethagîrîrua nî Roho Mûtheru nîyagîre na vinya na îkîthiî na mbere gûkûra îkîongererekaga îrî na wîtigîri wa Mwathani.

Petero nîwathiîre Lîda na Jopa

³² Rîrîa Petero aathiîcaga kûndû na kûndû, nîwacerere andû a Ngai arîa maatûûraga gîcagirî Kîam Lîda.

³³ Akinya kuo nîwethîrîrie mûndû wetagwa Aenea. Aenea nîwarwarîte mûrimû wa gûkua ciîga cia mwîrî na nîwekarîte mîaka înana atakûvota kuuma ûrîrî.

³⁴ Nake Petero nîwamwîrire atîrî, “Aenea, Jesû Kristû nîagûkûvonia wa rîu. Ûkîra na ware ûrîrî waku.” Na wa rîmwe Aenea nîwaûkîrire.

³⁵ Nao andû onthe arîa maatûûraga kûu gîcagirî Kîam Lîda na Sharoni nîmaamwonire na magîtîkia Mwathani.

³⁶ Nakuo îtûûrarî rîa Jopa nîkwarî na mûndûmûka mwîtîkia wetagwa Tabitha. (Rîîtwa rîu rîake na Kîngiriki nî Dorokasi, na nî ta kuga “nthiia.”) Nake nîwamenyerete gwîkaga ciîko mbaro na gûtethagia athîni.

³⁷ Vîndî îrîa Petero aarî kûu Lîda, Tabitha nîwarwarire na agîkua. Naguo mwîrî wake nîwathambirue na ûkigwa nyomba ya îgûrû.

³⁸ Na nîûndû kûu Lîda kwarî gûkuvî na Jopa, etîkia arîa maarî Jopa megua atî Petero aarî Lîda nîmaatûmire andû aîrî mathiî mamûthaithe makîmwîraga atîrî, “Wenda tu ûka gwetû narua.”

³⁹ Kwoguo Petero nîwaûkîrire na akîthiîcania nao. Na vîndî îrîa ke aakinyire kuo, etîkia nîmaamûvirire nyomba ya îgûrû. Nao aka a ndigwa nîmaathiûrûrûkîrie Petero makîrîraga, na makîmwonia cati na magooti marîa Dorokasi aatumîte rîrîa aarî mwoyo.

⁴⁰ Nwatî Petero nîwerire andû onthe arîa maarî kuo maume nja. Nake nîwaturirie maru na akîvoya. Nîwacokire akîvûgûka na kûrîa mwîrî ûcio warî na akiuga atîrî, “Tabitha, ûkîra!” Nake nîwavingûrire metho, na vîndî îrîa oonire Petero, nîwekarire nthî.

⁴¹ Nake Petero nîwamûnengererie njara na akîmûtethia kûrûngama. Nîwacokire agîîta etîkia na aka a ndigwa na akîmûnenganîra kûrî o arî mwoyo.

⁴² Naguo ûndû ûcio nîwamenyekanire Jopa kuonthe na andû eengî magîtîkia Mwathani.

⁴³ Nake Petero nîwekarire kûu Jopa mîthenya mîîngî marî na mûndû wathondekaga njûo wetagwa Simoni.