Ciîko 3 - ÎVUKU RÎA ÛVORO MWARO

¹ Mûthenya ûmwe Petero na Johana nîmaathiîre hekarûrî thaa kenda vîndî ya mavoya.

² Na vau mûromorî wa hekarû, ûrîa wetagwa Mûromo Mûthaka, vaarî na mûndû watûûrîte onjete magûrû kuuma gûciarwa gwake. Wa mûthenya wa mûthenya nîwakuuagwa akaigwa vau mûromorî ûcio nîguo avoe mbeca kuuma kûrî andû arîa maatonyaga hekarûrî.

³ Rîrîa oonire Petero na Johana magîtonya kuo, nîwamathaithire mamûve kîndû.

⁴ Nao nîmaamûroririe na vinya mûno na Petero nîwamwîrire atîrî, “Ta tûrorie!”

⁵ Nake mûndû ûcio nîwamaroririe agîciragia nîakûvewa kîndû nîo.

⁶ Nwatî Petero nîwamwîrire atîrî, “Nie ndirî na mbeca, nwatî nîngûkûva kîrîa nîrî nakîo. Na rîîtwa rîa Jesû Kristû wa Nazarethi, nie nakwîra ûûkîre na wîthiîre!”

⁷ Nake Petero nîwamûnyitire njara yake ya ûrîo na akûmûtethereria gûkîra. Na wa rîmwe makinyo make na nthûng'wa nîciagîîre vinya.

⁸ Nake mûndû ûcio wonjete nîwarûgire îgûrû, akîrûngama na akîambîrîria kûthiî na magûrû. Nîwacokire agîtonya hekarûrî vamwe nao athiîte na magûrû akîrûgarûgaga na agîkumagia Ngai.

⁹ Nao andû arîa maarî vau onthe nîmoonire mûndû ûcio athiîte na magûrû na agîkumagia Ngai.

¹⁰ Na rîrîa maamenyire atî mûndû ûcio nî ûrîa watûûraga mûromorî ûrîa mûthaka akîvoya mbeca, onthe nîmaamakire mûno na makîgega nî ûrîa gwekîkîte.

Ndûmîrîri ya Petero hekarûrî

¹¹ Rîrîa mûndû ûcio enyitîrîrîte varî Petero na Johana vau kîthakurî kîrîa gîetagwa Kîam Solomoni, andû nîmaamakire mûno na makîvinyûra varî o.

¹² Rîrîa Petero oonire andû acio, nîwamerire atîrî: “Mue andû etû a Isiraeli, ûndû ûyû ûmûmakîtie nîkî? Mûtûroretie na vinya ûguo nîkî? Nîkwa mûreciria atî nî vinya kana ûngai wetû ûtûmire mûndû ûyû athiî na magûrû?

¹³ Ngai wa Iburahimu, Isaka na Jakovu na nîke Ngai wa methe metû ma tene, nîke ûvecanîte riiri wake kûrî Jesû ndungata yake. Nwatî mue nîmwanenganîre Jesû kûrî athani na mûkîmûrega mbere ya Pilato, wana ethîrwa Pilato nîwatuîte amûrekererie.

¹⁴ Mue nîmwaregire Ûrîa Mûtheru na Mûthingu na mûkîûria Pilato amwovorere mûragani vandû vake.

¹⁵ Mue nîmwaûragire Mûvecani wa mwoyo, nwatî Ngai nîwamûriûkirie. Tue tûrî aira a ûvoro ûyû.

¹⁶ Vinya wa rîîtwa rîa Jesû nîguo watûma mûndû ûyû ûraarî kîonje agîe na vinya. Ûguo mue mûrona na mûramenya wekîka nîûndû wa gwîtîkia rîîtwa rîa Jesû.

¹⁷ “Na rîu ariû na aarî a Îthe wetû, nie nîmbîcî mue na anene enyu mwekire Jesû ûguo nîûndû wa kûrigwa.

¹⁸ Nwatî ûguo nîguo Ngai aavingirie ûrîa ke aarîtie na njîra ya tûnyua twa arathi ake onthe, atî nwa nginya Mesaya wake anyarirwe.

¹⁹ Kwoguo îîrireni na mûcokerere Ngai nîguo ke amwovere mevia menyu. Na mwona mweka ûguo,

²⁰ Mwathani nîakûmûva mavinda ma kûgîa na vinya wa kîîroho na amûtûmîre Jesû, ûrîa ke aathuurire atuîke Mesaya.

²¹ Nwatî Jesû nwa nginya ekare îgûrû nginya rîrîa kavinda gagaakinya ka maûndû monthe gûtuîka macerû. Kavinda kau nîko Ngai ke aaririe kuuma tene na njîra ya tûnyua twa arathi ake atheru.

²² Nîûndû wana Musa nîwaugire atîrî, ‘Mwathani Ngai wenyu nîakaamûtûmîra mûrathi wata ûrîa ke aandûmire. Mûrathi ûcio akeethîrwa arî ûmwe wa andû enyu. Na mue nwanginya mûkaamwathîkîra maûndûrî monthe marîa ke akaamwîra.

²³ Mûndû wa wonthe ûtakaathîkîra mûrathi ûcio nîakaathengutua kûrî andû a Ngai na athirue.’

²⁴ Nao arathi onthe arîa manavecana ndûmîrîri ya Ngai, mambîrîrîtue nî Samueli na arîa maaûkire vuva wake, nîmaarathire ûvoro wîgiî maûndû marîa marethîrwa magîkîka mîthenyarî îno.

²⁵ Mue mûrî a mbarî ya arathi, na nîmwamûkîrîte kîrîkanîro kîrîa Ngai aarîkanîre na methe menyu ma tene. Ke erire Iburahimu, îthe wenyu wa tene atîrî, ‘Nie nîngaarathima andû onthe a nthî na njîra ya andû a mbarî yaku.’

²⁶ Kwoguo Ngai nîwathuurire Ndungata yake na akîmîtûma kûrî mue mbere, nîguo îmûrathime na îtûme wa mûndû wa wonthe agarûrûke atige mîtugo yake ya waganu.”