Ayubu 5 - ÎVUKU RÎA ÛVORO MWARO

¹ “Ayubu, îtana wone kana kûrî mûndû ûgûgûcokeria. Kûrî mûraika wanarî ûmwe ûngîkûthikîrîria?

² Marakara maûragaga kîrimû, naguo wîru ûragaga mûndû mûritu.

³ Nîrîmwonu kîrimû kîmarîrîte nwatî wa rîmwe nînarumire kûrîa gîtûûraga.

⁴ Ciana ciake itirî na ûgitîri; wana ingîthiî ciirarî itionaga wa gûitetera, nîûndû gûtirî mûndû wa gûitethia.

⁵ Andû arîa avûtu marîcaga maketha ma kîrimû, marîcaga nginya marîa marî mîguarî, arîa akoroku megucagîra ûtonga wake wîru.

⁶ Mînyamaaro ndîkûraga rûkûngûrî ta mîmera, na thîna ndûmeraga mûtheturî.

⁷ Nwatî kuuma mûndû aaciarwa nîonaga mathîna, mathandûkaga ta nthande cia mwaki.

⁸ “Nie nîngîrî we nîngîcokerera Ngai, na kûmwîra mathîna makwa monthe.

⁹ Ke ekaga maûndû manene tûtangîvota gûtarîria, maûndû ma magegania matangîtarîka.

¹⁰ Nîke urithagia mbura nthî, na agetîrîria mîgûnda manjî.

¹¹ Nîanenevagia arîa menyivagia, na agatûma arîa maracakaya makene.

¹² Nîacûkangagia mîvango ya arîa marî wara, nîguo wîra ûrîa marutaga ûtuîke wa mana.

¹³ Nîanyitaga andû arîa aûgî na wara wao, na nîarûngamagia mîvango ya arîa etîi wa rîmwe.

¹⁴ Marumagîrwa nî nduma kûnarî mûthenya, na maatataga mûthenya ta andû marî ndumarî.

¹⁵ Nwatî Ngai nîavonokagia ciana cia ndigwa itikaûragwe, avonokagia ngîa kuuma njararî cia arîa aganu.

¹⁶ Kwoguo nîavecaga athîni kîîrîgîrîro, na nîatûmaga arîa matarîa kîvooto mathire.

¹⁷ “Gûkena nî mûndû ûrîa ûverithagua nî Ngai, kwoguo ndûkaire îverithia rîa Ûrîa mînene.

¹⁸ Nîûndû ke nîativagia nwatî nîacokaga akamwova, na nîatemaga mûndû na akamûvonia.

¹⁹ Ke nîagaagûkûûra mathînarî matandatû, na ndûgaacûkangua nî thîna wa mûgwanja.

²⁰ Vîndî ya yûra nîagaakûvonokia kuuma kûrî gîkuû, na vîndî ya mbaara nene nîgagûtethûra kuuma kûrî gîkuû.

²¹ Nîagaakûvonokia kuuma kûrî arîa maiganagîrîra ing'enyo, mûthiro waûka we ndûgetigîra.

²² Mûthiro na yûra ciaûka, we nîûkaithekerera; na ndûgeetigîra nyamû cia kîthaka.

²³ Mîgûnda îrîa ûrîmaga ndîkethagîrwa na mathiga, nyamû cia kîthaka itigakûtharîkîra.

²⁴ Kwoguo ûgatûraga na thayû îgemarî rîaku. Rîrîa wathiî kûroria ng'ondu ciaku, ûkethagîra irî vo cionthe.

²⁵ Nîûkagîa na njiarwa nyîngî, ta nyaki ya kîthakarî.

²⁶ Wata ûrîa ngano ikûraga igakinyia rîa gûkethwa, nwata guo we ûgaakua ûrî mûkûrû mûno.

²⁷ Ayubu, tûmenyete maûndû mama na njîra ya gûtuîria. Nî ûvoro wa ma, kwoguo wamûkîre.”