Ayubu 42 - ÎVUKU RÎA ÛVORO MWARO

¹ Ayubu nîwacokerie Ngai-Mûnene atrî,

² “Nîmbicî atî ûrî na ûvoti wa gwîka maûndû monthe, na gûtirî mûndû ûngîregana na wendi waku.

³ Waugire atî nînaageragia gûcûkangia mûvango waku wa ûrimû. Nama nie naririe ûndû ndaamenyaga naaririe maûndû ma magegania mûno marîa nie ndamenyaga.

⁴ Wambîrire nthikîrîrie nawe nîûkûmbîra, ûkîmbîra nîûkambûria kîûria nawe nanie ngûcokerie.

⁵ Nîkwa negucaga ndeto ciakwa na matû, nwatî rîu nîreyonera na metho.

⁶ Kwoguo, nîngûvera ngîvakaga rûkûngû na mûu, nîreyonaga nîrî kîndû Kîam mana.”

⁷ Ngai-Mûnene arîkia kwaria a Ayubu nîwacokire akîîra Elifazi Mûtemani atîrî, “Nîrî mûrakaru mûno nîûndû waku, vamwe na arata aku aîrî; nîûndû matianaria ûvoro ûmbîgiî ta ûrîa Ayubu ndungata yakwa yekaga.

⁸ Kwoguo rîu oca ndegwa mûgwanja na ndûrûme mûgwanja, ûcoke ûthiî nacio kûrî ndungata yakwa na ûrute îtega rîa kûvîvua. Ayubu nîagaakûvoera, na nie nîngegua mavoya make na ndege gûkûverithia kûringana na mavîtia maku. We nîwaregire kwaria ûvoro wa ma ûmbîgiî ta ûrîa Ayubu ethîrîtwe agîka.

⁹ Kwoguo Elifazi Mûtemani, Bilidadi Mûshuli, na Zofari Mûnamathu, nîmaathiîre na magîka ûrîa Ngai-Mûnene aamerîte. Nake Ngai-Mûnene nîweguire mavoya ma Ayubu.”

¹⁰ Ayubu arîkia kûvoera arata ake, Ngai-Mûnene nîwamûcokerie indo ciake cionthe maita maîrî ma ûrîa ciegana mbere.

¹¹ Nao aa mûrwang'ina, na andû onthe arîa mbererî maarî arata ake, nîmaûkire kûmûcerera na makîrîcanîra nake gwake mûciî. Nîmaanyitanîre nake mathînarî make na makîmûmîrîria nîûndû wa mathîna monthe marîa aacemanîtie namo kuuma kûrî Ngai-Mûnene na wa mûndû akîmûva mbeca na gîcûvî Kîam thaavu.

¹² Ngai-Mûnene nîwarathimire Ayubu ûtûrorî wake wa mûthiia gûkîra ûrîa aamûrathimîte ûtûrorî wa mbere.

¹³ Nîwagîre na ng'ondu ngiri îkûmi na inya (14,000) Ngamîîra ngiri ithathatû (6,000), ng'ombe ngiri ciîrî (2,000), na mvunda ngiri îmwe (1,000). Nîmarathimirwe na anake mûgwanja (7) na erîtu athatû (3).

¹⁴ Mwîrîtu ûcio mûkûrû atuîrîrwe rîîtwa Jemima, wa kaîrî etirwe Kezia, na wa kathatû Kereni-hapuki,

¹⁵ Gûtirî mûndûmûka warî mûthaka ta erîtu a Ayubu nthî yonthe. Ayubu îthe wao nîwamagaîre îgai rîao akîgaîra aa mûrwang'ina.

¹⁶ Ayubu aatûrire mîaka îgana rîa mîrongo îna (140) na akîona ciana cia ciana ciake, nginya rûciaro rwa kana.

¹⁷ Ayubu nîwakuire arî mûthuuri watûûrîte mîaka mîngî mûno.