Ayubu 41 - ÎVUKU RÎA ÛVORO MWARO

¹ Nwa ûtege kîng'ang'i na ndûano, kana ûkîove rûrîmî na mûkanda?

² Nwa wîkîre mûkanda îniûrûrî rîakîo, kana ûtûrîkanie rûthîa rwa kîo na mbogoro?

³ Nwa gîkûthaithe ûkîrekie? Nwa gîgûkaîre ûkînakîguîra ntha?

⁴ Nwa ûrûthe kîrîkanîro nakîo, mûrîkanîre gîtûûre gîgûtungatagîra?

⁵ Nwa ûkîthaîke ta ûrîa ûthaîkaga gîconi mûkîthakania nakîo, kana ûkîvingîrîrie nîguo ndungata ciaku cia erîtu ikîmemagie.

⁶ Ategi a nthamaki nwa marîrîrie thogora wakîo? Avûri mbiacara nwa makîgaanie makîendie?

⁷ Nwa ûtûrîkie rûo rwa kîng'ang'i na mûnyoge? Nwa ûmunde kîng'ang'i na îtumû?

⁸ Ta mîvutie na njara na ndûkamîvutia rîngî. Ûkaarûa mbaara ûtaanarûa rîngî.

⁹ Mûndû wa wonthe wonaga njûnamatu nîathiragwa nî vinya na akagwa nthî.

¹⁰ Gûtirî njamba îngîvota kûmîvavûkia, gûtirî mûndû ûngîmîtirîria.

¹¹ Nû ûngîtharîkîrwa na acoke avonoke? Gûtirî mûndû nthî yonthe ûngîmîtharîkîra.

¹² Na kaî magûrû ma ndamathia îno marî vinya-î, Na kaî mwîrî wayo nî mûtungu-î!

¹³ Nû ûngîvota kûmîruta nguo ya îgûrû mwîrîrî? Nû ûngîmîruta nguo ya cuuma ya ndarî?

¹⁴ Nû ûngîgeria kûmîathamûra nthîa ciayo? Magego ma yo marî na guoya nyîngî.

¹⁵ Ngothi yayo îcûrîtwe nî mathemo mekariî ta ngo. Manyitithanîtue vamwe makaûma ta îthiga.

¹⁶ Nîûndû wa ûrîa matumanîte, gûtirî rîera rîngîvota gûtonyerera gatagatî ka mo.

¹⁷ Magwatanîte vamwe manyinyanîtie, makanyitana ûndû matangîrekania.

¹⁸ Îtivaga ûtheri ûkaveenia, metho ma kîo nîta riûa rîkîratha.

¹⁹ Kanyuarî ka yo kuumaga rûrîrîmbî rwa mwaki, na gûkauma nthande cia mwaki.

²⁰ Maniûrûrî mayo kuumaga ndogo, ta ya macaki makîruga nyûngû.

²¹ Mîvevû yayo nîyakanagia mwaki, na kanyuarî ga kîo nîkumaga rûrîrîmbî rwa mwaki

²² Ngingorî yayo nîkuo vinya umaga, ûngîgîkuvîvîria nîwagwa nthî nî guoya.

²³ Nyama ciayo inyitanîte vamwe ikagîa ikagîa ngata wana irîa ndotu mûno inyitanîte na itingîrekania.

²⁴ Ngoro yayo yûmîte ta îthiga îkaûma ta îthiga rîa kûthia.

²⁵ Rîrîa yarûgama na îgûrû, wana nyamû îrîa îrî vinya mûno nîîvavûkaga.

²⁶ Ûngîmikia rûviû, rûtingîmîvutia, îtumû, mîguî kana kîndû wa kîonthe gîtingîmîguraria.

²⁷ Kûrî yo cuuma nîta kamûnyaki, na gîcango nîta mûtî mworu.

²⁸ Gûtirî mûguî ûngîtûma yûre, ikagua îthiga rîkeera ta kamûnyaki.

²⁹ Yonaga njokoma ta gacaki, îthekagîrîra arîa mamikagia îtumû.

³⁰ Nda yayo nîtakwa yarîtwe ngîo mbûgî îtambarûraga ta îthiga rîa kûvûrîra mwere.

³¹ Nîitûmaga îria rîtherûke ta nyûngû. Îkavûûraga manjî ma îria magekara ta maguta ma kwîvaka.

³² Vuva wayo îtigaga mûkururo ûravenia mûndû nwa auge ndia îrî na mbuî.

³³ Gûkû nthî gûtirî nyamû îkariî ta yo, nî kîûmbe gîtarî na guoya.

³⁴ Nî iiraga nyamû cionthe irîa ciîtîîaga, nîyo mûthamaki wa nyamû cionthe cia kîthaka.