Ayubu 40 - ÎVUKU RÎA ÛVORO MWARO

¹ Ngai-Mûnene nîwerire Ayubu atîrî,

² We ûtuîragia mavîtia, nîûgûcindana na Ngai Mwene Vinya? We ûkararanagia na Ngai, njokeria.

Ayubu

³ Ayubu nîwacokire agîcokeria Ngai-Mûnene atîrî:

⁴ “Nie ndirî vata, nîngîgûcokeria atîa, nîngûkunîka kanyua gakwa.

⁵ Nîmbarîtie maita meengî nwatî ndikaaria rîngî, nîmbarîtie mûno nwatî ndikwaria rîngî.”

⁶ Nake Ngai-Mûnene arî rûkûngi rûnene nîwacokerie Ayubu atîrî:

Ngai-Mûnene

⁷ Îîyûmîrîrie ta mûndûmûrûme; nîngûkûria ciûria, nawe ûnjokerie.

⁸ Nîkwa ûrenda kûregana na îtua rîakwa, wonanie atî nîrî na mavîtia, nîguo we ûtuîke mwaro?

⁹ We wî vinya ta nie? Wavota kûruruma na mûgambo ta wakwa?

¹⁰ Tonania ûrîa ûrî ngumo na wî mûtîîe, onania ûrîa wî mûnene na wî na ûvoti.

¹¹ Îtûrûrîra andû marakara maku manene, roria arîa onthe etîi na ûmagwîthie.

¹² Roria arîa onthe marî na mwîgatho na ûmagwîthie, na ûkinyange andû arîa aganu marî wa vau marî.

¹³ Mathike onthe mûtheturî, mavingîre onthe kwa arîa akuû.

¹⁴ Vîndî îo nîmakaamenya atî wî vinya, na atî nîwe mwene wavootanîre.

¹⁵ Rîu-î, ta roria nyamû îrîa îtagwa nguû, îrîa naûmbire rîrîa nakûûmbaga. Îrîcaga nyaki ta ng'ombe.

¹⁶ Taroria vinya îrîa îrî nayo kîûnûrî, na ûvoti ûrîa îrî naguo nyamarî cia îvu.

¹⁷ Mûkiia wayo ûmîte ta mûtî wa mûtarakwe, nga ciayo ciokothetwe ta mûkanda.

¹⁸ Mavîndî mayo maûmîte ta gîcango, njara na magûrû ciûmîte ta cuuma.

¹⁹ Nîyo ya magegania gatagatîrî ga ciûmbe ciakwa cionthe. Ûrîa wamîûmbire nwake ûmîvootaga.

²⁰ Îrîcaga tûrîmarî, kûrîa nyamû cionthe ciîkaraga.

²¹ Îmamaga rungu rwa mîtî ya mîgua, îkethitha ndomboyarî kûrîa kûrî mûthanje.

²² Mwîgunyîrî wa mîtî ya mîgua na wa mîtî îrîa îkûraga ndeererî cia rûnjî, nîkuo kîmamo Kîamyo.

²³ Taroria wana rûnjî rwecûra ndîvavûkaga, îthagîrwa îkirîrîtie wana rîrîa rûnjî rwa Njorodani rwecûra.

²⁴ Nû ûngîmîkunîka metho akînamînyita? Nû ûngîmîmunda îniûrû na mûtego.