Ayubu 4 - ÎVUKU RÎA ÛVORO MWARO

Mîario ya mbere

¹ Elifazi wa kuuma Temani nîwaûririe Ayubu atîrî,

² “Nwawîgue ûrî mûvîtîrie nîngîkwîra wanarî kiugo? Ndingîvota gûkira rîngî.

³ We nîûthomithîtie andû engî, na ûkaûmîrîria andû arîa matarî vinya.

⁴ Ciugo ciaku nîitirîrîte arîa magagîte, ûgatûma arîa matarî na vinya marûngame.

⁵ Nwatî rîu we wîthîrîtwe na thîna na ndûngîvota kûmîrîria, wî mûvutie nîguo na ûgetigîra.

⁶ We wîthîrîtwe wîtigîrîte Ngai na ûrî mwîvokeku, kwoguo wagîrîrwe nî kûgîa na vinya na kîîrîgîrîro.

⁷ Taririkana rîu, wone kana kûrî mûndû ûtarî mavîtia wanacûkangua, kana mûndû mûthingu aûragîtwe?

⁸ Nie nîmonete atî, arîa mavandaga mbeû ya maûndû macûku na waganu, nwacio makethaga.

⁹ Andû acio nîmathiragua viû nî mîvevû ya Ngai, amavûraga na marakara make akamathiria viû.

¹⁰ Arîa aganu mararamaga ta mûnyambû mwaganu. Nwatî ciugo ciao nîithiragua vinya.

¹¹ Ta ûrîa mûnyambû ûkucaga watura gîa kûrîa, andû arîa aganu makucaga nacio ciana ciao ikanyagania.

¹² “Mûthenya ûmwe nînarîrue nthithorî, naarîrue na kîvwe ûndû ndaavota kwîgua.

¹³ Ta ûrîa kîroto kîthînagia mûndû, mûgambo ûcio nîwandere toro.

¹⁴ Nînanyitirwe nî guoya na ngîtetema; mavîndî makwa monthe nîmaainainire.

¹⁵ Nînatemirwe nî karûvuvo ûthiû, njuîrî cia rûûo rwakwa ikîambarara.

¹⁶ Nînonire kîndû kîrûngamîte mbere yakwa, nakîroria ndiakîmenya waro. Nwa kîruru noonaga mbere yakwa; gwakirîte kivi, ngîcoka ngîgua mûgambo wauga atîrî:

¹⁷ Kûrî mûndû ûngîtuîka mwîvokeku mbere ya Ngai? Kûrî mûndû ûngîtuîka mûtheru mbere ya Ûrîa wamûmbire?

¹⁸ Ngai ndevokaga wana nginya ndungata ciake, na nîonaga araika ake magîka naaî.

¹⁹ Ûreciria nwa evoke andû maumîte mûtheturî wa yûmba, kîndû kiumanîte na rûkûngû, andû mangîtomborwa ta kîmburutia.

²⁰ Mûndû nwa ethîrwe arî mwoyo kîraûko, nwatî ivwaî igîkinya ethîrwe arî mûkuû na akariganîra.

²¹ Kîrîa kîonthe arî nakîo kîngîocwa, Agacokaga agakua ta kîrimû.”