Ayubu 39 - ÎVUKU RÎA ÛVORO MWARO

¹ “Nîwîcî rîrîa ngûrûngû iciaraga? Wanaroria nthwariga îgîciara?

² Nîwîcî ciîkaraga irî îvu îvinda rîgana atîa, na nîwîcî rîrîa igaciara?

³ “Nîwîcî rîrîa ciîthunanagîra igîciara, vîndî îrîa igûciara twori twacio?

⁴ Twori twacio tûkûragîra werûrî tûkaagîa vinya, tûtiganagîria ng'ina na tûticokaga rîngî.

⁵ “Nû warekererie nyûmbû? Nû wamîthaûrire akîmîrekereria?

⁶ Nie naiveere werû ûtuîke mûciî wacio, ngîiva vûrûri wa cumbî itûûrage kuo.

⁷ Ciîkaraga kûraca na înegena rîa matûûra, itiîgucaga mûgambo wa ûrîa ûrutaga wîra nacio.

⁸ Irimûnthaga tûrîmarî nîguo cione gîa kûrîa, igîcaria kîndû wa kîonthe kîrî nthî.

⁹ “Mbogo nwa îtîkîre gûkûrutîra wîra? Kana nwa îtîkîre kûraara rwagarî rwaku?

¹⁰ Nwa ûmîthaîke na mûkanda ûkarîme nayo, kana îgucie mûraû ûkîrîma?

¹¹ Nwa ûmîîvoke nîûndû atî îrî na vinya nyîngî, na ûmîtigîre wîra waku mûrito îkûrutîre?

¹² Nwa wîvoke mbogo îgûkethere ngano, na îkûvirîre cio îtîrirî?

¹³ “Mathagu ma nyaga mavavataga na mwîtîîo, nwatî ndîngîvota kûgûrûka ta ndiiû.

¹⁴ Nyaga îtiganagîria matumbî mayo mûtheturî, nîguo magwatue ûrugarî nî mûthetu,

¹⁵ îkariganîrwa atî nwa makinyangwe nî kîndû, kana makaûragwa nî nyamû cia kîthaka.

¹⁶ Îverithagia twana twayo takwa tûtarî twayo, wana ethîrwa wîra wayo nî wa mana, ndîmakaga.

¹⁷ Îîkaga ûguo nîûndû Ngai nîwamimire ûûgî, na ndaamîva ûmenyo.

¹⁸ Nwatî rîrîa yambîrîria kûvinyûra, nîîthekagîrîra mbarathi na ûrîa ûthiîcaga amîkarîrîte.

¹⁹ “Ayubu, nîwe ûvecaga mbarathi vinya? Na ûkamîkîra mûrera mûraca ngingo?

²⁰ Nîwe ûtûmaga mbarathi îrûgarûge ta ngige? Mûkunîrie wayo nîwakûmakania.

²¹ Îvuragia nthî na mavûngû na îgetîîa nî vinya wayo, na îkathiî mbaararî kûrûa na vinya wonthe.

²² Mbarathi îthekagîrîra guoya na ndîmakaga, ndîcokaga na vuva îkîûrîra mbaara.

²³ Indo cia mbaara cia andû arîa mekarîrîte mbarathi, iringanaga ikavenia nî riûa.

²⁴ Îvinyûraga mûno îkinainaga nî ûrûme, îregua karumbeta kagamba ndîngîrûngama.

²⁵ Rîrîa karumbeta kavuvwa, nîîraramaga; îrî kûraca nîîgucaga mbaara îkînunga, nîîgucaga anene a mbaara makîathana maugîrîrîtie.

²⁶ “Nîwe wonagia mvûngû kûgûrûka, na gûtambûrûkia mathagu mayo îthiîte mwena wa îveti?

²⁷ Nîwe wathaga nderi kîgûrûke, na gîgatuma kîomba gîa kîo kîrîmarî îgûrû?

²⁸ Kîîgî kîrûthaga gwa gûtûûra mathigarî marîa maraca, gîgatua mathiga marîa manene na maûgî kûndû gwa kwîgitîra.

²⁹ Gîîcaragîria gîa kûrîa kîrî kûu, kîonaga gîa kûrîa kîrî varaca.

³⁰ Tûcui twakîo tûnyunyaga nthakame, varîa kimba kîrî nîvo kîîgî kîthagîrwa kîrî.”