Ayubu 38 - ÎVUKU RÎA ÛVORO MWARO

Ngai Mûnene nîwacokerie Ayubu

¹ Nake Ngai-Mûnene arî kîvuvûkaniorî nîwacokerie Ayubu atîrî:

² “We wî û nîguo ûregane na kîrîra gîakwa? We ndûmenyaga ûrîa ûrauga.

³ Îyûmîrîrie ta mûndûmûrûme, nîngûkûria ciûria nawe ûnjokerie.

⁴ “Warî kû rîrîa narûthaga mîcingi ya nthî? Mbîîra ethîrwa ûrî na ûmenyo.

⁵ Nû watuire ûrîa nthî îkwîgana, nama nîwîcî! Nû wamîthimire na rûrigi akîmenya mwîgana wayo?

⁶ Itugî irîa inyitîrîrîte nthî ciîkarîrîte ndûî? Kana nû waigire îthiga rîayo rîa mûcingi,

⁷ rîrîa njata cia kîraûko ciainaga irî vamwe, na andû a Ngai makanîrîra nî gûkena?

⁸ Kana nû wavingîrîrie îria rîrîa rînene na mîrango, rîrîa manjî maativûkire kuuma kûrîa kûriku na makîaraga nthî?

⁹ Nînie nakunîkire îria ma matu, na ngîtûma rîrume nduma.

¹⁰ Nînekîrire îria mûvaka, na ngîrîvingîrîria na mîkîgo na mîrango;

¹¹ na ngîrîîra atîrî, ‘Ûyû nîguo mûthiia waku, ndûkavîtûke ava, makûmbî maku manene magakinyaga ava.’

¹² “Ayubu, kuuma rîrîa waciarirwe, wanathana ûkiuga gûkîe, kana wonereria ûtheri wa kîraûko varîa ûkumîrîra,

¹³ nîguo wîcûre mîthiia yonthe ya nthî, na ûtûme andû arîa aganu, maume kuo?

¹⁴ Nthî îgarûrûkaga na îkagîa na marangi ta ma ngoora, na îkagarûrûka ta ûrîa yûmba rîa mûmbi rîgarûrûkaga rîavûrwa mûvûri.

¹⁵ Nwatî andû arîa aganu nîmakaaimwa ûtheri wao, njara irîa ciîkaga maûndû macûku nîikaunangwa.

¹⁶ “Wî mûkinyu îriarî kûrîa kûtherûkaga manjî? Kana ûkathiîra nthî ya îria kûrîa kûrikîru?

¹⁷ Wanonua mûromo wa gîkuû, kana wona mîromo ya kwa arîa akuû?

¹⁸ Wanamenya ûrîa nthî îgana? Njokeria ethîrwa nîwîcî maûndû mama monthe.

¹⁹ “Nîwîcî njîra ya kûthiî kûrîa ûtheri umaga, kana kûrîa nduma îtûûraga?

²⁰ Nîguo ûmîvire gîkarorî Kîamyo, na ûmenye njîra ya kûthiî kuo.

²¹ We nîwîcî, nîûndû vîndî îo warî mûciare, na mîaka yaku nî mîîngî.

²² “Wanatonya makûmbîrî ma mbaravu, kana wona makûmbî ma mbura ya mbembe,

²³ irîa mbigîte nîûndû wa mavinda ma thîna, wana nîûndû wa mavinda ma mbaara?

²⁴ Njîra ya kûthiî kûrîa ûtheri ûgayanagîrua nî îrîkû, kana kûrîa rûkûngi rwa îrathîro rûnyaganagîrua nthî yonthe?

²⁵ “Nû watemere mbura ya kîvovoto mûtaro kûu îgûrû, na agîtemere ngwa njîra,

²⁶ nîguo mbura yure nthî kûrîa gûtatûûraga andû, na yure werûrî kûrîa gûtarî andû?

²⁷ Nîguo ûnyondore nthî îno nyûmagaru na nyondu manjî, na agîtûma îmere nyaki?

²⁸ “Mbura na îme irî îthe?

²⁹ Mbaravu yaumire îvurî rîa û? Nû waciarire mbaa?

³⁰ Manjî magwatanaga magekara ta îthiga, îgûrû rîa îria gûgakira mvevo mûno.

³¹ “Taroria îgûrû wone ikundi cia njata: Wavota kûnyitithania njata cia Kîrîmîra, kana ûthaûre njata cia Orioni?

³² Nwa ûvote gûtongoreria njata ciumîre îvinda rîacio rîakinya, kana ûtongorerie Ngatûnyi na ciana ciayo?

³³ Nîwîcî mawatho ma îgûrû? Mawatho mau nwa marûmîrîrwe gûkû nthî?

³⁴ “Nwa ugîrîrie mûgambo waku ûgakinya maturî, nîguo kuure mbura nyîngî na îgûkunîkîre?

³⁵ Nwa ûvote gûtûma mveni ivenie, nacio igakwîra tûrî ava?

³⁶ Nû waveere matu ûûgî; na akîva nundu ûmenyi?

³⁷ Nû wîna ûûgî wa kûmenya ûrîa matu megana? Na nû ûngîmenamania makauria mbura,

³⁸ nîguo îrinde rûkûngû rûrîa rûrî nthî, naguo mûthetu ûnyitane ûtuîke ndaka?

³⁹ “Nwa ûguîmîre mûnyambû gîa kûrîa, kana ûvaithie ciana ciaguo,

⁴⁰ rîrîa ciîthithîte ngurungarî, kana irî kîthakarî icemete?

⁴¹ Nû ûvecaga gîkûngûrû gîa kûrîa, rîrîa tûcui twakîo tûrarîrîra Ngai tûkîrûgarûgaga tûgîcaria gîa kûrîa?”