Ayubu 36 - ÎVUKU RÎA ÛVORO MWARO

¹ Elihu nîwathiîre na mbere kwaria na akiuga atîrî,

² “Eterera vanini na nîngûmwonia, nîrî na ûndû nîrenda kwaria vandûrî va Ngai.

³ Nîngûkwonia na njîra nyîngî ûrîa ûmenyo wakwa wîgana. Nîngûmwonia atî ûrîa wanyûmbire nî mûthingu.

⁴ Nîûndû ndiaragia maûndû ma maveeni, ûrîa ûrî na ûmenyo mûkinyanîru arî mbere yenyu.

⁵ “Taroria Ngai arî vinya, na ndairaga mûndû, arî vinya mwîngî mûno wa meciria.

⁶ Ndetîkagîra arîa aganu matûûra mwoyo, nwatî nîwonanagia kîvooto kûrî arîa athîni.

⁷ Ngai nîagitagîra arîa athingu, akametîkîria mekarîre itî cia ûthamaki, na agatûma mekare marî atîîe tene na tene.

⁸ Na mangîthîrwa movetwe na mvîngû, na methîrwe movetwe nî ndigi cia mathîna.

⁹ Ngai nîamonagia ciîko ciao njûku na akamonia atî o nî etîi.

¹⁰ Nîatûmaga mathikîrîrie mataaro make, na akathana matigane na waganu.

¹¹ Nao mangîathîkîra Ngai na mamûtungatîre, nî makarathimwa ûtûûrorî wao wonthe, na mîaka yonthe methagîrwe marî na gîkeno.

¹² Nwatî mangîkarega kûmwathîkîra, makaûragwa na rûviû, na magaakua nîûndû wa gûtura ûmenyo.

¹³ “Andû arîa matarî na ûngai, mendaga kûrakara, wana rîrîa makûverithua o mativoyaga ûtethio.

¹⁴ Makucaga wa marî ethî, na ûtûûro wao ûrîkagîrîria na gîconoko.

¹⁵ Nwatî Ngai nîavonokagia arîa avinyîrîrie, na njîra ya mathîna marîa moonaga. Atûmaga moone thîna nîguo mamwîgue.

¹⁶ Ngai nîwakûgucîrîrie agîkûruta thînarî, agîkûvira kûndû kwaro gûtarî ûgwati, na agîkwigîra irio irîa mbaro metharî.

¹⁷ “Nwatî we ûtuîrîrîtwe ciira ta wa mûndû mwaganu, ûtuîrîrîtwe na njîra ya kîvooto.

¹⁸ Îîmenyerere marakara maku matigatûme wîvie, kana wîngî wa mbeca cia gûgûkûûra ûkûvîtithie.

¹⁹ Wana warîra ûgîtagia ûtethio ndûgatetheka, vinya waku wonthe ndûngîgûtethia rîu.

²⁰ Ndûkerirîrie ûtukû ûkinye, rîrîa mavûrûri makaathira wa rîmwe.

²¹ Îmenyerere, ndûkagwe meviarî, nîûndû ûrathînîka ûguo nîguo ûûrîre mevia.

²² Taririkana ûnene wa Ngai na vinya wake, nî mwarimû ûrîkû mûnene kûmûkîra?

²³ Nû ûngîathîrîra Ngai ûrîa agwîka, kana ûngîmwîra atî nîekîte naaî?

²⁴ Ndûkariganîrwe nî gûkumia wîra wake, ûrîa andû mainaga magîûkumia.

²⁵ “Andû onthe nîmonete maûndû marîa Ngai ekîte, mamoonaga marî wa varaca.

²⁶ Ngai nî mûnene mûno na tûtingîvota kûmûmenya, kana tûmenya ûkûrû wake.

²⁷ Agucagia matata ma manjî kuuma nthî, akamagarûra magatuîka mbura.

²⁸ Atûmaga mbura yure kuuma matuurî îkaura mûno kûrî andû onthe.

²⁹ Kûrî mûndû ûmenyaga ûrîa matu matambaga, kana ûrîa ngwa îrurumaga kûu îgûrû kûrîa Ngai atûûraga.

³⁰ Atûmaga ûtheri wake ûnyagarûke îgûrû kuonthe, na agakunîkîra îria kûrîa kûrikîru.

³¹ Ûguo nîguo Ngai avecaga andû gîa kûrîa, avecaga andû irio cia kwîgana.

³² Anyitaga rûveni na njara yake, na agatûma rûvenie wa varîa akwenda.

³³ Ngwa nîîmenyithanagia rîrîa Ngai agûka, wana nyamû cia kîthakarî nîimenyaga agîûka.”