Ayubu 34 - ÎVUKU RÎA ÛVORO MWARO

¹ Elihu nîwathiîre na mbere kuga atîrî,

² “Thikîrîriani ciugo ciakwa mue andû aûgî, na mûnthikîrîrie mue imenyi;

³ nîûndû gûtû nîkuo kûthimaga ndeto, wata ûrîa rûrîmî rûcamaga irio.

⁴ Tigani tûthuure ûndû ûrîa mwaro, tigani tue ene tûtue ûndû ûrîa mwaro.

⁵ Ayubu augîte atîrî, ‘Nie ndirî na mavîtia, na Ngai nîmûreganu na kîvooto gîakwa.

⁶ Wana ethîrwa ndirî na mavîtia, nie nducagwa mûthaani; kîronda gîakwa gîtivoraga, wana ethîrwa ndirî mwîvia.’

⁷ Nî mûndû ûrîkû wîkariî ta Ayubu, ûrîa kûrî ke, kûnyûrûrania nîta kugia manjî ngûkû.

⁸ Athiîcanagia na andû arîa mekaga naaî, na agaceera na andû arîa aganu.

⁹ Augaga atî gûtirî ûndû mwaro oonaga, atî nîguo arûmîrîre wendi wa Ngai.

¹⁰ “Kwoguo ta nthikîrîriani mue arîa mûrî na mbuguîro, Ngai ndangîka ûndû macûku. Ngai mwene vinya wonthe ndangîka naaî.

¹¹ Ngai arîvaga mûndû kûringana na wîra wake, ekaga mûndû kûringana na mîtugo yake.

¹² Nîma Ngai ndangîka ûndû mûcûku; Ngai mwene vinya wonthe ndareganaga na kîvooto.

¹³ Nû waveere Ngai ûvoti wa kwatha nthî? Nû watuire Ngai mûnene wa nthî yonthe?

¹⁴ Ethîrwa Ngai nwa ecirie ke mwene; athengutia mîvevû yake gûkû nthî,

¹⁵ kîndû kîonthe kîrî mwoyo nîkwa kîngîkua, na mûndû agacoka rûkûngûrî.

¹⁶ “Ethîrwa ûrî na ûmenyo, tathikîrîria ûrîa nguuga.

¹⁷ Mûndû ûrîa ûthwîre kîvooto nwa aathane? Nwa ûtûîre ûrîa mûthingu na ûrî vinya?

¹⁸ Ûrîa wîraga mûthamaki, ‘We ndûrî vata,’ na akeera aathani ‘Mûrî aganu.’

¹⁹ Ndonanagia kîmenyano kûrî anene, ndarûmbûyanagia na itonga gûkîra athîni, nîûndû onthe maûmbirwe nîke.

²⁰ O makucaga wa rîmwe, mainainagua ûtukû gatagatî makînakua. Arîa marî vinya, amathengutagia atagûtûmîra vinya wa mûndû.

²¹ “Metho make maroragia mîthiîre ya andû, na nîonaga mîthiîre yao yonthe.

²² Gûtirî nduma îngîtumana, ûndû Ngai atangîona andû arîa evia.

²³ Ngai ndamenyithagia mûndû, vîndî îrîa akaathiî kûmûcirithia.

²⁴ Aunangaga arîa marî vinya wana atamatuîrîtie, na îthenya rîao akathuura andû engî.

²⁵ Na nîûndû Ngai nîecî ciîko ciao, nîamacunaga wathani ûtukû na akamacûkangia.

²⁶ Amaverithagia nîûndû wa mavîtia mao, andû onthe makîonaga,

²⁷ nîûndû nîmatigîte kûmûrûmîrîra, na makaregana na watho wake.

²⁸ Kwoguo nîmaatûmire arîa athîni makaîra Ngai, nake Ngai nîweguire kîrîro Kîam arîa maavinyîrîrîtue.

²⁹ Ngai angîkira arege gwîka wanarî ûndû, nîûrîkû ûngîmûtuîra ciira? Angîthitha ûthiû wake, nû ûngîvota kûmwona,

³⁰ wana ethîrwa nî vûrûri kana nî mûndû; ekaga guo nîguo mûndû mwaganu ndakathane.

³¹ “Kûrî mûndû wîrîte Ngai, ‘Nînjîvîtie nwatî ndikevia rîngî.’

³² Monia mavîtia marîa ndavotaga kwona, ethîrwa nîmbîkîte maûndû macûku ndikameka rîngî.

³³ Ngai nwa akûverithie ûrîa we ûkwenda? Îtua nî rîaku, tî rîakwa; kwoguo uga ûrîa ûreciria.

³⁴ Andû arîa marî na ûmenyo; na andû aûgî arîa mambîgucaga maugaga atî,

³⁵ ‘Ayubu aragia atarî na ûmenyo, aragia maûndû matarî gîtûmi.’

³⁶ Narî kethîrwa Ayubu nwa acirithue viû, nîûndû ethîrîtwe akîaria ta andû aganu!

³⁷ Ke nî mwîvia na nî mûremi, nîaretaga kanya gatagatîrî getû, na akaria maûndû ma kûmenereria Ngai atagûtigithîrîria.”