Ayubu 31 - ÎVUKU RÎA ÛVORO MWARO

¹ Nie mwene nînîvîtîte atî, ndikaroria mwîrîtu nîmwîrirîria.

² Nîndûî mbetererete kuuma kûrî Ngai ûrîa ûrî îgûrû? Nîndûî ngagaa kuuma kûrî Ngai mwene vinya wonthe ûrîa ûrî îgûrû?

³ Na kinthî mûtino ndûnyitaga arîa matarî athingu, naguo mûthiro ûkanyita arîa aganu?

⁴ Ngai nîecî njîra ciakwa, na akamenya ciîko ciakwa cionthe.

⁵ Ethîrwa ndûûraga mvenanagia, na mvinyûraga kwaria ûthani;

⁶ Ngai nîanthime na kîthimi kîrîa Kîamgîrîru, na nîakwona atî nie ndirî na mavîtia.

⁷ Ethîrwa nînyumîte njîrarî îrîa ya ma, na ngoro yakwa îkerirîria maûndû marîa monaga, na ethîrwa njara ciakwa irî na gîko nîûndû wa mevia;

⁸ nthithina yakwa îrorîwa nî mûndû wîngî, na kîrîa ngûragia mûgûndarî gîkûûrwe.

⁹ Ethîrwa ngoro yakwa nîngucîrîrie kûrî mûndûmûka wene, na ngekara mûromorî wa nyomba yake nîmwetererete;

¹⁰ mûka wakwa nîarugagîre mûndûmûrûme wîngî, na arûme engî mamame nake.

¹¹ Kwîrirîria kûmenyana kîîmwîrî na mûka wene nî kuna watho, nî wîvia mûndû agîrîrwe nî kûverithua na kûûragwa.

¹² Wîvia ûcio ûvana ta mwaki ûrîa ûvîvagia ûkathiria, na nwa ûvîvie indo cionthe ciakwa.

¹³ Ethîrwa nîndegete kûthikîrîria mateta ma ndungata yakwa ya mûndûmûrûme kana ya mûndûmûka, rîrîa maaretire mateta mao kûrî nie,

¹⁴ rîrîa Ngai agaûka kûnduîra ngeka atîa? Rîrîa Ngai akanjirithia ngamûcokeria atîa?

¹⁵ Kinthî Ngai ûrîa wanyûmbire twake waûmbire ndungata ciakwa? Kinthî tuonthe tûtiaûmbirwe nî Ngai ûmwe?

¹⁶ Nie ndianaima mûthîni kîndû, kana ndûma aka a ndigwa mata mwîvoko.

¹⁷ Ndianarîa irio ciakwa nî nienga; na ndianarega kûgaana na ciana cia ngoriai;

¹⁸ Nîûndû ûtûûrorî wakwa wonthe mbîthîrîtwe ngîmarera nîrî ta îthe, Kuuma nîrî mwana mbîthîrîtwe ngîmenyerera aka a ndigwa.

¹⁹ Rîrîa nona mûndû agîkua nîûndû wa gûtura nguo, kana mûthîni atarî na nguo ya gwîkîra;

²⁰ ngîrega kûmûva nguo ya gwîkîra athirwe nî mvevo, nake nîandigagîra kîrathimo agacokia ngatho na ngoro.

²¹ Ndianatûmîra vinya wakwa kûverithia mwana wa ndigwa, nîûndû atî atongoria a îtûûra marî mwena wakwa.

²² Ethîrwa naneka guo, njara yakwa irounîkanga; yunîkîre wa vau gîturo.

²³ Nîûndû nînetigagîra kûverithua nî Ngai, ndingîekire ûndû ta ûcio.

²⁴ Nie ndianevoka thaavu, kana mbiga ngoro yakwa kûrî thaavu ntherie.

²⁵ Ndianakena nîûndû nîrî na ûtonga mwîngî, kana nîtîîa nîûndû nînjarîtie indo nyîngî.

²⁶ Nîngîroria riûa nîûndû wa ûkengu warîo, kana mweri nîûndû wa ûthaka waguo;

²⁷ na ngoro yakwa îgucîrîrue nîguo nîigooce; na nîciînamîrîre nîive gîtîîo ta irî Ngai,

²⁸ ûcio wanaguo nî wîvia wa gûtuîrwa kûragwa, nîûndû nîngîthîrwa ndarî mwîvokeku kûrî Ngai ûrîa ûrî îgûrû.

²⁹ Nie ndianakena nîûndû wa gûcûkangua kwa nthû ciakwa; kana ngena manyitwa nî mathîna.

³⁰ Nie ndianatûma kanyua gakwa kevie, na njîra ya kûmûruma kîrumi nîguo akue.

³¹ Andû onthe arîa mandungataga nîmaicî waro atî, nînyamûkagîra ageni na ngamatuga.

³² Ndianarekia ageni maraara nja, nînyitaga evîtûkîri ûgeni gwakwa mûciî.

³³ Andû amwe nîmathithaga mevia mao, nwatî nie ndianathitha mevia makwa.

³⁴ Ndianegua guoya ngîrûngama mbere ya mwîngî, ndianakira kana nîvingîra nyomba, ngîîtigîra kûnyararwa na kûthirîkua nî andû.

³⁵ Naarî kethîrwa nîrî na mûndû wa kûnthikîrîria! Nînevîta atî maûndû marîa mbarîtie nî ma ma, Ngai mwene vinya nîanjokerie! Naarî kethîrwa maûndû marîa nthitangîtwe namo nî nthû ciakwa nîmandîke!

³⁶ Nama nwa nîmakuue na gîturo; Na nîmekîre kîongo ta nthûmbî.

³⁷ Nwa mbîîre Ngai maûndû monthe marîa mbîkîte, na nthiî kûrî ke ta mwana wa mûthamaki.

³⁸ Ethîrwa nîkwa mbîîte mûgûnda ûrîa nîmaga, na ngaûcuuna arîa ene guo,

³⁹ na ethîrwa nîndîte irio ciaguo ndakûrîva, na nîndûmîte ene guo makue nî yûra;

⁴⁰ mîgûnda îo îrokûra mîgua vandû va ngano, na îmere ria vandû va cairi. Ciugo cia Ayubu nîciathira.