Ayubu 30 - ÎVUKU RÎA ÛVORO MWARO

¹ Nwatî rîu andû nîkwa maranyûrûria, andû arîa anini kûngîra arîa nonaga methe mao matarî agîrîru, a kûroria ngui irîa irangagîra ndîthia yakwa.

² Nî ûtethio ûrîkû nîngîona kuuma kûrî andû ta aya, andû maathirirwe nî vinya?

³ Maathînire na makîvûtîra werûrî, mathiûrûrûkaga magîcaria gîa kûrîa werûrî, kûndû kûmû gûtarî na gîa kûrîa.

⁴ Maakûrire mîmera kîthakarî na makîava manyenyi werûrî makîrîa, maarîre nginya mîri ya mûtî ûtarî mûcamo.

⁵ Nîmeengatirwe makiuma gatagatîrî ka andû; maaugagîrîrua nî andû ta aîi.

⁶ Nwanginya mangîathiîre kwîthitha ngurungarî, marimarî marîa menjîtwe nthî na mathigarî.

⁷ Maagambaga ta nyamû marî kûu kîthakarî; maacokanagîrîra vamwe rungu rwa mîtî ya mîgua.

⁸ Andû maarî aritu na matecîkene, maarutûrûrirwe vûrûrirî ûcio na mûcarica.

⁹ Rîu nduîkîte rwîmbo rwao, nduîkîte kîndû gîa kûthekererwa.

¹⁰ Nîmamenete na matiendaga kûmona, rîrîa maamona tu, maminjaga mînyîrî.

¹¹ Nîûndû Ngai nîanthirîtie vinya ngaremwa nî kwîgitîra, marî na wîyathi wa kûmbîka wa ûrîa makwenda.

¹² Andû engî nîmageragia kûntharîkîra; nîmageragia kûndega nîguo ngwe; mantharîkagîra nîguo manthirie.

¹³ Andû acio nîmavingîte njîra yakwa, na mageragia ûrîa nîngînyitwa nî mûthiro nthire viû, na nîmaicî gûtirî mûndû ûngîndethia.

¹⁴ Maûkaga mavîtûkîrîrîte mwanyarî wa rûthingo, mantharîkagîra matagûtigithîrîria.

¹⁵ Nyitîtwe nî guoya nyîngî, gîtîîo gîakwa kîthirîte takwa kîgûrûkîtue nî rûkûngi; na mwîvoko wakwa wa kûvonoka ûvîtûkîte ta îtu.

¹⁶ Rîu nie nîrî vakuvî gûkua, vîndî cionthe ndûûraga na mathîna.

¹⁷ Ndaraga ngîkandûkwa nî mavîndî ûrûrû ûnduraga ûtakûthira.

¹⁸ Ngai anyitaga ngingo na vinya, aanyitanagîria na kara ya nguo yakwa.

¹⁹ Ambikîtie ndakarî, ngekara ta rûkûngû na mûu.

²⁰ We Ngai, ngûkayagîra ûkangirîra, ngûvoyaga na ndûnthikagîrîria.

²¹ Nîûmbaganîrîte mûno, ûnyarirîte na vinya waku wonthe.

²² Ûmbikagia kûrîa kûrî na rûvuvo rûkamvuruta, ûmbikagia ava na vaarîa kûu rûkûngi rûnene.

²³ Nîmbicî atî ûmvirîte gîkuûrî, kûrîa andû arîa marî mwoyo mathiîcaga.

²⁴ Kinthî mûndû arî mathînarî ndaûkagîrîria njara? Kinthî mûndû arî na thîna ndavoyaga ûtethio?

²⁵ Kinthî ndiarîrire nîûndû wa arîa maarî mathînarî? Kinthî ndiacaîre athîni?

²⁶ Nwatî rîrîa nerîgîrîra maûndû maro, monaga marîa macûku. Na rîrîa nerîgîrîra ûtheri, monaga nduma.

²⁷ Nîregua ndangîkîte mûno ngororî na ndirî na thayû, nînginyîrîtwe nî mavinda ma mînyamaaro.

²⁸ Nthiîcaga nthitîte kîthithi, na ndakwona riûa, nûngamaga mwîngîrî, na ngamakaîra mandethie.

²⁹ Mbîthîrîtwe ngîkaya nîrî na kîeva ta ciathi; wana ndirî ngûrani na nyaga.

³⁰ Ngothi yakwa ya mwîrî irîte na îkambîrîria kwomboka, na mavîndî makwa makavîa nî ûrugarî.

³¹ Kînanda gîakwa rîu kinaga nyîmbo cia macakaya, na mîtûrirû yakwa îkaina nyîmbo cia kîeva.