Ayubu 3 - ÎVUKU RÎA ÛVORO MWARO

Ayubu nîwatetirie Ngai.

¹ Vuva wa maûndû mau, Ayubu nîwatumûrire kanyua na akîruma mûthenya ûrîa aaciarirwe.

² Aaugire atîrî,

³ “Kûgwatwa nî kîrumi nî mûthenya ûrîa naciarirwe, na ûtukû ûrîa nyanya aagîre îvu rîa kûnjiara.

⁴ Mûthenya ûcio ûrotuîka nduma, we Ngai ûroriganîrwa, ndûkareke ûtheri ware mûthenya ûcio.

⁵ Mûthenya ûcio nîwîcûrwe nî kîeva na nduma nene; ûrotûûra ûkunîkîrîtwe nî matu, ûtheri waguo ûrokunîkîrwa nî nduma nene.

⁶ Ûtukû ûcio ûrokunîkîrwa nî nduma nene! Ndûgatarwe mîthenya ya mwaka îgîtarwa, wana ndûgatarwe mîthenya ya mweri îgîtarwa.

⁷ Nama ûtukû ûcio ûrotuîka nthata, na ûtukû ûcio ndûkaugwe ngemi.

⁸ Mûthenya ûcio ûrorumwa nî mûndû mûgo, nîo marî na wara wa kûramûkia Leviathani.

⁹ Njata îrîa yumaga gûgîkîa nî yûrîre, nîîkare yetererete ûtheri nwatî ndîkaawona, wana ndîkoona mîrûri ya riûa rîkîratha.

¹⁰ Ûtukû ûcio ndwavinga nda ya nyanya, na ndwagiria mona thîna na kîeva.

¹¹ “Naregire gûkuîra îvurî rîa nyanya nîkî, kana ngue ngîciarwa?

¹² Nyanya aanyamûkîre naciarwa nîkî? Aanyongirie nyondo ciake nîkî?

¹³ Nîngîakuire vîndî îo nîngîvurûkîte, nîngîakwire vîndî îo ndingîrî kwaria,

¹⁴ vamwe na athamaki na anene a nthî, arîa maatumire rîngî nyomba cia athamaki cia tene.

¹⁵ Nîngîamamire vamwe na anene arîa maarî na thaavu, arîa mecûrîtie nyomba ciao na sîlûva.

¹⁶ Wana nîkava nîngîavunirwe, îni, ngathikwa nîrî kîmonje.

¹⁷ Kûu mbîrîrarî akuû matithînagia andû, nîkuo arîa anogu mavurûkaga.

¹⁸ Mbîrîrarî nîkuo mîgwate îthagîrwa îvurûkîte, kûu matigûkagua kana mathwa na vinya.

¹⁹ Andû onthe, athîni wana arîa marî îgweta methagîrwa mbîrîrarî, wana ngombo nîitigaga kwathwa nî mûciathi.

²⁰ “Ngai atûmaga andû arîa marî na mathîna matûûra nîkî? Etîkagîra arîa marî na ûrûrû wa ngoro matûûra nîkî?

²¹ O meriragîria gîkuû nwatî gîtiûkaga, magîcaragia gûkîra ûrîa macaragia mûthithû.

²² O makenaga magacanjamûka, wana makegua waro mathikwa.

²³ Mûndû ûrîa ûtangîona njîra aragîrwa nî ûtheri nîkî, Ngai atûmaga atûûre mwoyo nîkî.

²⁴ Gûcaa gwakwa gûtuîkîte ta irio ciakwa, njaaga ndagûtigithîrîria ta manjî magîtîka.

²⁵ Maûndû marîa nîtigagîra nîmo monaga, ûndû ûrîa ûmakagia nîguo ûnginyagîra.

²⁶ Nie ndionga thayû na ndikiragîrîria, ndivurûkaga na mathîna makwa matithiraga.”