Ayubu 29 - ÎVUKU RÎA ÛVORO MWARO

Mîario ya Ayubu ya mûthiia

¹ Nake Ayubu nîwambîrîrie kwaria rîngî akiuga atîrî, Ayubu

² Naarî kethîrwa nwa mbîkare ta tene, vîndî îrîa Ngai aamenyagîrîra.

³ Vîndî îrîa taa yake yakanaga îgûrû rîa kîongo gîakwa, ngîthiîra ndumarî ûtheri wake nîwamûrîkagîra.

⁴ Vîndî îo nîneganîrîte ûtûûrorî, na Ngai aarî mûrata wa mûciî wakwa.

⁵ Ngai mwene vinya wonthe eekaranagia nanie, na ciana ciakwa nîciandigicîrîtie.

⁶ Vîndî îo mbûri na ng'ombe ciakwa ciarî na îriia rîngî mûno, maguta kuuma mîtîrî yakwa ya mîtamaiyû maanyûrûrûkaga ta rûnjî.

⁷ Rîrîa nathiîre kûrîa athuuri a îtûûra macemanagia, na ngîkarîra gîtî gîakwa mûcemaniorî;

⁸ andû ethî nîmaamonire na makîthenguta vo, nao athuuri makîrûngama nîguo mamve gîtîîo.

⁹ Anene nîmaatigire kwaria, na magîkunîka tûnyua twao na njara.

¹⁰ Andû arîa marî îgweta nîmaakirire, na magîtiga kwaria.

¹¹ Mûndû ûrîa wegucaga ngîaria nîwangumagia, na ûrîa wamonaga, nîwetîkagia maûndû mau.

¹² Nîûndû athîni mangaîra nînamatethirie, na ngîtethia ûrîa ûtaarî na îthe wa kûmûtethia.

¹³ Arîa maarî vakuvî gûkua nîmaandathimire, nînatûmire mûndûmûka wa ndigwa ecûrwe nî gîkeno.

¹⁴ Nekagîra ûthingu ta nguo, kwonania kîvooto kwarî ta gwîkîra nguo ndaca na gwîkîra kîremba.

¹⁵ Nînie naarî metho ma atumumu, na magûrû ma cionje.

¹⁶ Nie naarî îthe wa athîni, na nînarûmbûyania na maciira ma andû arîa ndaicî.

¹⁷ Nînathiririe andû arîa aganu vinya, na ngîtethûra arîa maanyitîtwe nîo.

¹⁸ Nînacokire ngîîra atîrî: Nîndûûra mîaka mîngî, na ngakuîra gwakwa nyomba mvurûkîte.

¹⁹ Mbîkariî ta mûtî ûrîa ûtambagia mîri manjîrî, wîthagîrwa na îme mvûarî ciaguo ûtukû wonthe.

²⁰ Andû onthe matûûraga mangumagia, na gûtirî vîndî nanathirwa nî vinya.

²¹ Vîndî îo andû maakiraga kivi, na makathikîrîria ûrîa ngûmataara.

²² Narîkia kwaria matiacokaga kwaria rîngî, maatonyagwa nî ciugo ciakwa ta matata ma mbura.

²³ Maambetagîrîra ta ûrîa metagîrîra mbura, ta ûrîa mûrîmi etagîrîra mbura ya mwere.

²⁴ Rîrîa namathekia matietîkagia, gûcanjamûka gwakwa nî kwamekîre vinya.

²⁵ Namatongorerie ngîmonia njîra; natûûranagia nao ta mûthamaki arî gatagatî ka athigari; ta mûndû ûkûmîrîria arîa maracakaya.