Ayubu 28 - ÎVUKU RÎA ÛVORO MWARO

Gûkumia ûûgî

¹ Nama kûrî kûndû gwa kwînja sîlûva, na gwa kûthereria thaavu.

² Andû menjaga cuuma nthî, na makararûra cuuma ya gîcango mathigarî.

³ Enji a cuuma nîmakuuaga taa, makenja nthî kûndû kîrikîru mûno; magîcaria mathiga kûu ndumarî.

⁴ Andû menjaga marima kûrîa gûtatûûragwa, kûraca mûno kûrîa andû matangîkinya; meyovagîrîra mîkanda ya kûmatonyia na kûmaruta ndarî.

⁵ Irio ikûraga mûtheturî, nwatî rungu rwa mûthetu indo cionthe ciuruganagua nî mwaki.

⁶ Mathiga mayo kuumaga tûthiga twa rangi wa vururu, na rûkûngû rwayo rwîthagîrwa na thaavu.

⁷ Gûtirî gîconi kîrîcaga nyama gîcî njîra ya kûthiî mîthimarî îo, na gûtirî rwîgî rwanamîona.

⁸ Gûtirî nyamû ya kîthaka mbaganu yanakinya njîrarî îo, wana mûnyambû ndwanamîthiîra.

⁹ Andû menjaga mathiga marîa maûmû mûno, menjaga nginya rungu rwa irîma.

¹⁰ Atûrîkagia mîtaro mathigarî marîa manene, na akona mathiga ma goro.

¹¹ Avingagîrîria matherûkîro ma manjî matikaume, na akathikûria kîndû kîrîa kîthithe gîkoneka.

¹² “Nwatî ûûgî ûngîoneka kû? Ûtaûku ûngiuma kû?

¹³ Gûtirî mûndû wîcî thogora wa ûûgî, na ndûngîoneka nthî kûrî andû arîa marî mwoyo.

¹⁴ Kûrîa kûrikîru mûno kugaga, ‘Ûûgî ndûrî gwakwa’ narîo îria rîkauga, ‘Ûûgî ndûrî gwakwa.’

¹⁵ Ûûgî ndûngîgûrwa na thaavu, na gûtirî ûrito wa sîlûva ûngîgananua naguo.

¹⁶ Ûrî goro gûkîra thaavu ya Ofiri, na gûkîra mathaga ma goro.

¹⁷ Thaavu kana gîcicio itingîgananua na ûûgî, na ndûngîkûrananua na mathaga ma thaavu ntheri.

¹⁸ Ûûgî ûrî goro gûkîra mathiga monthe ma goro, thogora wa guo ûkîrîte ruru îrîa ndune.

¹⁹ Mathiga ma goro kuuma Ethiopia matingîringithanua na ûûgî, kana thogora wayo ûringithanue na wa thaavu ntheri.

²⁰ Kwoguo vi ûûgî umaga kû? Naguo ûtaûku ûngîoneka kû?

²¹ Nîmûthithe ciûmbe cionthe irî mwoyo, na iconi cia rîerarî itingîwona.

²² Îcua na gîkuû ciugaga atî, ‘nîtwîgucaga ndeto itarî nginyanîru cia ûûgî ikîarua.’

²³ “Ngai tu nîke wîcî njîra ya ûûgî, nîke wîcî kûrîa uumaga.

²⁴ Nîûndû ke onaga nginya mûthiia wa nthî, na akona kîndû kîonthe kîrîa kîrî gûkû nthî.

²⁵ Rîrîa Ngai aaveere rûkûngi vinya wa ruo, na akîthima mîvaka ya maria;

²⁶ rîrîa aatuire kûrîa mbura îkauraga, na kûrîa ngwa na mveni ikaavîtûkagîrîra;

²⁷ nîrîo oonire ûûgî na akîwanîrîra; nîwaûtuîririe na akîona ûrî mwagîrîru.”

²⁸ Ngai nîwacokire akîîra mûndû atîrî, “Taroria! Gwîtigîra Ngai nîguo ûûgî, na kwîthema waganu nîguo ûmenyo.”