Ayubu 27 - ÎVUKU RÎA ÛVORO MWARO

¹ Ayubu nîwathiîre na mbere kwaria na akiuga atîrî:

² Nîrevîta na Ngai ûrîa ûtûûraga mwoyo na ûrîa ûnyimîte kîvooto, na Ngai mwene vinya wonthe ûrîa ûtûmîte mbîthîrwa na ruuo ngoro!

³ Rîrîa rîonthe ngwîthîrwa nîrî mwoyo, na roho wa Ngai arî ndaarî yakwa;

⁴ mîromo yakwa ndîkaaria ûthaani, kana rûrîmî rwakwa rwarie maveeni.

⁵ Gûtirî vîndî ngaauga atî mwaragia ûûma, nîndûûra ndarî na mavîtia nginya rîrîa ngaakua.

⁶ Nîndûûra nîkindîrîtie ûthingurî wakwa na ndigaûtiganîria. Mavinda monthe thamiri yakwa îthagîrwa îrî ntheru.

⁷ Nthû yakwa îroverithua ta mûndû mwaganu, na ûrîa ûmbûkagîrîra aroverithua ta mûndû ûtarî mûthingu.

⁸ Mûndû ûrîa ûtaicî Ngai ethagîrwa na kîîrîgîrîro kîrîkû rîrîa Ngai amûtiganîria, rîrîa Ngai ooca mwoyo wake?

⁹ Rîrîa akaanyitwa nî thîna, Ngai nîakaathikîrîra kîrîro gîake?

¹⁰ Mûndû mwaganu ndangîkena arî mbere ya Ngai mwene vinya wonthe; ndangîvota gûtûûra avoyaga Ngai.

¹¹ Nîngûmûthomithia maûndû marîa Ngai ekaga, ndingîmûthitha mîvango ya Ngai mwene vinya wonthe.

¹² Nwatî gûtirî ûndû mûtonete! Nîndûî vi kîratûma mwarie tûkûtûkû?

¹³ Ûguo nîguo Ngai akaaverithia andû arîa aganu, na nîrîo îgai rîa arîa mavinyanagîrîria kuuma kûrî Ngai mwene vinya wonthe.

¹⁴ Wana ethîrwa arî na ciana nyîngî cionthe ikaûragîrwa mbaararî, na njiarwa ciake igatûûraga na yûra.

¹⁵ Arîa magaatigara makathirua nî mûrimû, na aka ao a ndigwa matikaamacakaîra.

¹⁶ Wana ethîrwa arî na sîlûva ta mûthanga, na ethîrwe na nguo nyîngî ta mûthetu;

¹⁷ andû arîa athingu nîo mageekîra nguo icio ciake, nao arîa evokeku magaane sîlûva yake.

¹⁸ Mûndû ûcio mwaganu atumaga nyomba ta ya mbûmbûî. Kana ta gîtara Kîam mûriri wa mûgûnda.

¹⁹ Athiîcaga kûmama arî gîtonga, nwatî nî riita rîa mûthiia, aramûka kîraûko akethîrwa atarî kîndû.

²⁰ Guoya ûmûthithûkagîra ta mwîcûro wa manjî, na ûtukû agakuua nî rûkûngi rûnene.

²¹ Rûkûngi rwa mwena wa îrathîro rûmûkuuaga akaûrîra, rûmûvataga akathengutua gîkarorî gîake.

²² Ageragia na njîra wa yonthe gwîtethûra kûrî ruo, nwatî rûmûvurutaga rûtarî na ntha.

²³ Rûkûngi rûmûthekagîrîra rîrîa avinyûrîte, na rûkamûnyûrûragia rûrî varîa rûrî.