Ayubu 26 - ÎVUKU RÎA ÛVORO MWARO

¹ Nake Ayubu nîwacokirie atîrî,

² Nama we ndûtuîkîte ûtethio kûrî ûrîa ûtarî na ûvoti! Nîûvonoketie ûrîa ûtarî na vinya!

³ We nîwataarire ûrîa ûtarî na ûûgî, na ûkîmûtanavîra na ûmenyo waku!

⁴ Nî ûrîkû ûkûvotithîtie kwaria maûndû mau, nû ûgwîkîîre vinya wa kwaria ûguo? [Bilidadi]

⁵ Kwa arîa akuû nîkûratetema, Manjî marîa marî rungu rwa nthî na atûûri kuo nîmaregua guoya.

⁶ Kwa arîa akuû kwîthîrîtwe kûrî njaga mbere ya Ngai, îrima rîrîa rîtarî mûthiia rîtirî na kîndû gîa kûrîkunîkîra.

⁷ Ngai atambarûkîtie rûgûrû kûndû gûtarî kîndû, na agacuuria nthî vandû vatarî kîndû.

⁸ Ngai nîke wîcûragia matu ma mbura manjî, na akagiria matûrîke maritûva.

⁹ Akunîkagîra mweri, na agatambûrûkia îtu îgûrû rîaguo.

¹⁰ Acorete kîthiûrûrû îgûrû rîa îria, nîguo kîgaanie ûtheri na ndûma.

¹¹ Itugî irîa inyitîrîrîte îgûrû nîcinainaga, na igatetema rîrîa Ngai aigûkia.

¹² Vinya wake nîwavorerie îria, na ûmenyo wake nîwacûkangirie njûnamatu îrîa îtagwa Rahabu.

¹³ Nîwatheririe îgûrû na mîruke yake, na vinya wake nîwaûragire njoka îrîa yaûraga.

¹⁴ Nwatî mau nî maûndû manini ma kwonania ûvoti wake, nî kamûgambo gaceke gake tu twîguîte. Nû ûngîmenya ûnene na vinya yake?