Ayubu 24 - ÎVUKU RÎA ÛVORO MWARO

¹ Ngai mwene vinya wonthe aregaga kwiga mavinda ma gûtucanîra ciira nîkî? Arîa mamwîcî maregaga kwona agîtuîra evia nîkî?

² Andû nîmakûraga mathiga ma mîkûmbû ya mîgûnda, nîmaîaga ng'ondu na makairîthia vamwe na ciao.

³ Macunaga ciana cia ndigwa mvuda ciao, mocaga ndegwa ya mûndûmûka wa ndigwa nginya rîrîa akarîva thirî wake.

⁴ Magiragîrîria ngîa inyita ivooto ciao, na magatûma athîni onthe methithe.

⁵ Kwoguo, ta ûrîa nyûmbû ciûrûraga werûrî îgîcaria gîa kûrîa, nwata guo athîni maûrûraga werûrî magîcaria gîa kûrîa, gûtirî kûndû kwîngî mangîonera ciana ciao gîa kûrîa.

⁶ Makethaga matigari mîgûndarî yene, mocanagia thavibu kuuma mîgûndarî ya andû arîa aganu.

⁷ Ûtukû wonthe mararaga matarî na gîa kwîguîka, vîndî ya mvevo matirî nguo cia gwîkîra.

⁸ Maconjagwa nî mbura îrîa yuraga irîmarî, metiranagia na mathiga nîguo meyûge mbura.

⁹ Marutaga ciana cia ndigwa nyondorî cia ng'ina, na magoca ciana cia ngîa nginya rîrîa makaarîvwa thirî.

¹⁰ Athîni maûrûraga marî njaga, matirî nguo; na makethaga ngano mavûtiî.

¹¹ Mavivagîra andû arîa aganu maguta ma ndamaiyû, na makamakamûrîra ndivei nwatî matingîmîkunda.

¹² Na kûu matûûrarî kûrî na mûcayo wa arîa marakua, na arîa agurarie nîmarakaa makîenda ûtethio, nwatî Ngai ndathikagîrîria mavoya mao.

¹³ Kûrî na andû mareganaga na ûtheri, matingîimenya njîra ciaguo, wana matiirûmagîrîra.

¹⁴ Mûragani aramûkaga macangîa, nîguo akaûrage athîni na ngîa; na gwatuka akathiî kwîa.

¹⁵ Kîtharia gîetagîrîra kûgîe na rûkurerema, kiugaga gûtirî mûndû ûgûkîona, gîîkunîkaga ûthiû nîguo gîtikamenywe.

¹⁶ Aîi mavunjaga nyomba ûtukû, na mûthenya makevingîra nyomba, matiumagîra ûtherirî.

¹⁷ Rîrîa kûrî na nduma nene, kûrî o nî ta kîraûko, o nîmaamenyanîrie na maûndû macûku marîa mekîkaga ûtukû. [Zofari]

¹⁸ Nwatî mugaga atîrî, “Andû arîa aganu makuuagwa na îvenya nî mwîcûro wa manjî, mîgûnda yao îthagîrwa îrî mîrume nî Ngai, matithiîcaga kûruta wîra mîgûndarî yao ya mîthavibu.

¹⁹ Wata ûrîa mbaravu îrarûkaga rîrîa kûrî na riûa na ûrugarî, nwata guo evia mameragua nî kwa arîa akuû.

²⁰ Aciari ao nîmariganagîrwa nîo, na gûtirî mûndû ûkamaririkana rîngî, macûkangagua ta mûtî ûgwîte.

²¹ “Nîmavinyagîrîria aka arîa nthata, na matiîkaga aka a ndigwa maûndû maro.

²² Ngai, na vinya wake nîacûkangagia arîa marî vinya; arûngamaga nao magata kîîrîgîrîro gîa ûtûûro.

²³ Atûmaga arîa aganu mone marî agitîre, nwatî ekaraga aroretie mîthiîre yao.

²⁴ Andû arîa aganu moonaga mûnyaka kavinda kanini, mavovaga magetîka ta mathangû, matinagua ta igira cia ngano.

²⁵ Nîûrîkû ûngîonania atî nîrî mûthaani, na onanie atî ûguo mbugîte tî ûvoro wama.”