Ayubu 23 - ÎVUKU RÎA ÛVORO MWARO

¹ Ayubu nîwacokirie atîrî:

² Wana ûmûnthî mateta makwa nî marûrû, Ngai nîaramverithia wana ngîcaaga.

³ Kethîrwa nwamenye kûrîa nîngîmwona, Nwanthiî nginya varîa arî.

⁴ Nwa nîmwîre mateta makwa, na nîmûve ivooto ciakwa cionthe.

⁵ Nwa mende kûmenya ûrîa akînjokeria, na ndaûkîrwe nî ûrîa ke angîmbîra.

⁶ Ngai nîangîatûmîre vinya wonthe wake gûciira nanie? Naarî, nîangîanthikîrîrie.

⁷ Ngai nwa maranîrie na mûndû mûthingu; na anduîre atî ndivîtîtie wana vanini.

⁸ Ta roria, nthiîcaga na mbere nwatî ndimwonaga, na nacoka na vuva agatura.

⁹ Nîmûcaragia mwena wa ûmotho nwatî ndimwonaga, na namûcaria mwena wa ûrîo agatura.

¹⁰ Nwatî ke nîamenyaga njîra îrîa nûmagîrîra, rîrîa akangeria ngaumîra ntherete ta thaavu.

¹¹ Nînûmagîrîra njîra yake na wîvokeku, ngathiî na njîra ciake ndakwathûkia.

¹² Ndianatiga kûrûmîrîra maathani make, ciugo ciake nîcigîte ngororî yakwa.

¹³ Ngai ndagarûrûkaga na ndagarûragwa, ekaga ûrîa ke mwene akwenda.

¹⁴ Ke nîavingagia ûrîa amvangîrîte, na arî na mîvango mîîngî ta îo meciriarî make.

¹⁵ Kwoguo nîrî mbere yake nîndetetemaga nî guoya, na neciria ûvoro wake nînyitagwa nî guoya.

¹⁶ Ngai nîathirîtie ngoro yakwa vinya, Mwene Vinya Wonthe nîambîguithîtie guoya.

¹⁷ Kûnarî ûguo nie nînumîrîtwe nî nduma, nduma nene îkangunîka ûthiû.