Ayubu 22 - ÎVUKU RÎA ÛVORO MWARO

Mîario ya Kathatû ya Elifazi.

¹ Elifazi wa kuuma Temani nîwacokerie Ayubu atîrî,

² “Mûndû ethagîrwa arî na vata ûrîkû kûrî Ngai? Nama mûndû ûrîa mûûgî nwake ûngîîguna.

³ Wîciragia nîûkenagia Ngai nîûndû wa kwîthîrwa wî mûthingu, kana kwîthîrwa ûtarî na mavîtia kûmûtethagia na ndûî?

⁴ Wîciragia Ngai akûverithagia nîûndû nîûmwathîkagîra, kana agûtucagîra ciira nîûndû nîûmwathîkagîra?

⁵ Naarî! Waganu waku nî mwîngî mûno, na mevia maku matirî mûthiia!

⁶ Rîrîa wetirie umithio kuuma kûrî aa mûrwanyûkwe, nîkwa wamûrutire nguo agîtigwa arî njaga.

⁷ Nîwamaimire arîa maarî anogu manjî ma kûnyua, na arîa maarî avûtu ûkîmaima irio cia kûrîa.

⁸ Nîwîtîkîrîtie arîa marî vinya gwoca ithaka, na ûgîtîkîria arîa wendete matûûre kuo.

⁹ Aka a ndigwa maûka gwaku menûkaga njara ntheri, na ûkathiria ciana cia ndigwa vinya.

¹⁰ Kwoguo ûrigicîrîtue nî mîtego mbarî cionthe, na wa rîmwe ûgecûrwa nî guoya.

¹¹ Ûkunîkîrîtwe nî nduma nîguo ndûkoone kîndû, na ûgakunîkîrwa nî mwîcûro wa manjî.

¹² Nîtwîcî Ngai atûûraga îgûrû mûno, na nîaroragia nthî akoona njata wana ethîrwa irî îgûrû.

¹³ Nwatî we ûûragia atîrî, “Nîndûî Ngai aicî? Ke nîmûkunîkîre nî matuangîtûtuîra atîa?”

¹⁴ Akunîkîrîtwe nî matu marumu mûno nîguo ndagatwone, na nîaceraga kûu mûtambarûkorî wa matu.

¹⁵ “Ûtuîte ûkarûmagîrîra njîra cia tene, irîa andû arîa aganu matwîre mathiîcagîra?

¹⁶ Maavagîrîrue nî mwîcûro wa manjî, wana îvinda rîao rîtarî rîkinyu.

¹⁷ Merire Ngai atîrî, ‘Tigana natuî,’ na makîûria Ngai mwene vinya wonthe atîrî, ‘Ûngîtwîka atîa?’

¹⁸ Kûnarî ûguo nîke wecûririe nyomba ciao indo mbaro, nwatî ndimenyaga meciria ma andû arîa aganu.

¹⁹ Andû arîa athingu monaga ûguo magakena, arîa matarî na ûcuke mamathekagîrîra na makamanyûrûria.

²⁰ Maugaga atî, ‘Nama nthû cietû nî njûkangie, na indo irîa maatigaririe nîmvîvie na mwaki.’

²¹ “We Ayubu, îgucanani na Ngai nîguo ûgîe na thayû; weka ûguo ûkonaga maûndû maro.

²² Amûkagîra ûrîa Ngai agûkûthomithia, na wigage ciugo ciake ngororî yaku.

²³ Ûngîcokerera Ngai mwene vinya wonthe na wînyivie, na ûthengutie waganu ûrîa wîkagwa gwaku mûciî;

²⁴ ûngîta ûtonga waku, wikie thaavu ya Ofiri mathigarî kûrîa gûtarî na rûnjî,

²⁵ na Ngai mwene vinya wonthe ethîrwa nîke thaavu yaku, na nîke sîlûva yaku ya goro,

²⁶ ûgakenaga nî Ngai mwene vinya wonthe, na wigage mwîvoko waku varî ke.

²⁷ Ûkamûvoyaga nake agakwîgua, nawe ûkavingagia mîvîtwa yaku.

²⁸ Mîvango yaku yonthe îkavingaga, njîra ciaku ikethagîrwa îrî cia ûtheri.

²⁹ Nîûndû Ngai nîanyivagia arîa etîi, na akavonokia arîa menyivagia.

³⁰ Nîavonokagia arîa matarî mavîtia, na ûkavonokua nî ciîko ciaku mbaro.”