Ayubu 21 - ÎVUKU RÎA ÛVORO MWARO

Ayubu

¹ Kwoguo Ayubu nîwacokirie atîrî,

² Tathikîrîriani waro ûrîa nguga, nîguo ûndû ûyû ûtuîke wa kûmûmîrîria.

³ Mbîtîkîriani mbarie, narîkia kwaria mûnyûrûrie.

⁴ Mûreciria nîratetia mûndû? Nîndûî kîngîtûma ngirîrîrie?

⁵ Ta ndoriani na nîmûkûmaka, na nîmûgûkunîka tûnyua na njara.

⁶ Nîreciria maûndû marîa monete ngamaka, mwîrî wakwa ûratetema nî guoya.

⁷ Andû arîa aganu matûûraga mwoyo nîkî? Nîndûî gîtûmaga matûûre mîaka mîîngî na marî na vinya?

⁸ O nîmonaga ciana ciao îgîkûra, na makona ciana cia ciana ciao ikîgacîra.

⁹ Mîciî yao îtûûraga îrî mîgitîre na îrî na thayû, na Ngai ndamaverithagia.

¹⁰ Ndegwa ciao nîitûcaga mori igaciara ikongerereka, ng'ombe ciao iciaraga na itivunaga.

¹¹ Ciana ciao ithiîcaga irî vamwe ta ndîthia ya ng'ondu, na nîciîinagia ngita na mîtûrirû ciavûrwa.

¹² Ciîinagia ciavûrîrwa tamburini na ngita, na igakena nî mîgambo ya mîtûrirû.

¹³ Matûûraga mûtûûrîre wa thayû, na makucaga matarî na thîna.

¹⁴ Andû arîa aganu meraga Ngai atigane nao, matiendaga kûmenya wendi wake mûtûûrîrerî wao.

¹⁵ Maûragia Ngai mwene vinya wonthe nû nîguo mamûtungatîre, na nî umithio ûrîkû monaga mamûvoya.

¹⁶ Maugaga atî ûtonga wao nîo mecarîrîtie. Nwatî nie ndingînyitanîra na meciria mao.

¹⁷ Nî maita megana taa ya mûndû mwaganu yanavorua? Nî maita megana mananyitwa nî mûthiro? Ngai anamaverithia arî na marakara?

¹⁸ Mekariî ta macaki marîa magûrûkagua nî rûkûngi, kana ta makoro marîa magûrûkagua nî rûkûngi rûnene.

¹⁹ Uugaga atî Ngai averithagia ciana nîûndû wa waganu wa methe. Naarî! Tiga Ngai amaverithie o ene nîguo mamenye mevia mao.

²⁰ O ene moone makînyarirîka, tiga megue marakara ma Ngai mwene vinya wonthe.

²¹ Mangîrûmbûiya ûvoro wa ciana ciao atîa, rîrîa ûtûûro wao wathira?

²² Kûrî mûndû ûngîva Ngai ûtaaro, na nîke ûtucagîra wana arîa marî îgûrû.

²³ Mûndû akucaga rîrîa agîa na indo na aamarîra, rîrîa arî na gîkeno na arî na thayû,

²⁴ rîrîa mwîrî wake wîcûrîtwe nî maguta, na mavîndî make marî na vinya.

²⁵ Mûndû wîngî akucaga arî na kîeva kîîngî ngororî, na atarî aacama kîndû Kîamro.

²⁶ Kûnarî ûguo, onthe makucaga na makathikwa, magacoka makaûmbwa nî igunyû.

²⁷ Ta nthikîrîriani! Nie nîmbîcî meciria menyu, na ngamenya mîvango yenyu ya kûnjûkangia.

²⁸ Nîûndû mûragia atîrî, “Nyomba ya mûnene îrî kû? Nyomba îrîa mûndû mwaganu atûûraga îrî kû?”

²⁹ Anga mûtianaaria na athiî? Anga mûtiîtîkagia ûira wao?

³⁰ Mûndû mwaganu nîatigaraga mûthenya wa thîna, nîatethûragwa mûthenya wa marakara.

³¹ Nû ûngîthitanga mûndû mwaganu, kana akamûrîva maûndû macûku marîa eekîte?

³² Rîrîa avirwa mbîrîrarî, mbîrîrarî yake nîkwa îgitagîrwa.

³³ Atongoragîrua na akarûmîrîrwa nî andû eengî rîrîa aravirwa mbîrîrarî, na rîrîa arathikwa aikagîrua mûthetu kavora.

³⁴ Mûnyûmagîrîria na ciugo îtarî na vata, macokio menyi nî maveeni matheri.