Ayubu 20 - ÎVUKU RÎA ÛVORO MWARO

Zofari

¹ Nake Zofari wa kuuma Namathi nîwamûcokerie atîrî,

² “Meciria makwa maraningîrîria ngûcokerie, ndingîûmîrîria rîngî.

³ Nîregua wangaania maûndû ndangîvota kûmîrîria, nwatî nîregua ngîringîrîrua gûgûcokeria.

⁴ “Nama we nîwîcî ûrîa kwîthîrîtwe gwîkariî kuuma wa Kîammbîrîria, kuuma rîrîa mûndû aigirwe gûkû nthî,

⁵ atî ûcamba wa mûndû mwaganu nîwa kavunda kanini, na gîkeno Kîam mûndû ûtaicî Ngai kîthiraga narua.

⁶ Wana agetûgîria agakinya nginya matuurî, Kîongo gîake nakîo gîkavutia matu,

⁷ mûthiiarî akaûra mana ta ûrîa kîoro gîake gîtecagwa. Nao arîa maanamwona maûranagie atîrî, ‘Athiîre kû?’

⁸ Akaathira ta kîroto na ndakoonekana rîngî, akaûrîra ta kîoneki Kîam ûtukû.

⁹ Arîa matûîre mamwonaga matikaamwona rîngî, varîa atûûraga vatikamenyekana rîngî.

¹⁰ Ciana ciake igacaragia ûtethio kûrî athîni, ke mwene nîagaacokia ûtonga wake wonthe.

¹¹ Mavîndî make mecûrîte vinya wa wîthî nwatî wonthe ûkamama vamwe nake rûkûngûrî.

¹² “Akîaria maûndû macûku, egucaga marî mûrîo ta cukarî, amathithaga rungu rwa rûrîmî rwake.

¹³ Ndendaga gûtiganîria maûndû mau macûku, ekaraga amaigîte kanyua,

¹⁴ nwatî maamerûka maakinya îvurî nîmarûraga, kûrî ke methagîrwa mekariî ta ûrogi wa njoka.

¹⁵ Mûndû mwaganu ameragia indo itarî ciake agaitavîka, nî Ngai ûirutaga îvurî rîake.

¹⁶ Mûndû mwaganu ongaga ûrogi wa njoka, agakua nîûndû wa kûrûmwa nî njoka.

¹⁷ Ndakoona rîngî nyûnjî cia maguta ma ndamaiyû, nyûnjî irîa inyûrûrûkaga îriia na ûûkî.

¹⁸ Nîakaavecana indo cionthe irîa arutîrîte wîra, ndakagîa na kanya ga gûûkenerera;

¹⁹ nîûndû nîwavinyîrîrie ngîa na akîmatiganîria, na agîtava nyomba ataatumîte.

²⁰ “Nîûndû ûkoroku wake ndûrî mûthiia, indo ciake cionthe irîa endete nîikaathira,

²¹ nîûndû arîcaga atagûtigaria, kwoguo ûtonga wake ndûgatûûra.

²² Rîrîa akethîrwa arî na indo nyîngî mûno, nîakaagîa na thîna mûnene. Akagwîrwa nî ûrito wonthe wa mîtangîko.

²³ Nî arîe ecûrie nda taka, agakinyîrwa nî marakara manene ma Ngai, mamwîtîkîre ta irio ciake.

²⁴ Akîgeria kûûrîra rûviû rwa cuuma, mûguî wa gîcango nîguo ûkamûratha.

²⁵ Mûguî ûkamûratha ûtûrîkanie mwîrî wake, nako kamûthiia ka guo karîa kavenavenagia kaumîrîre îtemoorî, ona ûguo agecûrwa nî kîmako.

²⁶ Mûthithû wake wonthe nîûgacûkangua, mwaki wa magegania nîûkaamûthiria, kîrîa kîonthe gîkethîrwa gîtigarîte nyomba gîkavîa viû.

²⁷ Îgûrû nîrîkaumîria mevia make, nayo nthî nîîkamûkîrîra.

²⁸ Indo ciake cionthe nîigaatavwa, Ithirue cionthe vîndî ya marakara manene ma Ngai.

²⁹ Rîu nîrîo îvera rîa mûndû ûrîa mûcûku kuuma kûrî Ngai mûnene, Nîrîo îgai rîrîa agaagîrwa nî Ngai Mûnene.”