Ayubu 2 - ÎVUKU RÎA ÛVORO MWARO

Caitani Nîwageririe Ayubu rîngî

¹ Mûthenya wîngî ciûmbe cia îgûrû nîciathiîre gûcemania na Ngai-Mûnene rîngî, Caitani wanake nîwathiîre vo.

² Nake Ngai-Mûnene nîwaûririe Caitani atîrî, “Wauma nakû?” Caitani nîwacokerie Ngai-Mûnene atîrî, “Nauma gûcera na kûthiûrûrûka na kûu nthî.”

³ Ngai-Mûnene nîwaûririe Caitani atîrî, “Wî mûmoneru ndungata yakwa Ayubu? Gûtirî mûndû gûkû nthî mwaro na mwîvoke ta Ayubu. Nîanîtigîrîte na nîethemaga maûndû macûku. We nîwaningîrîrie ngwîtîkîrie ûmûtharîkîre gûtarî na ûndû mûcûku ekîte, nwatî Ayubu atûûrîte arî mwîvokeku.”

⁴ Nake Caitani nîwacokerie Ngai-Mûnene atîrî, “Gîkonde Kîam mwîrî gîkûûragwa na kîngî! Mûndû avecanaga kîrîa kîonthe arî nakîo nîguo avonokie mwoyo wake.

⁵ Nwatî rîu ta vutia mwîrî wake na wone nîakûruma wa ûmûroretie.”

⁶ Kwoguo Ngai-Mûnene nîwerire Caitani atîrî, “Taroria Ayubu arî njararî ciaku, nwa ûmwîke ûrîa wonthe ûkwenda nwatî ndûkamûrage.”

⁷ Kwoguo Caitani nîwaumire varî Ngai-Mûnene, na nîwatûmire mwîrî wonthe wa Ayubu wîcûrwe nî ironda cietûrûraga mavira.

⁸ Ayubu nîwocire rûgîo na akîambîrîria kwîthûa ironda naruo ekarîte vandû mûurî.

⁹ Nake mûka nîwamwîrire atîrî, “Anga nginya rîu wîthîrîtwe ûrî mwîvokeku? Nîkwa ûtangîruma Ngai nîguo ûkue?”

¹⁰ Ayubu nîwacokirie atîrî, “We ûraria ta aka arîa aritu! Ethîrwa nîtwamûkagîra indo mbaro kuuma kûrî Ngai-Mûnene, na kinthî tûtiagîrîrwe nî kwamûkîra wana nginya maûndû macûku kuuma kûrî ke?” Wana Ayubu acemania na mathîna mau monthe, ke ndaaruma Ngai.

Arata a Ayubu nîmaathiîre kûrî ke.

¹¹ Na rîrîa arata athatû a Ayubu meguire ûrîa aacemanîtie na maûndû macûku, nîmaatuire mathiî makamûmîrîrie. Nao arata acio maarî: Elifazi kuuma Temana, Bilidadi kuuma Shua, na Zofari kuuma Naama.

¹² Na marî varaca nîmoonire Ayubu nwatî matiamûmenya. Nwatî rîrîa mamûmenyire nîmaatumûkire na kîrîro. Nîmatembûrangire nguo ciao na magikia mûu na îgûrû ûkîgûcaga ciongorî ciao.

¹³ Nîmaacokire magîkara nake vau nthî mîthenya mûgwanja ûtukû na mûthenya. Gûtirî mûndû wanarî ûmwe wao wavotire kûmwîra wanarî ûndû, nîûndû nîmoonaga ûrîa aathînîkaga.