Ayubu 19 - ÎVUKU RÎA ÛVORO MWARO

¹ Nake Ayubu nîwacokirie atîrî,

² Nîmûtûûra mûnyamaragia, mûkînthiragia vinya na ciugo nginya rî?

³ Nî maita îkûmi mwîthîrîtwe mûkînuma, mûtingîconoka nî ûguo mûnumîte?

⁴ Wana ethîrwa nîrî mûvîtiu, mûraturwa nîkî?

⁵ Mûreciria atî mûrî aro kûngîra, na atî nîranyamarua nîûndû wa maûndû macûku marîa mbîkîte.

⁶ Menyani atî nî Ngai ûtûmîte njîvie, na akambigîra mûtego nîguo anyitithie.

⁷ Wana nakaya ngiugaga, nînîratharîkîrwa, gûtirî mûndû ûnthikagîrîria. Mbîtanaga ndethue, nwatî ndionaga kîvooto gîkîrûmîrîrwa.

⁸ Ngai nîamvingîrîte njîra, ndingîvota kûvîtûka, nîekîrîte njîra ciakwa nduma.

⁹ Nîambaûrîte riiri wakwa, na akanduta nthûmbî kîongo.

¹⁰ Arandiva na mbarî cionthe, na nîakûûrîte kîîrîgîrîro gîakwa ta mûtî.

¹¹ Etûrûrîte marakara make na kûrî nie, na akandua nthû yake.

¹² Ngai atûmîte athigari ake mantharîkîre, nîmenjîte mîtaro înthiûrûrûkîrîtie, na makarigicîria nyomba yakwa.

¹³ Ngai nîatûmîte aa mûrwaiya mandiganîrie, na arata akwa onthe nîmandiganîrîtie.

¹⁴ Andû etû na arata akwa matirandethia.

¹⁵ Ageni arîa marî nyomba gwakwa nîariganîre nînie, ndungata ciakwa cia erîtu indungataga ta mûgeni, nduîkîte ta mûndû matanona.

¹⁶ Mbîtaga ndungata yakwa nwatî ndîmbîtîkaga nwa nginya nîmîthaithe nîguo îndethie.

¹⁷ Mîvevû yakwa mîcûku nîîrakaragia mûka wakwa, Aa mûrwaiya matingînguvîrîria nî kûnunga.

¹⁸ Nginya ciana nîinyararîte, nûngamaga ikanthekerera.

¹⁹ Arata akwa arîa anene nîamenu, na arîa nendete mûno nîmandiganîrîtie.

²⁰ Mwîrî wakwa ûthirîte ûgatigara mavîndî na ngothi; nîravonokere ciarera, vuva wa kûrwa nî indo ciakwa cionthe.

²¹ Mbîguîrani ntha, mbîguîrani ntha arata akwa, nîûndû njara ya Ngai nîîmvinyîrîtie.

²² Nwa nginya mûthiî na mbere na kûnyarira wata ûrîa Ngai areka? Nîkwa mûtareganîra nî ûguo mûnyarirîte?

²³ Naarî kethîrwa mateta makwa nîmaandîkirwe? Naarî kethîrwa nîmaandîkirwe mbukurî!

²⁴ Naarî kethîrwa maandîkirwe na karamu ga cuuma, nîguo matûûre tene na tene.

²⁵ Nie nîmbîcî mûngûûri arî mwoyo, na mûthiiarî nîakaanjirîrîra na kîvooto.

²⁶ Wana ikonde ciakwa ciacûkangua, nie mwene nîngeyonera Ngai-Mûnene na metho makwa.

²⁷ Ngaamwona na metho makwa kîûmbe, nie mwene na tî mûndû wîngî.

²⁸ Mue nwa mwîyûrie atîrî, “Tûngîmûnyarira atîa, na nîke kaumo ka mînyamaaro yake.”

²⁹ Îtigîreni kûûragwa, nîûndû marakara maretage gîkuû, nîguo mûmenye atî kûrî na mûtucanîri ciira.