Ayubu 18 - ÎVUKU RÎA ÛVORO MWARO

¹ Nake Bilidadi wa kuuma shuha nîwacokirie atîrî,

² Amba ûkire tûcoke twarie, ambani mûnyite ndeto waro.

³ Ûratwona twîkariî ta ng'ombe nîkî, ûratwona tûrî aritu nîkî?

⁴ We nîkwa ûrecûkangia na marakara maku, nîkwa nthî îkûthamwa nîûndû waku, kana mathiga mathengutue varîa mekaraga?

⁵ Ûtheri wa mûndû mwaganu nîûkavorua, nacio nînîmbî cia mwaki wake itigaakana.

⁶ Nyombarî yake ûtheri ûtuîkîte nduma, na taa îrîa îmûvecaga ûtheri nî mvorie.

⁷ Arathiîcaga ekinyîrîte nwatî rîu acemaga nthî gûcema, na mîvango yake nîyo îmûgwîthagia.

⁸ Nîûndû eviraga mûtegorî na magûgûrû make, na varîa athiîra nîagûcaga îrimarî.

⁹ Anyitagwa nî mûtego nthûng'warî, na ûkamûnyita na ndangîîtethûra.

¹⁰ Athithîrîtwe mûtego mûtheturî, ûgategwa gacîrarî varîa avîtûkagîrîra.

¹¹ Athiûrûrîkîrîtue nî maûndû ma kûmwîkîra guoya, marûmanagîrîra nake îkinyo gwa îkinyo.

¹² Vinya wake, nîmûthirire nî yûra, mîtino ûmwetererete nîguo ûmûgwîthie.

¹³ Mûrimû mûcûku wa ngothi nîûmûthirîtie, na nîworetie njara ciake wana magûrû.

¹⁴ Aarutirwe nyomba îrîa aatwîre evokete, akîvirwa mbere ya mûthamaki wîtagwa gîkuû.

¹⁵ Nyomba yake rîu îtûûragwa nî andû engî, na kûu atûûraga gûakanaga ûviriti.

¹⁶ Mîri yake na kûu nthî nîraûma, nakuo îgûrû mvûa ciake nîiraûma.

¹⁷ Ngumo yake nîrathira gûkû nthî, gûtirî mûndû gûkû nthî ûramûririkana.

¹⁸ Aarutirwe ûtherirî agikua ndumarî, akîngatwa vûrûri wa arîa marî mwoyo.

¹⁹ Ndarî ciana kana njiarwa andûrî ao, kûrîa aatûûraga gûtirî mûndû wanarî ûmwe ûtigarîte.

²⁰ Andû a mwena wa îthûîro nîmamakîtue nî maûndû marîa acemanîtie namo, nao andû a îrathîro makanyitwa.

²¹ Mau nîmo maûndû marîa manyitaga andû arîa matetîkîtie Ngai, kûu nîkuo andû arîa mataicî Ngai matûûraga.