Ayubu 17 - ÎVUKU RÎA ÛVORO MWARO

¹ Nie nguîte ngoro na mîthenya yakwa nîmîthiru; mbîrîra yakwa nîmvarîrie.

² Andû arîa manthiûrûrûkîrîtie nwakwa maranyarara, nîmaroragia na metho tu rîrîa marambîka ûguo.

³ Ngai nîrî mwîvokeku, kwoguo nûngamîrîra; gûtirî mûndû wîngî ûngînyita mbaru ûguo nauga.

⁴ Nîûvingîte meciria mao, nîguo matigataûkîrwe, kwoguo ndûkareke mamvoote.

⁵ Mûndû ûrîa ûcukanagîrîra arata ake nîûndû wa mbeca, ciana ciake nîcio icokaga kwona thîna.

⁶ Nie, nduîkîte ta kîmene kûrî andû, mandoragia makaminja mînyîrî.

⁷ Mbîkariî ta mûndû mûru metho nîûndû wa kîeva; ciîga cia mwîrî wakwa wonthe nîta kîruru,

⁸ Andû arîa marî na mîthiîre mîrûngarû nîmaramaka mona ûguo, na arîa matarî na mavîtia makaregana na arîa matetîkîtie Ngai.

⁹ Nwatî mûndû ûrîa wîtîkîtie Ngai ndavîngagwa, na mûndû ûrîa wîkaga maûndû maro, ongagîrîrwa wa mûthenya.

¹⁰ Nwatî mue muonthe mûngîrûngama mbere yakwa, ndingîona mûndû mûûgî gatagatîrî kenyu.

¹¹ Mîthenya yakwa nî mîthiru, na mîvango yakwa îkavîtana, ndirî na kîîrîgîrîro.

¹² Arata akwa matucaga ûtukû mûthenya; maugaga nîkûrathera, nwatî nie mbîcî nîrî ndumarî.

¹³ Nîngîtua kwa arîa akuû takuo mûciî, na nîngîmama kûu ndumarî,

¹⁴ nîngîra mbîrîra “We nîwe vava” na mbîre kîgunyû “Ûrî nyanya” kana “Mwarwaiya;”

¹⁵ nwa mbîthîrwe nîrî na kîîrîgîrîro? Nî ûrîkû ûngîona nîrî na kîîrîgîrîro gîakwa?

¹⁶ Kîrîgîrîro kîu gîakwa nîkînûmîrîra kwa arîa akuû! Tûkathiî tuonthe vamwe rûkûngûrî!