Ayubu 16 - ÎVUKU RÎA ÛVORO MWARO

Ayubu

¹ Ayubu nîwacokirie atîrî,

² Nîmbîguîte maûndû ta mau meengî, îthenya rîa kûmanîrîria mue nîkwa mwongagîrîra mûndû mathîna.

³ Nîkwa mîario yenyu ya mana îtakaathira? Nîndûî kîramûringîrîria kûthiî na mbere kwaria?

⁴ Wa nanie nîngîrî kwaria ta mue, kethîrwa mûregua ûrîa nîregua. Nîngîtungîte ciugo cia kûmûrakaria, nginainagia kîongo nîûndû wenyu.

⁵ Nîngîrî kûmûva ciugo cia kûmûmîrîria, na mîario yakwa ya kûmûmîrîria nîîngîramûva thayû.

⁶ Nwatî wana nîngîaria ûrûrû ndûnyivaga mwîrîrî wakwa, na nîngîkira ndûthiraga.

⁷ Nama Ngai nîanthirîtia vinya viû; nîatûmîte andû a nyomba yakwa onthe maûragwe.

⁸ Nîatûmîte ng'onyara mwîrî wonthe, na ûcio nî ûira wa maûndû macûku marîa ambîkîte; atûmîte ng'înja na ûgîtuîka ûira kûrî andû wa ûrîa njîvîtie.

⁹ Anducangîte icunjî icunjî nî kûrakara na akanthûûra, nthû yakwa îngûûrîrîte metho nî marakara.

¹⁰ Andû manyararaga na makanthekerera, magomanaga marî ikundi makanthiûrûrûkîria, na makanjamûra rûvî nî kûmena.

¹¹ Ngai andekereretie kûrî andû arîa mataicî Ngai, na akandekia njararî cia andû arîa aganu.

¹² Nekarîte ngirîrîrîtie nwatî Ngai akîmunanga; aanyitire ngingo na akîndemania nthî ngîtuîkanga icunjî icunjî; aanduire ta kîndû gîa kwîthima cava nakîo.

¹³ Ambikagia mîguî na mbarî cionthe, mîguî îrîa îîmundaga îgatûrîkania ndûndî, na akamunda îtema ndûrû îgetîka nthî.

¹⁴ Andivangîtie akambîkîra irema mwîrî wonthe, antharîkagîra ta mûthigari njamba.

¹⁵ Nîndumîte nguo cia macakaya ngaaciîkîra, na mbîkarîte rûkûngûrî ndarî na vinya.

¹⁶ Metho makwa matunîvîte nî kûrîra, na ngaimba imoni cia metho ngaremwa nî kwona.

¹⁷ Nwatî gûtirî ûndû mûcûku mbîkîte, na mvoyaga Ngai nîrî na ngoro ntheru.

¹⁸ We nthî, ndûgakunîkîre nthakame yakwa, tiga maûndû ma kîvooto marîa mbaragia matambe kûrî andû onthe.

¹⁹ Nîmbicî mûira wakwa arî matuurî, mûnjirîrîri arî îgûrû.

²⁰ Arata akwa nîmanyararîte, na nînîrarîrîra Ngai wakwa.

²¹ Naarî kethîrwa kûrî na mûndû wa kûnthaithanîrîra kûrî Ngai, ta ûrîa andû aîrî arîa mavîtanîtie meguithanagua.

²² Nîûndû mîaka yakwa ya gûtûûra nî mînini, na kûrîa ngûthiî ndigacoka.