Ayubu 15 - ÎVUKU RÎA ÛVORO MWARO

Mîario ya kaîrî ya Elifazi

¹ Vîndî îo Elifazi wa kuuma temania nîwacokirie atîrî:

² Mûndû mûûgî nwa arie ndeto itarî na mûvango, na aragie ûndû gûtarî?

³ Nwa nginya ethîrwe na ngarari itarî na umithio, kana mîario îtarî na kîene?

⁴ Nwatî we nîûtigîte gwîtigîra Ngai, na watûma andû matige kûvoya Ngai.

⁵ We waragia wa maûndû ma waganu, karîmî gaku karagia ndeto cia wara.

⁶ Ciugo ciaku nîcio igûcirithagia tî nie, kanyua gaku we mwene nîko gakumbûraga.

⁷ Anga nîwe warî mûndû wa mbere gûciarwa? Kana we warî mûmbe mbere ya irîma ciûmbwa?

⁸ Wanathikîrîria ndundu ya Ngai? Anga gûtirî mûndû wîngî mûgî tiga we?

⁹ Nî atîa ûmenyete, ûcio tûtamenyete?

¹⁰ Gatagatî getû kûrî na athuuri akûrû na marî na mbuî, na akûrû gûkîra aguo.

¹¹ Anga ciugo cia gûkûvooreria irîa Ngai akûvecaga tî mbîganu, ciugo cia gûtûma ûkirîrîrie tî kîndû?

¹² Ûraringwa nî ngoro nîkî? Ûtunîvîtie metho nîkî?

¹³ Nginya ûkaregana na Ngai, na ûkaaria ciugo njûku ta icio?

¹⁴ Mûndû nîndûî atî nîguo ethîrwe arî mûtheru? Kûrî mûndû ûciarîtwe nî mûndûmûka ûngîtuîka mûthingu?

¹⁵ Ethîrwa Ngai ndevokaga araika ake, na ciûmbe cia îgûrû tî ntheru methorî make;

¹⁶ ndangîvota kwîvoka mûndû wa gûkû nthî, mûndû ûrîa ûnyunyaga waganu ta manjî.

¹⁷ Tanthikîrîria ngwîre, na nî ngûkumbûrîra maûndû marîa monete.

¹⁸ Maûndû marîa mwerirwe nî andû arîa aûgî, maûndû marîa methe mao matanamûthitha.

¹⁹ Nîo onga tu Ngai aveere vûrûri ûcio, na gûtirî mûgeni wavîtûkîrîre gatagatî kao

²⁰ Mûndû ûrîa mwaganu na ûnyariraga andû arîa engî, nîatûûra anyarirîkaga ûtûûrorî wake wonthe.

²¹ Egucaga mîgambo ya kûmakania matûûrî make; rîrîa agwîciria arî na thayû, nîrîo atharîkagîrwa nî acunani.

²² Ndetîkagia atî nîakaauma ndumarî, na etererete mûndû ûrîa ûkamûraga.

²³ Atindaga akîûrûra agîcaria gîa kûrîa akîûragia kîrîkû, nîamenyaga atî îvinda rîa nduma nîrîmûkuvîvîrîtie.

²⁴ Mînyamaaro na ûrûrû nîimwîkagîra guoya, imûthithûkagîra ta mûthamaki evarîrîtie kûrûa.

²⁵ Nîûndû nîakûnjagîra Ngai ngundi, na akang'athîria Mwene Vinya Wonthe.

²⁶ Avinyûraga na kûrîke aûmîtie kîongo, akuuîte ngo ya kwîgitîra kûrî Ngai.

²⁷ Ûthiû wake ûtunguvîte nî kûnora, na kîûnû gîake gîgecûra maguta.

²⁸ Atûûraga maganjorî, nyombarî irîa ciathamîrwe nî andû, irîa irî vakuvî kwomomoka.

²⁹ Ke ndagaatonga, na ûtonga wake ndûgatûûra, ke wana kîruru gîake nîikaathira.

³⁰ Ndakaaûrîra nduma, agekara ta mûtî ûrîa matheûka maguo mavîvagua nî mwaki, na marao maguo makagûrûkua nî rûkûngi.

³¹ Ndakaige mwîvoko wake maûndûrî ma mana, na ndakeveenie nîûndû maûndû mau nîmo akaavewa.

³² Nîakaarîvwa mûcara wake wonthe mbere ya akue, na njiarwa ciake itigatûûra.

³³ Agekara ta mîthavibu ûrîa wîtûrûrîte matunda maîthî, na ta mûtamaiyû ûrîa wîtûrûraga marao.

³⁴ Andû arîa matagoocaga Ngai magatûûra marî nthata, na mîciî ya arîa mavakanaga îkavîvua nî mwaki.

³⁵ Mathugundaga maûndû macûku ngororî magacoka magaciara mevia; ngoro ciao ivangaga maveeni.