Ayubu 12 - ÎVUKU RÎA ÛVORO MWARO

¹ Nake Ayubu nîwacokirie atîrî,

² “Nama mue mwîcûrîtwe nî ûûgî, na ûûgî ûgaakua rîrîa mûgaakua.

³ Nwatî nîrî na ûmenyo ta wenyu, ûrîa mwîciragia nîguo nîciragia; andû onthe nîmamenyete maûndû monthe marîa mugîte.

⁴ Nie natuîkire wa kûthekagîrîrwa nî arata akwa; nie naavoire Ngai na akîmbîgua; nie mûndû mûthingu na mwîvokeku, nduîkîte wa kûthekererwa.

⁵ Mûndû ûrîa ûtanona thîna, anyaraga ûrîa ûrî thînarî, kûrî ke mathîna manyitaga arîa magûîte.

⁶ Mîciî ya aûragani îrî na thayû, na arîa marakaragia Ngai matûûraga marî agitîre, vinya wao umaga kûrî ngai ciao.

⁷ Nwatî ta ûria nyamû cia kîthakarî nacio nîigûkûthomithia; na ûrie iconi cia rîerarî nacio nîigûkûva ndeto.

⁸ Ûria mîmera ya kîthakarî nayo nîgûkûthomithia; ûcoke warîrie nthamaki irîa irî îriarî nacio nîigûkûva ndeto.

⁹ Gatagatî ga ciûmbe icio, nî kîûmbe kîrîkû gîtaicî atî nî Ngai-Mûnene wîkîte maûndû mau.

¹⁰ Ûtûûro wa kîndû wa kîonthe kîrî mwoyo, na mwoyo wa mûndû wa wonthe ûrî njararî cia Ngai.

¹¹ Anga gûtû gûtithimaga ndeto, ta ûrîa rûrîmî rûcamaga irio?

¹² Andû arîa akûrû nîo methagîrwa na ûûgî, na guo ûmenyo na arîa matûûrîte mîaka mîngî.

¹³ Nwatî ûûgî na vinya nî cia Ngai, naguo ûmenyo na kîrîra nî ciake.

¹⁴ Ngai angîomomora kûndû, gûtirî mûndû ûngîtuma rîngî; angîvingîra mûndû, gûtirî mûndû ûngîmûvingûrîra.

¹⁵ Angîgiria mbura yure kûgîcaga na thano nene, angîtîkîra mbura yure kûgîcaga na mwîcûro wa manjî.

¹⁶ Ke ethagîrwa arî na vinya na ûûgî, arîa maveenagua na arîa maveenanagia onthe nî ake.

¹⁷ Ke nîatûmaga ataarani mathiî matarî na nguo, na agatua acirithania irimû.

¹⁸ Nîarutaga athamaki nguo cia ûnene, na akamatua ta ngombo.

¹⁹ Nîatûmaga athînjîri-Ngai mathiî matarî kîndû, na akagwîthia arîa marî îgweta.

²⁰ Nîatûmaga andû arîa evokeku makire, na agacuna andû arîa akûrû ûmenyo.

²¹ Nîanyararithagia arîa mathanaga, na agacuna arîa marî vinya ûvoti.

²² Nîaguûragia maûndû marîa marî ndumarî, na marîa marî ndumarî akamareta ûtherirî.

²³ Atûgagîria mavûrûri na akamagwîthia, nîamanenevagia na akamanyagania.

²⁴ Nîacunaga atongoria a andû ûmenyo, na agatûma maûrûre werûrî maturîte njîra.

²⁵ Mathiîcaga makînyitanyitaga ndumarî, na magatûgûga ta mîrîu.