Ayubu 11 - ÎVUKU RÎA ÛVORO MWARO

¹ Nake Zofari wa kuuma Naama nîwacokerie Ayubu atîrî,

² Mîario îo yonthe nwa îture mûndû wa kûmîcûngîrîra, na mûndû mwaria mûno nwa ature mavîtia?

³ Ndeto ciaku cia tûkûtûkû nwa ikirie arûme, na rîrîa ûranyûrûrania, gûtirî mûndû ûngîgûconora?

⁴ We ugaga atî, kîrîra gîaku nî Kîam ma, na ûrî mûtheru methorî ma Ngai.

⁵ Naarî kethîrwa Ngai nwa atumûre kanyua gake na arie nawe?

⁶ Na acoke akwîre maûndû ma nthitho na ma ûûgî? Ngai nîamenyaga maûndû na njîra ndikîru, menya atî, Ngai ndakûverithagia kûringana ûrîa na wîvîtie.

⁷ “Nwa ûvote kûmenya nthintho ya Ngai? Nwa ûvote kûmenya ûnene wa Ngai mwene vinya wonthe?

⁸ Ûnene wake ûnenevete ûgakîrûka matu, we ndûngîûkinyîra, na nîmûrikîru gûkîra kûrîa gwa akuû, we ndûngîmenya.

⁹ Nî mwariî gûkîra nthî yonthe, na ûkarama gûkîra îria.

¹⁰ Ethîrwa Ngai nwa anyite mûndû na amuikie njeera na amûthitange, nû ûngîmûrigîrîria?

¹¹ Ngai nîamenyaga andû arîa matarî aro, Ona maûndû macûku magîkwa, ke nîeciragia ûvoro wamo.

¹² “Kethîrwa nyûmbû nwa îciare mûndû, wana mûndû mûritu nwa ataûkîrwe.

¹³ “Ayubu, ûngîagîria ngoro yaku, nwa wambararie njara yaku ûkavoya Ngai.

¹⁴ Ethîrwa ûrî na mevia mate kûraca, ndûgetîkîre maûndû matarî ma kîvooto gwaku nyomba.

¹⁵ Weka ûguo ûkeyumagîria kûrî andû ûtagwîcuka, na ûkegucaga ûrî mûgitîre na ûtarî na guoya.

¹⁶ Nîûgacoka ûriganîrwe nî mathîna maku monthe, ta ûrîa manjî mavîtûkaga na makariganîra.

¹⁷ Mûtûûrîre waku ûkethagîrwa ûtherete ta mûthenya varigici, kûrîa kûrî na nduma mûtûûrîrerî waku gûkathera ta kîraûko.

¹⁸ We nîûtûûra ûrî na ûmîrîru nîûndû kûrî na kîîrîgîrîro. Ngai agakûgitagîra na akûvecage ûvurûko.

¹⁹ Ûkamamaga ûtagwîtigîra nthû ciaku, andû eengî makaûragia ûtethio kûrî we.

²⁰ Nwatî metho ma andû aganu nîmakaathira vinya, nîmakaarigwa nî njîra cionthe cia kûûrîra, kîîrîgîrîro Kîam o Kîam mûthiia nî gûkua.”