Ayubu 10 - ÎVUKU RÎA ÛVORO MWARO

¹ “Nie ndirî na vata na ûtûûro wakwa! Nîngwaria mateta makwa ndarî na guoya. Nîngwaria nîrî na ûrûrû mwîngî ngororî.

² We Ngai atî, ndûkanduîre. Mbîîra kîrîa gûtûmaga ûnjirithia.

³ Wonaga ûgîka waro rîrîa ûkûnginyîrîria? Kana rîrîa ûranyarara wîra wa njara ciaku, na ûkenda wîra wa andû arîa aganu?

⁴ Metho maku nîta ma mûndû? Wonaga ta ûrîa mûndû onaga?

⁵ Ûtûûro waku nî mûkuvî ta wa mûndû, na mîaka ya ûtûûro waku nîta ya mûndû,

⁶ atî nîguo ûtuîrie maûndû macûku marîa mbîkaga, na mevia marîa mbîkîte?

⁷ We nîwicî atî ndirî mwîviu, na atî gûtirî mûndû ûngîndethûra kuuma kûrî we.

⁸ Njara ciaku nîcio cianyûmbire na ikîndûtha ûrîa ûrîa mbîkariî, na rîu njara wa icio nîcio iracoka kûnjûkangia.

⁹ Ta ririkana atî wanyûmbire na yûmba. Nîkwa ûrenda kûndutumûra nduîke rûkûngû rîngî?

¹⁰ Kinthî ndwambîtûrûrire îvurî rîa nyanya ta îriia, ûgîcoka ûkîîmatia ngîûma ta maguta ma rîo?

¹¹ Nîwekîrire mavîndî na mîkiva mwîrîrî wakwa na ûgekîra nyama na ngothi îgûrû rîaguo.

¹² Nîûmvete mwoyo na ûkamva wendo mûnene, nîûmenyererete mwoyo wakwa mûno.

¹³ Nwatî wîthîrîtwe ûthithîte maûndû mama monthe ngororî yaku, na nîmbicî nîwavangîte kûmbîka maûndû mau monthe.

¹⁴ Wanduîragia wone kana nîngwîvia, nîguo ûrege kûnjovera mevia makwa.

¹⁵ Rîrîa nevia mbîthagîrwa nîrî thînarî, rîrîa neka waro ndingîîgathîrîria. Mbîthagîrwa mbîcûrîtwe nî gîconoko ngîona mathîna makwa.

¹⁶ Nîngîûkîrîria kîongo tu, ûng'uîmaga ta mûnyambû, ûgacoka ûkambîka maûndû ma magegania na ma kûnyamaria.

¹⁷ Vîndî cionthe ûnjaragîria ûira macûku ûmbîgiî, na marakara maku kûrî nie nî meengî mûno, ûndetagîra nthû ng'eni cia kûntharîkîra.

¹⁸ “Watûmire nyume îvurî rîa nyanya nîkî? Nîkava nîngîakuire ndonetwe nî mûndû.

¹⁹ Nîkava nîngîaciarirwe ngînavirwa mbîrîrarî warîo, mbîkare ta mûndû ûtaarî vo.

²⁰ Na kinthî mavinda makwa ma gûtûûra mwoyo tî manini? Tigana nanie nîguo ngenerere ûtûûro vanini,

²¹ mbere ya nthiî kûrîa ndagaacoka rîngî, vûrûri ûrî îvooru na nduma ndumanu.

²² Vûrûri ûrî îvooru na ûtarî na mîvango, na ûtheri wakuo nîta nduma.”