Ayubu 1 - ÎVUKU RÎA ÛVORO MWARO

Caitani nîwageririe Ayubu

¹ Kwarî na mûndû wetagwa Ayubu, wa kuuma vûrûrirî wa Uzi. Ayubu aarî mûndû mwaro na mwîvokeku. Aarî mûndû wetigîrete Ngai na wareganîte na maûndû macûku.

² Ayubu aarî na anake mûgwanja (7) na erîtu athatû (3).

³ Aarî na ûtonga wa ng'ondu ngiri mûgwanja (7,000), ngamîîra ngiri ithatû 3,000, ndegwa cia mûraû ngiri îmwe (1,000), na mvunda magana matano (500). Ayubu aarî na ndungata nyîngî mûno, na nîke warî gîtonga kînene mûno gûkîra andû onthe mwena wa îrathîro.

⁴ Wa mûndû gatagatîrî ka anake a Ayubu nîwarugaga kîrugo agacoka ageta anake acio engî vamwe wana erîtu nîguo marîcanîre vamwe.

⁵ Wa kîrugo Kîamthira, Ayubu nîwetaga ciana ciake nîguo aitherie. Vuva wa kîrugo, nîwaramûkaga kîraûko tene mûno na akaruta îgongoona rîa kûvîvua rîa wa mwana, rîrî îgongoona rîa kûmatheria, “Nîûndû mavota kwîthîrwa marumîte Ngai ngororî ciao.”

⁶ Mûthenya ûmwe araika a Ngai nîmaathiîre gûcemania mbere ya Ngai-Mûnene na Caitani nîwaûkire agîkara varîa maarî.

⁷ Ngai-Mûnene nîwaûririe Caitani atîrî, “Wauma kû?” Caitani nîwacokirie atîrî, “Nauma gûcera na kûrûra na kûu nthî.”

⁸ Nake Ngai-Mûnene nîwamûririe atîrî, “Wî mûmoneru ndungata yakwa Ayubu? Gûtirî mûndû gûkû nthî mwaro na mûthingu take. Nîanîtigîrîte na nîethemaga maûndû macûku.”

⁹ Caitani nîwacokirie atîrî, “Ayubu ndungata yaku ndîngîgwîtigîra mana.

¹⁰ Nîkwa ûmûgitagîra ke, mûciî wake, wana indo ciake cionthe. Ûndû wa wonthe ekaga we nîûmûrathimaga. Ndîthia ciake cia mbûri na ng'ombe ciîcûrîte vûrûri wonthe.

¹¹ Nwatî ta oca ûtonga ûcio wake wone agîkûruma ûkîonaga!”

¹² Ngai-Mûnene nîwerire Caitani atîrî, “Ûrî na ûvoti wa gwîka wa ûrîa wonthe ûngîenda îgûrû rîa kîrîa kîonthe arî nakîo, nwatî ndûkavutie mwîrî wake.” Kwoguo Caitani nîwaumire varî Ngai-Mûnene na akîîthiîra.

Îgerio rîa mbere rîa Ayubu

¹³ Mûthenya ûmwe rîrîa anake na erîtu a Ayubu maarîcaga irio na maanyunyaga marî mûciî kwa mwarwang'ina ûrîa mûkûrû,

¹⁴ mûnjaama ûmwe nîwathiîre kûrî Ayubu avinyûrîte na akîmwîra atîrî, “Mavinda marîa tûkûrîmaga na ndegwa, nacio mvunda ikîrîcaga rûtererî rwa mûgûnda,

¹⁵ gîkundi gîa andû kuuma Sabea nîkîaitharîkîre wa rîmwe gîgîitava. Nîmaûragire ndungata ciaku cionthe na nwa nie ndigarire nîguo mbûke ngûmenyithie maûndû mama.”

¹⁶ Mbere ya arîkia kwaria, ndungata îngî ya Ayubu nîyaûkire na îkîmwîra atîrî, “Rûveni kuuma îgûrû kwa Ngai rûkire na rwavîvia ng'ondu na ndungata ciaku irîa ikûirîthagia ciathira. Nînie nienga ndigarire nîguo mbûke ngûmenyithie maûndû mama.”

¹⁷ Na rîrîa aaragia ndungata îngî nîyaûkire na îkîmwîra atîrî, “Akalidei mevangire ikundi ithatû na matharîkîra ngamîîra na macioca. Macoka maûraga ndungata ciaku. Nînie nienga tu ndigarire nîguo mbûke ngûmenyithie maûndû mama.”

¹⁸ Nayo ndungata ya kathatû nîyaûkire, na mbere ya îo yaragia îthiria kwaria nîyaugire atîrî, “Anake na erîtu aku nîmarîcaga irio makînyunyaga ndivei mûciî kwa mûrwang'ina ûrîa mûkûrû.

¹⁹ Na wa rîmwe rûkûngi rûnene rumîte ya werûrî nî rûkire na rwaringa nyomba na yomomokera ciana ciaku cionthe ikînakua. Nînie nienga ndigarire nîguo mbûke ngûmenyithie maûndû mama.”

Ayubu nîwakumirie Ngai

²⁰ Nake Ayubu nîwaûkîrire na agîtembûranga nguo ciake, akîenjwa kîongo, akîrivania nthî,

²¹ na akîvoya akiuga atîrî, “Naciarirwe ndarî na kîndû na ngakua ndarî na kîndû. Nî Ngai-Mûnene wavecanire na nîke wacoka gwîcîra, rîîtwa rîake rîrogoocwa!”

²² Maûndûrî mama monthe Ayubu ndevia na ndaaruta Ngai mavîtia.