Atir 9 - ÎVUKU RÎA ÛVORO MWARO

Wathani wa Abimeleki

¹ Abimeleki mûvîcî wa Gideoni nîwathiîre Shekemu kûrî aa mamawe, wana kûrî andû onthe a mûvîrîga wa ng'ina na akîmeera atîrî,

² “Namûthaitha mwarie mûkîgucagwa nî andû onthe a Shekemu, mûmaûrie atîrî, ‘Nî ûndû ûrîkû mûrona wagîrîrîte? Mûrenda kwathagwa nî avîcî onthe mîrongo mûgwanja a Gideoni, kana mûrenda kwathagwa nî mûndû ûmwe?’ Makîria ya ûguo, ririkanani, atî mue nanie tûrî a nthakame îmwe.”

³ Aamamawe nîmaarîrîrie maûndû mau monthe kûrî andû a Shekemu vandûrî va Abimeleki, nao andû a Shekemu nîmeendire kûrûmîrîra Abimeleki nîûndû aarî wao.

⁴ Nîmaamûvere tûcunjî mîrongo mûgwanja (70) twa sîlûva irutîtwe hekarûrî ya Baali-berithu. Abimeleki nîwocire sîlûva icio na agîcoka akîivûthîra kwandîka andû maarî aganu nîguo mamûrûmîrîre.

⁵ Nîwacokire akîthiî mûciî kwa îthe kûu Ofira na akîûragithîria aa mûrwang'ina mîrongo mûgwanja îthigarî rîmwe. Nwatî Jothamu mûvîcî wa Gideon ûrîa warî kîvinga nda, ndaaûragwa nîûndû nîwethithîte.

⁶ Andû onthe a Shekemu na a Bethimilo nîmaaûnganire vamwe. Nîmaacokire makîthiî vakuvî na mûvuru ûrîa mwamûre kûu Shekemu na magîtua Abimeleki mûthamaki.

⁷ Rîrîa Jothamu aaveerwe ûvoro ûcio, nîwathiîre na akîrûngama îgûrû rîa gacûmbîrî ga kîrîma Kîam Gerizimu. Nîwaugîrîrie na mûgambo mûnene atîrî, “Nthikîrîriani mue andû a Shekemu nîguo wanake Ngai amûthikîrîrie!

⁸ Vîndî îmwe, mîtî nîyagomanire vamwe nîguo îthuure ûmwe wayo ûtuîke mûthamaki wayo. Nîyerire mûtî wa mûtamaiyû atîrî, ‘Ûka ûtuîke mûthamaki wetû.’

⁹ Naguo mûtî wa mûtamaiyû nîwacokirie atîrî, ‘Mûrenda ndigane na wîra wa kûthondeka maguta marîa matûmaga Ngai na andû matîwe, nîguo nîmwathage?’

¹⁰ Mîtî nîyacokire îkîra mûkûyû atîrî, ‘Ûka arî we nîguo ûtuîke mûthamaki wetû.’

¹¹ Nwatî mûkûyû nîwacokirie atîrî, ‘Mûrenda ndigane na wîra wa kûthondeka ngûû ciakwa irîa irî mûrîo ûguo nîguo nîmwathage?’

¹² Mîtî nîyerire mûthavibu atîrî, ‘Ûka arî we nîguo ûtuîke mûthamaki wetû.’

¹³ Nwatî mûthavibu nîwacokirie atîrî, ‘Mûrenda ndigane na wîra wa kûthondeka ndivei yakwa îrîa îtûmaga ngai ikene na andû makene nîguo nîmwathage?’

¹⁴ Kwoguo mîtî yonthe nîyacokire îkîra mûtare wa kîthakarî atîrî, ‘Ûka arî we nîguo ûtuîke mûthamaki wetû.’

¹⁵ Naguo mûtare wa kîthakarî nîwerire mîtî îo îngî atîrî, ‘Ethîrwa nîmûkwenda nduîke mûthamaki wenyu, ûkani mwîkare kîrururî gîakwa na ethîrwa tî mwîka ûguo, mwaki ûrouma mûtarerî ûyû wa kîthaka na ûvîvie mîtarakwe ya Lebanoni viû.’ ”

¹⁶ Jothamu nîwacokire akîmeera atîrî, “Ûndû ûcio mwîkîte wa gûtua Abimeleki mûthamaki wenyu nî wa ma na gîtîîo? Nîmûrekire Jerubaali na andû a mûciî wake maûndû maro marîa aagîrîrwe nî gwîkîrwa kûringana na ciîko ciake?

¹⁷ Ririkanani atî, vava nîwamûrûîrîre na agîtonyia ûgwatirî wa gîkuû, na akîmûvonokia kuuma kûrî Amidiani.

¹⁸ Nwatî ûmûnthî nîmûtharîkîre andû a mûciî wa vava na mwaûragîra avîcî ake mîrongo mûgwanja îthigarî rîmwe. Nîmûcokete mûgatua Abimeleki, mûvîcî wa ndungata yake ya mûndûmûka mûthamaki wa andû a Shekemu, nîûndû atî mûrî amwe nake.

¹⁹ Ethîrwa ûndû ûcio mwîkîte Gideoni na andû a nyomba yake ûmûnthî nî wa ma na wa gîtîîo, kenani nîûndû wa Abimeleki na akene nîûndû wenyu.

²⁰ Nwatî ethîrwa tî ûguo, mwaki ûrouma kûrî Abimeleki na ûvîvie andû a Shekemu na andû a Bethimilo viû. Na rîngî mwaki ûrouma kûrî andû a Shekemu na Bethimilo na ûvîvie Abimeleki viû.”

²¹ Jothamu nîwetigagîra mûrwang'ina Abimeleki, kwoguo nîwatorokire avinyûrîte akîthiî Beeri na agîtûûra kuo.

²² Abimeleki aathanire Isiraeli îvinda rîa mîaka îthatû.

²³ Ngai nîwacokire agîtûma roho mûcûku aûke gatagatîrî ka Abimeleki na andû a Shekemu, na andû a Shekemu nîmaareganire na Abimeleki.

²⁴ Ûndû ûyû wekîkire nîguo wîvia ûrîa wekirwe wa kûûraga avîcî mîrongo mûgwanja a Gideoni ûrîvîke. Nayo nthakame yao îgîcokerera Abimeleki na andû a Shekemu acio maamwîkîrire vinya nîguo aûrage aa mûrwang'ina.

²⁵ Andû a Shekemu nîmaaigire andû amwe tûcûmbîrîrî twa irîma nîguo movere Abimeleki kuo. Nao nîmaacunire andû indo ciao arîa maavîtûkagîrîra njîrarî îo, na Abimeleki nîwaverwe ûvoro ûcio.

²⁶ Gaali, mûvîcî wa Ebedi nîwacokire akîthiî Shekemu marî na aa mûrwang'ina, nao andû a Shekemu nîmaamwîvokire.

²⁷ Andû a Shekemu nîmaathiîre mîgûndarî yao ya mîthavibu na magîketha thavibu, makîthondeka ndivei na makîgîa na kîrugo. Nîmaacokire magîtonya hekarûrî ya ngai yao, nîmaarîre na makînyua magîcoka makîruma Abimeleki.

²⁸ Gaali, mûvîcî wa Ebedi nîwaugire atîrî, “Rîu tue andû a Shekemu nîkwa tûrî a? Nake Abimeleki nîkwa arî ûrîkû atî nîguo tûmûtungatagîre? Kinthî tîke mûvîcî wa Gideoni, ûrîa ûtuîte Zebuli mûnene wa andû a Hamori ûrîa warî îthe wa Shekemu?

²⁹ Narî kethîrwa nînie mûtongoria wa andû aya, nîkwa nîngîngata Abimeleki! Nîngîmwîra atîrî, ‘Ongerera athigari aku a mbaara ûke tûrûe nawe!’ ”

³⁰ Nake Zebuli ûrîa warî mûtongoria wa îtûûra nîwarakarire rîrîa eegwire ûrîa Gaali aaugire.

³¹ Nîwatûmire anjaama kûrî Abimeleki kûu Aruma makamwîre atîrî, “Gaali mûvîcî wa Ebedi marî na aa mûrwang'ina nîaûku Shekemu na nîmekûgiria ûtonya îtûûrarî.

³² Kwoguo we mûrî na andû aku mûkathiî ûtukû na mwîthithe mîgûndarî.

³³ Rûyû kîraûko riûa rîkîratha mûkaatharîkîra îtûûra. Rîrîa Gaali na andû ake magaaûka kûrûa namue, mûkaamariva na vinya wata ûrîa mûngîvota!”

³⁴ Kwoguo Abimeleki na andû ake nîmaathiîre ûtukû na makîîthitha na kûu nja ya Shekemu marî ikundi inya.

³⁵ Rîrîa Abimeleki na andû ake moonire Gaali aûka na akîrûngama kîvingorî gîa îtûûra, nîmaumire kûrîa meethithîte.

³⁶ Rîrîa Gaali oonire andû acio, nîwerire Zebuli atîrî, “Taroria! Kûrî na andû manyûrûrûkîte maumîte tûcûmbîrîrî twa irîma!” Nake Zebuli nîwacokirie atîrî, “Arîa tî andû, nî iruru cia irîma.”

³⁷ Nwatî Gaali nîwerire Zebuli rîngî atîrî, “Taroria wone kûrî na andû manyûrûrûkîrîte mûkururî wa kîrîma na kûrî na gîkundi kîngî Kîam andû maûkîrîrîte njîrarî îrîa yumîte mûtîrî wa mûvuru wa oni maûndû!”

³⁸ Zebuli nîwacokire akîmwîra atîrî, “Waragia atîa? Kinthî tîwe waûririe nî tûtungatîra Abimeleki nîkî? Kinthî andû aya tîo warumire? Thiî rîu mûkarûe nao.”

³⁹ Nake Gaali nîwatongorerie andû a Shekemu na makîthiî kûrûa na Abimeleki.

⁴⁰ Gaali nîwatorokire nake Abimeleki akîmûvinyûria. Andû eengî nî maagwîre nthî marî ativangie nginya kîvingorî Kîam îtûûra.

⁴¹ Abimeleki nîwatûûrire Aruma, nake Zebuli akîngata Gaali na aa mûrwang'ina makiuma Shekemu na nîmaamagiririe matûûra kuo.

⁴² Mûthenya ûcio wîngî andû a Shekemu nîmaatwire atî nîmakûthiî mîgûndarî, na Abimeleki nîwaverwe ûvoro ûcio.

⁴³ Kwoguo nîwocire andû ake, akîmagaania ikundi ithatû na makîthiî kwîthitha na kûu mîgûndarî nîguo mameterere kuo. Rîrîa Abimeleki oonire andû maumîte îtûûrarî, nîwaumire kûrîa eethithîte nîguo amaûrage.

⁴⁴ Abimeleki na andû a gîkundi gîake nîmaavinyûrire makîthiî mbere nîguo makarangîre kîvingo gîa îtûûra, nacio ikundi icio ciîngî igîrî nîciatharîkîre andû arîa maarî na kûu mîgûndarî na makîmaûraga onthe.

⁴⁵ Abimeleki nîwarûire na andû a îtûûra rîu mûthenya wonthe. Nîwarîtavire na akîûraga andû a kuo, akîrîtharia agîcoka agîtûrûra cumbî kûndû kuonthe îtûûrarî rîu.

⁴⁶ Rîrîa andû arîa maatûûraga nyombarî îrîa ndaca ya Shekemu meegwire ûguo, nîmaathiîre na magîtonya nyombarî ya Eliberithi îrîa yarî ngitîre. Eliberithi yarî ngai yao.

⁴⁷ Abimeleki nîwerirwe atî andû onthe arîa matûûraga nyombarî îrîa ndaca ya Shekemu nîmaûnganîte vamwe.

⁴⁸ Kwoguo nîwaunûkirie Kîrîmarî Kîam Zalimoni marî na andû ake. Nîwocire îthanwa, agîtinia rûvûa rwa mûtî na akîrwigîrîra gîturorî gîake. Nîwacokire akîra andû acio maarî nake atîrî, “Îkani narua ûguo mwona neka.”

⁴⁹ Nao andû acio onthe nîmaatinirie mvûa, wa mûndû rwake. Nîmaacokire makîrûmîrîra Abimeleki na magîcigîrîra nyombarî îrîa yarî ngitîre, magîcoka makîmundia nyomba îo mwaki kûrî na andû ndaarî. Nao andû onthe arîa maarî nyombarî îo ndaca ya Shekemu arûme na aka ta ngiri îmwe nîmaakwire.

⁵⁰ Abimeleki nîwacokire akîthiî Thebezi, akîamba magema arigicîrîtie îtûûra rîu na akîrîtava.

⁵¹ Îtûûrarî rîu kwarî na nyomba ndaca yagitîrîtwe mûno. Nao andû onthe a îtûûra rîu, aka na arûme na atongoria ao nîmaatonyire kuo na makîîvingîra ndaarî na nîmaatwîre nginya îgûrû rîa nyomba îo.

⁵² Rîrîa Abimeleki aathiîre vakuvî na nyomba îo ndaca nîguo amîtharîkîre, nîwathiîre vakuvî na mûrango nîguo amîvîvie.

⁵³ Nwatî mûndûmûka ûmwe warî kuo nîwaikîrie Abimeleki îthiga rîa kîthîi na rîkûmûmondora îvîndî rîa kîongo.

⁵⁴ Wa rîmwe Abimeleki nîwacokire agîta mwanake ûrîa wamûkuuagîra indo ciake cia mbaara na akîmwîra atîrî, “Comora rûviû rwaku na ûmbûrage. Ndikwenda andû makauga atî naûragirwe nî mûndûmûka.” Nake mwanake ûcio nîwamûmundire akîmûtûrîkania na agîkua.

⁵⁵ Rîrîa Aisiraeli moonire atî Abimeleki nîwakua, onthe nîmaacokire wa mûndû gwake mûciî.

⁵⁶ Ûguo nîguo Ngai aarîvirie Abimeleki waganu ûrîa eekîte îthe rîrîa aûragithirie aa mûrwang'ina acio mîrongo mûgwanja.

⁵⁷ Ngai nîwacokire agîtûma andû a Shekemu manyitwe nî waganu wao o ene. Nîmaanyitirwe nî kîrumi kîrîa Jothamu mûvîcî wa Gideoni aarumanîte.