Atir 8 - ÎVUKU RÎA ÛVORO MWARO

Kûvootwa kwa mûthiia kwa Amidiani

¹ Andû a Efiraimu nîmaanegenire mûno makîûragia Gideoni atîrî, “Waregire gûtwîta nîkî vîndî îrîa wathiîre kûrûa na Amidiani? Watwîkire ûguo nîkî?”

² Nake Gideoni nîwamacokerie atîrî, “Ûrîa nekire ndûrî na vata ûringithanîtue na ûrîa mwîkîte. Ûndû mûnini ûrîa mue andû a Efiraimu mwekire, ûrî na vata gûkîra ûrîa andû onthe a mbarî yakwa mekîte.

³ Mbere ya maûndû monthe, vinya wa Ngai nîwamûvotithirie kûûraga anene aîrî a Midiani, Orebu na Zeebu. Nie mbîkîte ûndû ûrîkû ûngîgananua na ûcio?” Rîrîa Gideoni aaugire ûguo, marakara ma andû acio a Efiraimu nîmaathirire.

⁴ Vîndî îo Gideoni na andû ake magana mathatû maarî akinyu rûnjîrî rwa Jorodani na makarûringa. Maarî athiru vinya, nwatî nwa maarûmîrîrîtie nthû ciao na îvenya.

⁵ Rîrîa maakinyire Sukothu, Gideoni nîwerire andû a îtûûra rîu atîrî, “Namûthaitha, rûmiani andû akwa mîgate. Nîathiru vinya, na nûmîrîrîtie Zeba na Zalimuna, athamaki a Midiani na îvenya.”

⁶ Anene a Sukothu, nîmaaûririe Gideoni atîrî, “Nîtûva andû aku irio nîkî? We ndûrî ûratava Zeba na Zalimuna.”

⁷ Nake Gideoni nîwaugire atîrî, “Nîwaro mûno! Nîûndû wa ûguo mwauga, rîrîa Ngai-Mûnene akaarekereria Zeba na Zalimuna kûrî nie, ngaamûmundanga na mîgua ya werûrî na nthaugû!”

⁸ Gideoni nîwaumire kûu akîthiî Penueli na akîûria andû a kuo mamwîkîre ûndû wata ûcio. Nwatî andû a Penueli nîmaamûcokerie wata ûrîa andû a Sukothu maamûcokeretie.

⁹ Nîwacokire akîra andû a Penueli atîrî, “Vîndî îrîa ngaacoka nîrî na thayû, nîngoomomora nyomba îno yenyu ndaca na îgûrû!”

¹⁰ Zeba na Zalimuna maarî kûu Karikori marî na athigari ao a mbaara. Gatagatîrî ka athigari onthe a mbaara a mîvîrîga ya mwena wa îrathîro, athigari ngiri îkûmi na ithano tu nîo maatigarire. Athigari ngiri îgana rîmwe rîa mîrongo îrî maarî aûrage.

¹¹ Gideoni nîwathiîrîre njîrarî ya andû arîa matûûraga magemarî, erekerete mwena wa îrathîro wa Noba na Jogibeha na akîtharîkîra athigari acio a mbaara wa rîmwe matakûmenya.

¹² Zeba na Zalimuna nîmaatorokire, nwatî Gideoni nîwamavinyûririe na akînyita athamaki acio a Midiani wa oîrî na nîwatûmire mbûtû ciao cionthe cia mbaara ciîgue guoya.

¹³ Rîrîa Gideoni aacokete kuuma mbaararî, nîwavîtûkîrîre njîrarî îrîa yunûkîtie îthiîte Heresi.

¹⁴ Nîwanyitire mwanake wa kuuma Sukothu na akîmûria ûvoro. Nake mwanake ûcio nîwandîkîre Gideoni marîîtwa ma atongoria na athuuri a Sukothu. Nao maarî arûme mîrongo mûgwanja na mûgwanja (77).

¹⁵ Gideoni nîwathiîre kûrî andû a Sukothu na akîmeera atîrî, “Taririkanani rîrîa mwaregire kûva andû akwa irio rîrîa maathirîte vinya, na mûkînyûrûria mûkîmbîîra atî ndiarî mûtavu Zeba na Zalimuna. Rîu nîo aya!”

¹⁶ Gideoni nîwacokire agîoca mîgua ya werûrî na nthaugû na akîverithia atongoria acio a Sukothu na mînyamû îo.

¹⁷ Nîwacokire akîtharia rûthingo rwa nyomba îo ndaca na îgûrû na akîûraga andû a îtûûra rîu.

¹⁸ Gideoni nîwacokire akîûria Zeba na Zalimuna atîrî, “Nao andû arîa mwaûragire Taboru marî kû?” Nao Zaba na Zalimuna nîmaacokirie atîrî, “Maavaneene nawe. Wa ûmwe wa ciao aavaana ta mûvîcî wa mûthamaki.”

¹⁹ Gideoni nîwaugire atîrî, “Maarî aa mûrwaiya, na twarî a ng'ina ûmwe nao. Nînîvîta na Ngai-Mûnene ûrîa ûtûûraga mwoyo atî kethîrwa mûtiamaûraga, ndingîmûûraga.”

²⁰ Nîwacokire akîra Jetheri mûvîcî ûrîa warî îrikithathi atîrî, “Ûkîra ûmaûrage!” Nwatî mwanake ûcio ndaacomora rûviû rwake. Nîwetigagîra nîûndû aarî mwanake mûnini.

²¹ Zeba na Zalimuna nîmeerire Gideoni atîrî, “Ûkîra ûtûûrage arî we. Ûkîra ûtûrage ethîrwa ûrî mûndûmûrûme.” Kwoguo Gideoni nîwaûkîrire na akîûraga Zeba na Zalimuna. Nîwacokire akîruta mîkathî îrîa yarî ngingorî cia ngamîîra ciao na akîthiî nayo.

²² Vuva wa ûguo, andû a Isiraeli nîmeerîre Gideoni atîrî, “Tuîka mwathi wetû, we na njiarwa ciaku, nîûndû nîûtûvonoketie kuuma kûrî Amidiani.”

²³ Nwatî Gideoni nîwacokirie atîrî, “Nie ndigûtuîka mwathi wenyu, wana mûvîcîwa ndagûtuîka mwathi wenyu. Ngai-Mûnene nîke ûgûtuîka mwathi wenyu.”

²⁴ Gideoni nîwathiîre mbere na kûmeera atîrî, “Mbîtîkîriani nîmûvoye kîndû kîmwe. Nakîo nî atî: Wa ûmwe wa cienyu nîamve icûvî cia matû irîa aatavire.” (Amidiani maarî na icûvî cia matû cia thaavu nîûndû maarî Aishumaeli.)

²⁵ Nao nîmaacokirie atîrî, “Nîtûgûkûnengera cio tûkenete.” Nîmaarire gîtambaa nthî na andû onthe nîmaaikirie icûvî vo cia matû irîa maatavîte.

²⁶ Icûvî cia matû cia thaavu irîa Gideoni eetirie ciarî na ûrito wa vakuvî kilo mîrongo îîrî (20 kg) gûtatarîtwe mînyamû îrîa yacuragua ngingorî cia ngamîîra, mîkathî ya ngingo, na nguo cia rangi wa njambarawe irîa ciekagîrwa nî athamaki a Midiani.

²⁷ Gideoni nîwarûthire mûvuanano wa thaavu icio na akîwiga Ofira, îtûûrarî rîake. Nao Aisiraeli onthe nîmaatiganîrie Ngai na makîambîrîria kûmîgooca. Nayo nîyatuîkire mûtego kûrî Gideoni na andû a mûciî wake.

²⁸ Kwoguo Amidiani nîmaavootirwe nî Aisiraeli na matiacoka kûrûa rîngî. Vûrûri nîwagîre thayû îvinda rîa mîaka mîrongo îna, nginya rîrîa Gideoni aakwire.

Gûkua kwa Gideoni

²⁹ Gideoni mûvîcî wa Joashi nîwacokire gwake mûciî na agîtûûra kuo.

³⁰ Gideoni aarî na avîcî mîrongo mûgwanja, nîûndû aarî na aka eengî.

³¹ Mûndûmûka ûrîa aaigîte aatûûraga Shekemu, wanake nîwamûciarîrîte kavîcî na agîgatuîra rîîtwa Abimeleki.

³² Gideoni mûvîcî wa Joashi nîwakwire arî mûkûrû mûno na akîthikwa mbîrîrarî ya îthe Joashi kûu Ofira. Ofira rîarî îtûûra rîa mûvîrîga wa Abiezeri.

³³ Gideoni arîkia gûkua, andû a Isiraeli nîmaatigire kwîvoka Ngai rîngî na makîambîrîria kûgooca Baali. Nîmaatuire Baali-berithu ngai yao.

³⁴ Andû a Isiraeli matiacoka kûririkana Ngai-Mûnene, Ngai wao, ûrîa wamavonoketie kuuma kûrî nthû ciao cionthe irîa ciamathiûrûrûkîrîtie mîena yonthe.

³⁵ Wana matiacokeria andû a mûciî wa Gideoni ngatho nîûndû wa maûndû monthe marîa Gideoni eekîrîte andû a Isiraeli.