Atir 7 - ÎVUKU RÎA ÛVORO MWARO

Gideoni nîwavootire Amidiani

¹ Mûthenya ûmwe Gideoni na andû onthe arîa maarî vamwe nake nîmaaramûkire kîraûko tene na makîamba magema vakuvî na kîthima Kîam Harodi. Nao Amidiani mambîte magema mao Kîamndarî mwena wao wa rûgûrû kîrîmarî Kîam More.

² Ngai-Mûnene nîwerire Gideoni atîrî, “Andû acio wî nao nî engî mûno na ndingîmavotithia kûvoota Aamidiani. Aisiraeli mavota gwîciiria atî mavootanîte na vinya wao o ene, na marege kûndîîa.

³ Kwoguo anîrîra kûrî andû onthe ûmeere atîrî, ‘Mûndû wa wonthe ûretigîra nîacoke mûciî.’ ” Nao andû ngiri mîrongo îrî na igîrî nîmaacokire mûciî, nwatî andû ngiri îkûmi nîmaatigirwe kuo.

⁴ Ngai-Mûnene nîwacokire akîra Gideoni atîrî, “Andû aya nwa engî mûno wana rîu. Mavire rûtererî rwa rûnjî na nîngûmagereria vo vandûrî vaku. Mûndû ûrîa ngakwîra mûthiî nake, mûkathiî nake; na mûndû ûrîa ngakwîra mûtikathiî nake, mûtikathiî nake.”

⁵ Kwoguo Gideoni nîwavirire andû rûtererî rwa rûnjî, na Ngai-Mûnene akîmwîra atîrî, “Andû arîa onthe makaanyua manjî ûrîa ngui înyunyaga ûmamûranie na andû arîa makaanyua manjî maturîtie maru.”

⁶ Andû arîa maatavire manjî na mvî maarî andû magana mathatû. Andû acio engî onthe maanyuire manjî maturîtie maru.

⁷ Ngai-Mûnene nîwerire Gideoni atîrî, “Nîngamûvotithia kûvoota Amidiani mûrî na andû magana mathatû acio maatavire manjî na mvî na makînyua. Îra andû acio engî onthe menûke.”

⁸ Kwoguo Gideoni nîwatigirwe marî na andû acio magana mathatû, arîa maatigîrwe irio cionthe na tûrumbeta na akîngata Aisiraeli acio engî onthe. Amidiani maambîte magema mao ngurumo yao kûu Kîamndarî.

⁹ Ûtukû wa ûcio Ngai-Mûnene nîwerire Gideoni atîrî, “Ûkîra na ûnyûrûrûke ûkatharîkîre Amidiani, nîngûkûvotithia kûmavoota.

¹⁰ Nwatî ethîrwa nî ûretigîra, oca ndungata yaku Pura mûthiî nayo kûu Amidiani mambîte magema mao,

¹¹ na nîûkwîgua ûrîa andû acio marî kuo marauga. Vuva wa ûguo nîûkûmîrîria na ûvote kûtharîkîra andû acio.” Kwoguo Gideoni na ndungata yake Pura nîmaanyûrûrûkire na magîkinya kûrî Amidiani arîa maarî na indo cia mbaara.

¹² Amidiani, Amaleki na andû onthe a mwena wa îrathîro maanyagarûkîte kûu Kîamndarî ta gîtutu Kîam ngige na maarî na ngamîîra nyîngî ta mûthanga ûrîa wîthagîrwa ûrî rûtererî rwa îria.

¹³ Rîrîa Gideoni aakinyire, nîwegwire mûndû ûmwe akîra mûratawe ûvoro wîgiî kîroto. Aamwîraga atîrî, “Nîrarotaga atî mûgate wa cairi ûvingiritîte ûgaûka kûrîa twambîte magema na ûkaringa îgema. Îgema nîrîragûîre na rîkînyagarûka vau nthî.”

¹⁴ Nake mûratawe nîwamûcokerie atîrî, “Rûrû nwa rwîthîrwe rûrî rûviû rwa Gideoni mûvîcî wa Joashi! Kîroto kîu gîtingîonania ûndû wîngî! Ngai nîamûvotithîtie kûvoota Amidiani vamwe na athigari etû onthe a mbaara!”

¹⁵ Rîrîa Gideoni eegwire kîroto kîu Kîam mûndû ûcio na ûrîa kîonanagia, nîwenamîrîre na akîgooca Ngai-Mûnene. Nîwacokire akîthiî kûrîa Aisiraeli maambîte magema mao na akîmeera atîrî, “Ûkîrani! Ngai-Mûnene nîamûvotithîtie kûvoota andû a Midiani!”

¹⁶ Gideoni nîwagaanirie andû arîa ake magana mathatû ikundi ithatû. Nîwacokire akîva wa mûndû karumbeta na nyûngû îrî na kîmûrî ndaarî.

¹⁷ Nîwamerire atîrî, “Rîrîa ngakinya vakuvî na magema ma Amidiani, mûkandoria na mûgeka ûrîa mûkona ngîka.

¹⁸ Rîrîa ngavuva karumbeta tûrî na andû a gîkundi gîakwa, wa namue mûkavuva tûrumbeta twenyu mîena yonthe ya magema ma Amidiani mûkiugaga atîrî, ‘Kûrî Ngai-Mûnene na kûrî Gideoni!’ ”

¹⁹ Kwoguo Gideoni na andû ake îgana rîmwe nîmaakinyire vakuvî na magema ma Amidiani thaa thita cia ûtukû ithiîte gûkinya. Vîndî îo nîrîo arangîri maarî marîkia gûcenjania. Gideoni na andû ake nîmaavuvire tûrumbeta na makîûraga nyûngû irîa maanyitîte.

²⁰ Nao andû a ikundi icio ciîngî igîrî nîmeekire wa ûguo. Onthe maanyitîte imûrî na njara cia ûmotho, natuo tûrumbeta manyitîte na njara cia ûrîo, makiugagîrîria atîrî, “Îno nî mbaara ya Ngai-Mûnene na ya Gideoni!”

²¹ Nao nîmaarûngamire wa mûndû varîa aarî marigicîrîtie magema ma Amidiani mîena yonthe. Nao athigari onthe a mbaara a Midiani nîmaaûrire makîrîraga.

²² Vîndî wa îo andû a Gideoni maavuvaga tûrumbeta, Ngai-Mûnene nîwatûmire andû a Midiani matemangane na mviû ciao. Nîmaathiîre merekerete Zarethani nginya magîkinya Bethishita, na îtûûrarî rîa Abeli-mehola vakuvî na Tabathi.

²³ Nao Aisiraeli a kuuma mîvîrîgarî ya Nafutali, Asheri na Manase nîmaarûmîrîre Amidiani na îvenya.

²⁴ Gideoni nîwatûmire anjaama vûrûrirî wonthe ûrîa ûrî irîma wa Efiraimu makauge atîrî, “Nyûrûrûkani mûkarûe na Amidiani. Nyitani mariûko ma manjî nginya Bethibara kûu Jorodani nîguo Amidiani matikaringe.” Kwoguo andû onthe a Efiraimu nîmaaûnganire vamwe, na makînyita mariûko mau monthe nginya Bethibara kûu Jorodani.

²⁵ Nîmaanyitire anene aîrî a Midiani, Orebu na Zeebu. Nîmaacokire makîûragîra Orebu îthigarî rîa Orebu, nake Zeebu makîmûragîra kîvivîrorî Kîam ndivei Kîam Zeebu. Nîmaathiîre na mbere kûrûmîrîria Amidiani na makîvirîra Gideoni ciongo cia Orebu na Zeebu. Vîndî îo Gideoni aarî mwena wa îrathîro wa Rûnjî rwa Jorodani.