Atir 6 - ÎVUKU RÎA ÛVORO MWARO

Gideoni nîwathuurirwe

¹ Andû a Isiraeli nîmeevîrie Ngai-Mûnene rîngî. Kwoguo Ngai-Mûnene nîwamarekererie wathanirî wa andû a Midiani îvinda rîa mîaka mûgwanja.

² Andû a Midiani maarî na vinya gûkîra Aisiraeli. Nao Andû a Isiraeli nîmeethithire ngurungarî na kûndû kwîngî kûu irîmarî.

³ Vîndî cionthe Aisiraeli mangîavandire mbeû, andû a Midiani na Amaleki vamwe na andû arîa maatûûraga werûrî mwena wa îrathîro nîmaathiîcaga na makamatharîkîra.

⁴ Nîmaatumire magema vûrûrirî wa Aisiraeli na magîcûkangia irio irîa ciarî mîgûndarî kûndû kuonthe kûrîa kûriganîtie na Gaza. Nîmaathiîre na ng'ondu cionthe, ng'ombe, na mvunda na matiatiga kîndû wanarî kîmwe kûngîtûûria Aisiraeli mwoyo.

⁵ Maathiîre vûrûrirî wa Isiraeli na ng'ombe ciao, wana magema mao. Maathiîre vûrûrirî ûcio mengîvîte ta ngige. Andû acio o ene vamwe na ngamîîra ciao matiatarîkaga nîûndû wa kwîngîva. Maatonyire vûrûrirî nîguo maûcûkangie viû.

⁶ Aisiraeli nîmaavootirwe nî Amidiani, na nîmaarîrîre Ngai-Mûnene amatethie.

⁷ Rîrîa Aisiraeli maarîrîre Ngai-Mûnene nîûndû wa Amidiani,

⁸ Ngai-Mûnene nîwamatûmîre mûrathi ameere atîrî, “Ngai-Mûnene, Ngai wa Isiraeli arauga atîrî, ‘Nînie naamûrutire ûkomborî vûrûrirî wa Misiri.

⁹ Nînie naamûvonokirie kuuma kûrî andû a Misiri, wana kûrî andû onthe arîa maamûvinyagîrîria. Nînamengatire ngîcoka ngîmûva vûrûri wao.

¹⁰ Naamwîrire atî, Nînie Ngai-Mûnene, Ngai wenyu na mûtikagooce ngai cia Aamoni, arîa ene vûrûri ûyû mûtûîre. Nwatî mûtianthikîrîria.’ ”

¹¹ Mûraika wa Ngai-Mûnene nîwacokire akîthiî gîcagirî Kîam Ofira, na agîkara nthî rungu rwa mûtî wa mûvuru. Mwene mûtî ûcio aarî Joashi, wa kuuma kûrî mbarî ya Abiezeri. Vîndî îo mûvîcî Gideoni avûûraga ngano ethithîte kîvivîrorî Kîam ndivei nîguo ndakonwe nî Amidiani.

¹² Mûraika wa Ngai-Mûnene nîwamumîrîre arî vau na akîmwîra atîrî, “Ngai-Mûnene arî nawe, njamba îno îrî vinya.”

¹³ Nake Gideoni nîwamwîrire atîrî, “We Mwathi wakwa, ethîrwa Ngai-Mûnene arî vamwe natue rî, nîndûî gîtûmîte maûndû ta mama monthe mekîke kûrî tue? Namo maûndû ma kûgegania marî kû, marîa methe metû maatwîraga ûvoro wamo rîrîa maaugaga ûrîa Ngai-Mûnene aamarutire Misiri? Nwatî rîu Ngai-Mûnene nîatûtiganîrîtie na agatûrekereria kûrî Amidiani.”

¹⁴ Nake Ngai-Mûnene nîwamwathire na akîmwîra atîrî, “Thiî na vinya ûcio waku na ûvonokie Aisiraeli kuuma kûrîa Amidiani. Nînie nagûtûma.”

¹⁵ Gideoni nîwacokirie atîrî, “Mwathani, nîngîvonokia Aisiraeli atîa? Mbarî yetû nîyo îtarî vinya mûvîrîgarî wa Manase, na kûrî andû onthe nyombarî ya vava nie ndirî îgweta.”

¹⁶ Nake Ngai-Mûnene nîwamûcokerie atîrî, “Nîûgwîka guo nîûndû ngethîrwa nîrî vamwe nawe. Ûgacûkangia andû a Midiani takwa marî mûndû ûmwe.”

¹⁷ Gideoni nîwacokirie atîrî, “Ethîrwa nîrî mwîtîkîrîku mbere yaku, monia rûûri rwa kûmenyithia atî nîwe ûraria.

¹⁸ Nakûthaitha ndûkaume ava nginya rîrîa ngaacoka, nîguo ngûretere îtega.” Nake mûraika nîwacokirie atîrî, “Nîmbîkara ava nginya rîrîa ûgaaûka.”

¹⁹ Kwoguo Gideoni nîwathiîre gwake nyomba na akîruga koori na agîtûmîra kilo îkûmi cia mûtu kûruga mîgate îtarî mîkîre ndawa ya kwimbia. Nîwekîrire nyama gîkavurî, agîcoka agîkîra mûthûri nyûngûrî na akîvirîra mûraika wa Ngai-Mûnene vau aarî gîtinarî Kîam mûtî wa mûvuru.

²⁰ Mûraika wa Ngai-Mûnene nîwerire Gideoni atîrî, “Igîrîra nyama na mîgate îthigarî rîîrî, ûcoke wîtîrîrie mûthûri îgûrû rîacio.” Nake Gideoni nîwekire guo.

²¹ Mûraika wa Ngai-Mûnene nîwacokire akîvutia nyama na mîgate îo na mûthiia wa mûragi ûcio aanyitîte na njara. Naguo mwaki nîwaumire îthigarî rîu na ûkîvîvia nyama na mîgate îo îtaarî mîkîre ndawa ya kwimbia; Mûraika wa Ngai-Mûnene nîwacokire akîûrîra.

²² Gideoni nîwamenyire atî nî mûraika wa Ngai-Mûnene oonete, na nîwaugire arî na guoya atîrî, “Ûûi, Mwathani Ngai-Mûnene! Nîneyonera Mûraika waku na metho makwa!”

²³ Nwatî Ngai-Mûnene nîwamwîrire atîrî, “Gîa na thayû. Tiga kûmaka. Tîûkua.”

²⁴ Gideoni nîwatumîre Ngai-Mûnene metha ya kîgongoona vau, na akîmîtuîra rîîtwa, “Ngai-Mûnene nî thayû.” Metha îo ya kîgongoona îtwîre kûu îtûûrarî rîa Ofira kwa mbarî ya Abiezeri.

²⁵ Ûtukû ûcio Ngai-Mûnene nîwerire Gideoni atîrî, “Oca ndegwa ya aguo na ndegwa îngî ya ûkûrû wa mîaka mûgwanja. Womomore metha ya aguo ya kîgongoona Kîam Baali na ûtemange mûvuanano wa ngai ya Ashera ûcio ûrî vakuvî nayo.

²⁶ Tumîra Ngai-Mûnene, Ngai waku metha mbaro ya kîgongoona vo, na woce ndegwa ya kaîrî na ûmîvîvie îrî îtega rîa kûvîvua. Ûcoke ûtûmîre icunjî icio ûgûtemanga cia mûvuanano wa ngai ya Ashera irî ngû.”

²⁷ Kwoguo Gideoni nîwocire ndungata imwe ciake îkûmi na agîka wata ûrîa Ngai-Mûnene aamwîrîte. Nwatî ndeeka ûguo mûthenya nîûndû nîwetigagîra andû a mûciî wake na andû a îtûûra. Kwoguo eekire ûguo ûtukû.

²⁸ Rîrîa andû a îtûûra maaramûkire kîraûko tene mûthenya ûcio warûmîrîrîte, nîmeethîrîrie metha ya kîgongoona ya Baali na mûvuanano wa ngai ya Ashera irî nyomomore. Nîmacokire makîona ndegwa ya kaîrî îrî mvîvîrie metharî ya kîgongoona îrîa yatumîtwe kuo.

²⁹ Nao nîmaaûranirie atîrî, “Nû wîkîte ûguo?” Nîmaaûrîrîrie na makîmenya atî nî Gideoni mûvîcî wa Joashi wekîte guo.

³⁰ Andû a îtûûra rîu nîmaacokire makîra Joashi atîrî, “Ruta mûvîcîguo na gûkû nja tûmûrage, nîûndû nîomomorete metha ya kîgongoona ya Baali na agatemanga mûvuanano wa Ashera ûrîa ûrarî vakuvî nayo.”

³¹ Nwatî Joashi nîwerire andû acio onthe maaragia nake atîrî, “Nîkwa mûrarîrîria Baali? Nîmûkûmûgitîra? Mûndû wa wonthe ûkûmwarîrîria nwanginya aûragwe mbere ya gûkîe. Ethîrwa Baali nî ngai, tiga eyarîrîrie ke mwene nîûndû nî metha yake ya kîgongoona yomomoretwe.”

³² Kuuma vîndî îo, Gideoni nîwambîrîrie gwîtwa Jerubaali, nîûndû Joashi nîwaugire atîrî, “Tiga Baali eyarîrîrie ke mwene nîûndû nî metha yake ya kîgongoona yomomoretwe.”

³³ Amidiani onthe; Amaleki na andû arîa maatûûraga mwena wa îrathîro nîmaacokire makîûngana vamwe. Nîmaaringire Jorodani na makîamba magema Kîamndarî Kîam Jezireeli.

³⁴ Gideoni nîwatonyirwe nî Roho wa Ngai-Mûnene, na nîwavuvire karumbeta agîta andû a mbarî ya Abiezeri mamûrûmîrîre.

³⁵ Nîwatûmire anjaama mathiî vûrûrirî wonthe wa Manase. Nao nîmaaûnganire vamwe na makîmûrûmîrîra. Nîwatûmire anjaama kûrî andû a mîvîrîga ya Asheri, Zebuluni, na Nafutali, nao nîmaathiîre kûmûtûnga.

³⁶ Gideoni nîwacokire akîra Ngai atîrî, “Ethîrwa nîûkûvonokia Isiraeli na njîra yakwa wata ûrîa ugîte,

³⁷ taroria, nîngwiga guoya wa ng'ondu îtîrirî rîa ngano. Ethîrwa kîraûko îme rîkethîrwa rîrî guoyarî tu nayo nthî îthîrwe îrî nyûmû, nîrîo ngamenya atî nîûkavonokia Aisiraeli na njîra yakwa.”

³⁸ Ûguo nîguo gwekîkire. Rîrîa Gideoni aaramûkire kîraûko tene mûthenya ûcio warûmîrîrîte nîwavivire guoya îo, narîo îme rîrîa rîarî guoyarî îo rîgîcûra mbakûrirî ya manjî.

³⁹ Gideoni nîwacokire akîîra Ngai rîngî atîrî, “Ndûkandakarîre, tiga mbuge ûndû ûmwe tu rîngî. Nakûthaitha ûmbîtîkîrie ngerie guoya îno riita rîngî rîmwe. Vîndî îno, tiga guoya îno îthîrwe îrî nyûmû, nayo nthî îthîrwe îrî na îme.”

⁴⁰ Nake Ngai nîwekire ûguo ûtukû wa ûcio. Kîraûko kîu kîngî guoya yarî nyaru, nwatî nthî yarî na îme.