Atir 5 - ÎVUKU RÎA ÛVORO MWARO

Rwîmbo rwa Debora na Baraki

¹ Mûthenya ûcio Debora na Baraki, mûvîcî wa Abinoamu nîmaainire rwîmbo rûrû:

² Ngai-Mûnene arokumua! Aisiraeli maarî erutîru kûrûa; Andû nîmeerutîre makenete.

³ Tathikîrîriani, mue athamaki! Tathikîrîriani, mue atongoria! Nîngwina, nîngwina, nîngwinîra Ngai-Mûnene wa Isiraeli rwîmbo.

⁴ Ngai-Mûnene, rîrîa waumire irîmarî cia Seiru, rîrîa waumire vûrûri wa Edomu, nthî nîyainainire na mbura îkiura kuuma îgûrû. Îî matu nîmaaurithirie mbura.

⁵ Irîma nîciainainire mbere ya Ngai-Mûnene wa Sinai, mbere ya Ngai-Mûnene, Ngai wa Isiraeli.

⁶ Vîndî ya Shamugari mûvîcî wa Anathu, na vîndî ya Jaeli, ikaari cia mbaara nîciatigire kûvîtûkîrîra vûrûrirî, andû arîa maathiîcaga na magûrû, maathiîcagîra rûtere rwa njîra.

⁷ Arîmi nîmaathirîte Isiraeli, nîmaathirîte, nginya rîrîa we Debora waûkire, wîkariî ta ng'ina wa Isiraeli.

⁸ Nîgwacokire gûkîgîa mbaara vûrûrirî, rîrîa Aisiraeli maathuurire ngai ciîngî. Gatagatîrî ka arûme ngiri mîrongo îna a Isiraeli, kwanoneka ngo kana îtumû?

⁹ Ngoro yakwa yerekerete atongoria a Isiraeli, arîa meerutîre makenete gatagatîrî ka andû. Ngai-Mûnene arokumua!

¹⁰ Vecanani ûvoro mue mûthiîcaga mûtwîte mvunda ino njerû, mue mwîkarîrîte matandîko ma mbarathi, namue mûthiîcaga na magûrû, vecanani ûvoro.

¹¹ Tathikîrîriani! Acio maranegena marî ithimarî cia manjî, marauga ûrîa Ngai-Mûnene avootanîte, ûvootani wa andû a Isiraeli! Nao andû a Ngai-Mûnene nîmaaumire matûûrarî mao.

¹² Ûkîra, ûkîra, Debora! Ûkîra! Ûkîra! Ina rwîmbo! Rûngama, Baraki mûvîcî wa Abinoamu, tongoreria mîgwate yaku mûthiî!

¹³ Andû arîa etîkia nîmaathiîre kûrî anene ao, andû a Ngai-Mûnene nîmaathiîre kûrî ke, meevarîrîtie kûrûa na andû arîa njamba.

¹⁴ Nîmaaumire Efiraimu makîthiî Kîamndarî, marûmîrîrîtie andû ao a mûvîrîga wa Benjamini. Atongoria a mbaara nîmaaumire Makiru, anene a mbaara nîmaaumire Zebuluni.

¹⁵ Atongoria a Isakaru maaûkire na Debora, Baraki nîwaûkire na Isakaru nîwaûkire, nîmaamûrûmîrîre na kûu Kîamndarî. Nwatî andû a mûvîrîga wa Reubeni, matiarî atuu ciira ûrîa magwîka.

¹⁶ Nîndûî gîatûmire mekare nyombarî cia ng'ondu? Nîguo mathikîrîrie mûrîthi agîta ndîthia? Andû a mûvîrîga wa Reubeni matiarî atuu ciira.

¹⁷ Mûvîrîga wa Gadi wekarire mwena wa îrathîro wa Jorodani, naguo mûvîrîga wa Dani nîwekarire vakuvî na Meri. Mûvîrîga wa Asheri nîwekarire vakuvî na îria, nîmeekarire rûtererî rwa îria.

¹⁸ Andû a Zebuluni na Nafutali nîo meevirire ûgwatirî wa gîkuû marî mbaararî.

¹⁹ Athamaki nî maaûkire na makîrûa mbaara, athamaki a Kanaani maaûkire na makîrûa. Maarûîre Taanaki vakuvî na karûnjî ka Megido; nwatî matiatava wanarî sîlûva.

²⁰ Njata nîciarûire irî îgûrû, nîciarûire na Sisera irî varîa ithiîcagîrîra.

²¹ Mwîcûro wa manjî ma Kishoni nîwamatwarire, mwîcûro warî na vinya wa rûnjî rwa Kishoni. Nîngaathiî na mbere, nîngaathiî na mbere na vinya.

²² Mavûngû ma mbarathi nîmaarumirie nthî, nîûndû wa ûrîa ciarûgarûgaga na vinya.

²³ Mûraika wa Ngai-Mûnene arauga atîrî, “Îtûûra rîa Merozu rîronyitwa nî kîrumi, andû arîa matûûraga kuo maronyitwa nî kîrumi. Nîûndû matiaûka gûtethia Ngai-Mûnene, kûrûa na andû arîa marî vinya.”

²⁴ Jaeli nîke mûndûmûka ûrîa mûrathime kûrî aka onthe, mûka wa Heberi, ûrîa Mûkeni, nîke mûndûmûka mûrathime mûno, kûrî aka onthe arîa matûûraga magemarî.

²⁵ Sisera aavoire manjî, nwatî Jaeli aamûkundirie îriia, nîwamûvirîre kîrimû kîrî mbakûrirî ta cia athamaki.

²⁶ Nîwocire nthugî ya îgema na njara îmwe, na nyondo ya mûruti wîra na njara ya ûrîo. Nîwaringire Sisera na akîmûtomboora îvîndî rîa kîongo; nîwamûtomborire na akîmûmunda kîongo.

²⁷ Nîwenamîrîre magûrûrî make, nîwagwîre nthî na akîmama, nîwagwîre nthî magûrûrî make na agîkua.

²⁸ Ng'ina wa Sisera nîwarorererie ndiricarî, nîwarîrire arî vuva wa ndirica akîûria atîrî, “Nîkwa ngari yake ya mbaara yacererwa kû îtarî nginyu? Nîkwa mbarathi ciake itaracokanga nîkî?”

²⁹ Aka arîa aûgî mûno nîmaamûcokerie, na nîwekarire akîîririkanagia atîrî,

³⁰ “Nîkwa maracaria indo nîguo maitave na magaanie, wa mûndûmûka ûmwe kana aîrî varî mûthigari ûmwe, magîcarîria Sisera nguo cia goro, mîkathî îîrî yakwa ya ngingo îrî mîgemie.”

³¹ Ngai-Mûnene, nthû ciaku irokua wa ûguo, nwa arata aku maroîthîrwa mekariî ta riûa rîkîratha! Naguo vûrûri ûcio nîwagîre thayû îvinda rîa mîaka mîrongo îna.