Atir 4 - ÎVUKU RÎA ÛVORO MWARO

Debora na Baraki

¹ Rîrîa Ehudi aakwire, andû a Isiraeli nîmeevîrie Ngai-Mûnene rîngî.

² Kwoguo Ngai-Mûnene nîwamarekererie makîvootwa nî mûthamaki Jabini wa Kanaani. Jabini aathanaga arî îtûûrarî rîa Hazoru. Mûtongoria wa athigari ake eetagwa Sisera, na aatûûraga Haroshethu-hagoimu.

³ Jabini aarî na ikaari magana kenda cia mbaara cia cuuma na nîwavinyîrîrie andû a Isiraeli îvinda rîa mîaka mîrongo îrî. Nao Aisiraeli nîmaakaîre Ngai-Mûnene amavonokie.

⁴ Nake Debora mûka wa Lapidothu aarî mûrathi na nîke watiragîrîra Aisiraeli vîndî îo.

⁵ Aamenyerete gwîkara nthî rungu rwa mûtî wa mûkîndû ûrîa warî gatagatî ka Rama na Betheli vûrûrirî ûrîa ûrî irîma wa Efiraimu. Nao andû a Isiraeli nîmaathiîcaga gûtuithanua ciira nîke.

⁶ Nîwatûmanire Baraki mûvîcî wa Abinoamu wa îtûûra rîa Kadeshi vûrûrirî wa Nafutali na akîmwîra atîrî, “Ngai-Mûnene, Ngai wa Isiraeli akwathîte atîrî, ‘Thiî woce arûme ngiri îkûmi kuuma mîvîrîgarî ya Nafutali na Zebuluni na ûmatongorie mûthiî kîrîmarî gîa Taboru.

⁷ Nanie nîngaatûma Sisera mûnene wa athigari a Jabini aûke mûrûîre nake vau rûnjîrî rwa Kishoni. Nîagaaûka na ikaari ciake cia mbaara na athigari ake, nwatî ngaatûma mûmûvoote.’ ”

⁸ Nake Baraki nîwerire Debora atîrî, “Ethîrwa nîûkûthiî wananie nîngûthiî, nwatî ethîrwa tîûthiî wananie tînthiî.”

⁹ Debora nîwacokerie Baraki atîrî, “Nîngwîtîkîra tûthiî nawe, nwatî ûmenye twathiî nawe tîwe ûkûgîa gîtîîo nîûndû wa kûvootana nîûndû Ngai-Mûnene akavecana Sisera kûrî mûndûmûka.” Kwoguo Debora na Baraki nîmaathiîre Kadeshi.

¹⁰ Baraki nîwacokanîrîrie andû a mîvîrîga ya Zebuluni na Nafutali kûu Kadeshi na arûme ngiri îkûmi nîmaamûrûmîrîre wana Debora nîmaathiîre nake.

¹¹ Vîndî îo Heberi ûrîa Mûkeni nîwatiganîte na Akeni arîa engî arîa maarî njiarwa cia Hobabu ûrîa warî mûthoniwe wa Musa. Heberi aambîte îgema rîake mûtîrî wa mûvuru vau zananimu vakuvî na Kedeshi.

¹² Rîrîa Sisera aamenyire atî Baraki mûvîcî wa Abinoamu nîmûthiîu kîrîmarî gîa Taboru,

¹³ nîwaûnganirie ikaari ciake magana kenda (900) cia mbaara cia cuuma, na andû onthe arîa maarî nake maume Haroshethu-hagoimu mathiî rûnjîrî rwa Kishoni.

¹⁴ Debora nîwacokire akîra Baraki atîrî, “Thiî! Ngai-Mûnene nîagûgûtongoria! Ûmûnthî nîagûkûvotithia kûvoota Sisera.” Kwoguo Baraki nîwaumire kîrîmarî gîa Taboru arûmîrîrîtwe nî andû acio ngiri îkûmi.

¹⁵ Rîrîa Baraki na athigari ake maatharîkîre Sisera, Ngai-Mûnene nîwatûmire Sisera na ikaari ciake cia mbaara vamwe na andû ake mavîngîcîke. Sisera nîwaumire ngarirî yake ya mbaara na akîûra na magûrû.

¹⁶ Baraki nîwarûmîrîrie ikaari cia Sisera cia mbaara vamwe na andû ake nginya Haroshethu-hagoimu. Athigari onthe a Sisera nîmaaûragirwe na gûtirî wanarî ûmwe wao watigarire.

¹⁷ Sisera nîwaûrire akîthiî îgemarî rîa Jaeli mûka wa Heberi ûrîa Mûkeni, nîûndû kwarî na thayû gatagatî ka Jabini mûthamaki wa Hazoru na andû a mûciî wa Heberi.

¹⁸ Jaeli nîwathiîre gûtûnga Sisera na akîmwîra atîrî, “Vîtûka ûtonye îgemarî rîakwa mwathi wakwa. Ndûgetigîre.” Kwoguo Sisera nîwatonyire îgemarî na Jaeli akîmûkunîka na mûrengeti.

¹⁹ Sisera nîwerire Jaeli atîrî, “nakûthaitha ngundia manjî nyue, nîrî mûnyondu.” Nake Jaeli nîwavingûrire mbooro yake ya îriia, akîmûkundia na akîmûkunîkîra na mûrengeti rîngî.

²⁰ Sisera nîwerire Jaeli atîrî, “Rûngama mûromorî wa îgema, na mûndû wa wonthe angîûka akûrie kana gûkû kûrî mûndû ûmwîre gûtirî.”

²¹ Nîûndû wa ûrîa Sisera aanogete, nîwamamire toro ndito. Nake Jaeli nîwocire nthugî ya îgema na nyondo na akîthiî kûrî Sisera acemete. Nîwaringîre nthugî îo gûtûrî gwa Sisera nginya îkîmunda nthî na Sisera agîkua.

²² Rîrîa Baraki aarûmîrîrîtie Sisera, Jaeli nîwathiîre kûmûtûnga na akîmwîra atîrî, “Ûka! Na nîngûkwonia mûndû ûrîa ûracaria.” Kwoguo nîwatonyire îgemarî rîa Jaeli na akîona Sisera amamîte nthî arî mûkuû, nayo nthugî ya îgema îmundîte gûtû gwake.

²³ Kwoguo mûthenya ûcio Ngai nîwavotithirie Aisiraeli kûvoota Jabini, mûthamaki wa Kanaani.

²⁴ Aisiraeli nîmaathiîre mbere kûvoota Jabini, mûthamaki wa Kanaani nginya rîrîa maamûcûkangirie viû.