Atir 3 - ÎVUKU RÎA ÛVORO MWARO

Ndûrîrî irîa ciatigirwe vûrûrirî wa Kanaani

¹ Ngai-Mûnene nîwatigire ndûrîrî imwe vûrûrirî wa Kanaani nîguo agerie Aisiraeli nacio arîa mataarî arûu mbaara irîa ciarî Kanaani.

² Eekire ûguo nîguo athomithie njiarwa cia Aisiraeli ûvoro wîgiî mbaara, na makîria njiarwa irîa itaarûîte mbererî.

³ Ndûrîrî irîa ciatigirwe vûrûrirî wa Kanaani ciarî anene atano a Afilisiti, Akanaani onthe, Asidoni na Ahivi arîa maatûûraga kîrîmarî Kîam Lebanoni kuuma kîrîma Kîam Baali Herimoni nginya mwanyarî wa Hamathi.

⁴ Ngai-Mûnene aatigîte andû a ndûrîrî nîguo agerie andû a Isiraeli amenye kana nwa mathîkîre maathani marîa aaveere methe mao ma tene kûvîtûkîrîra kûrî Musa.

⁵ Kwoguo Aisiraeli nîmaatûûranirie na Akanaani, Ahiti, Amori, Aperizi, Ahivi na Ajebusi.

⁶ Erîtu a ndûrîrî icio nîmaavikirue nî anake a Isiraeli, nao anake a ndûrîrî makîvikia erîtu a Isiraeli. Kwoguo Erîtu a Isiraeli nîmaagoocire ngai cia ndûrîrî icio.

Othinieli

⁷ Aisiraeli nîmeekire maûndû macûku mbere ya Ngai-Mûnene. Nîmaariganîrwe nîke na magîtungatîra ngai cia mîvuanano cia Baali na Asherothu.

⁸ Kwoguo Ngai-Mûnene nîwarakarirue nî Aisiraeli na agîtûma mûthamaki Kushani-rishathaimu wa Mesopotamia amavoote. Nao andû a Isiraeli nîmaamatungatîre îvinda rîa mîaka înana.

⁹ Nwatî rîrîa Aisiraeli maavoire Ngai-Mûnene, nîwamatûmîre mûndû wetagwa Othinieli nîguo amavonokie. Othinieli aarî mûvîcî wa Kenazi. Kenazi nîke warî mûrwang'ina ûrîa mûnini wa Kalebu.

¹⁰ Othinieli nîwecûrirwe nî Roho wa Ngai-Mûnene na agîtuîka mûtongoria wa andû a Isiraeli. Nîwathiîre mbaararî na Ngai-Mûnene akîmûvotithia kûvoota mûthamaki Kushani Rishathaimu wa Mesopotamia.

¹¹ Nîkwagîre thayû vûrûrirî îvinda rîa mîaka mîrongo îna, nake Othinieli agîcoka agîkua.

Ehudi

¹² Aisiraeli nîmeekire maûndû macûku mbere ya Ngai-Mûnene rîngî. Nîûndû wa ûguo, Ngai-Mûnene nîwatûmire Egiloni mûthamaki wa Moabu agîe vinya gûkîra Aisiraeli.

¹³ Egiloni nîwacokanîrîrie vamwe andû a Aamoni na Amaleki. Nîmaacokire makîthiî kûrûa na Aisiraeli, makîmavoota na magîcuunana Jeriko îtûûra rîa mîtî ya mîkîndû.

¹⁴ Andû a Isiraeli nîmaatungatîre Egiloni mûthamaki wa Moabu îvinda rîa mîaka îkûmi na înana.

¹⁵ Nwatî rîrîa Aisiraeli maarîrîre Ngai-Mûnene, Ngai-Mûnene nîwamatûmîre mûndû wetagwa Ehudi nîguo amavonokie. Ehudi aarî mûvîcî wa Gera, Mûbenjamini na aarî wa njara ya ûmotho. Andû a Isiraeli nîmaanenganîre iveo kûrî Ehudi nîguo avirîre Egiloni mûthamaki wa Moabu.

¹⁶ Ehudi nîweturithîtie rûviû rwa njûra rûarî rûûgî mîena yoîrî na rûarî na ûraca wa cendimita mîrongo îtano. Ethagîrwa arûovererete kîûnûrî gîake mwena wa ûrîo rungu rwa nguo ciake.

¹⁷ Nîwacokire akîvirîra mûthamaki Egiloni iveo. Egiloni aarî mûndû mûnoru mûno.

¹⁸ Rîrîa Ehudi aanenganîre iveo kûrî Egiloni, nîwerire arûme arîa maakuîte iveo icio macoke mûciî.

¹⁹ Nwatî rîrîa aakinyire kûrî mîvuanano ya mathiga îrîa yacîtwe na yarî vakuvî Giligali, nîwacokire kûrî Egiloni na akiuga atîrî, “Mwathi wakwa, nîrî na ndûmîrîri yaku ya nthitho.” Kwoguo mûthamaki nîwathanire ndungata ciake ciume nja, nacio cionthe nîciaumire nja.

²⁰ Ehudi nîwacokire akîthiî kûrî mûthamaki nyombarî ya îgûrû îrîa aarî arî wenga kûrîa aanogokaga vîndî ya ûrugarî. Nîwacokire akîmwîra atîrî, “Nîrî na ndûmîrîri yaku kuuma kûrî Ngai.” Nake mûthamaki nîwarûngamire.

²¹ Ehudi nîwacomorire rûviû na njara yake ya ûmotho kuuma varîa rwarî mwena wake wa ûrîo na akîmunda mûthamaki îvu naruo.

²² Rûviû nîrwatonyire îvurî ruonthe vamwe na mûtumbî waruo, na rûgîkunîkwa nî maguta. Nîrwaumîrîre mwena ûcio wîngî na Ehudi ndaarûcomora kuuma îvurî rîa mûthamaki Egiloni.

²³ Ehudi nîwacokire akiuma nja, agîtiga avinga mîrango ya nyomba îo Egiloni aarî.

²⁴ Rîrîa Ehudi aathiîre, ndungata cia Mûthamaki nîciacokire igîtonya na ikîona mîrango îrî mîvinge, nwatî cieciragia mûthamaki aarî ndaarî agîîtethia.

²⁵ Nîcietererire nginya ikînoga. Rîrîa mîrango yaregire kûvingûrûa, ndungata nîciocire cavi na ikîmîvingûra na ikîthîrîria mwathi wacio amamîte nthî arî mûkuû.

²⁶ Vîndî îo ndungata cia Egiloni cietererete, Ehudi aarî mûtoroku na akathiî Seira avîtûkîrîrîte vakuvî na mîvuanano ya mathiga îrîa yacîtwe.

²⁷ Rîrîa aakinyire kûu vûrûrirî ûrîa ûrî irîma wa Efiraimu, nîwavuvire karumbeta agîta Aisiraeli nîguo mathiî mbaararî. Nîwamatongoririe na makiuma vûrûrirî ûcio ûrî irîma.

²⁸ Ehudi nîwerire Aisiraeli atîrî, “Nûmîrîrani! Nîûndû Ngai-Mûnene nîamûvotithîtie kûvoota nthû cienyu, Amoabu.” Nao Aisiraeli nîmaamûrûmîrîre makîthiî na makîîgwatîra mariûko marîa Amoabu maaringagîra Jorodani na matietîkîria mûndû wanarî ûmwe aringe.

²⁹ Mûthenya ûcio Aisiraeli nîmaûragire athigari ta ngiri îkûmi a Moabu arîa maarî njamba na gûtirî wanarî ûmwe wavonokire.

³⁰ Mûthenya ûcio Aisiraeli nîmaavootire Amoabu na nîkwagîre thayû vûrûrirî îvinda rîa mîaka mîrongo înana.

Shamigari

³¹ Vuva wa Ehudi, mûtongoria ûcio wîngî eetagwa Shamigari mûvîcî wa Anatho. Shamigari aavonokirie Aisiraeli rîrîa aaûragire Afilisiti magana matandatû na mûragi wa kûrîthia ng'ombe.