Atir 21 - ÎVUKU RÎA ÛVORO MWARO

Aka a mûvîrîga wa Benjamini

¹ Andû a Isiraeli nîmeevîtîte marî Mizipa makauga atî gûtirî mûndû wanarî ûmwe wa cietû ûgeetîkîria mwarî agûrwe nî mûndû wa mûvîrîga wa Benjamini.

² Kwoguo andû a Isiraeli nîmaathiîre Betheli na magîkara mbere ya Ngai nginya kîvwaî. Nîmaarîrire maugîrîrîtie marî na kîeva kîngî mûno makiugaga atîrî,

³ “Ngai-Mûnene, Ngai wa Isiraeli, ûndû ûyû ûrekîka Isiraeli nîkî, atî mûvîrîga wa Benjamini ûthiîte kûthira viû?”

⁴ Kîraûko tene mûthenya ûcio wîngî, andû nîmaaramûkire na magîtuma metha ya kîgongoona kuo na makîruta matega ma kûvîvua na matega ma thayû.

⁵ Nîmaacokire makîûrania atîrî, “Gatagatîrî ka mîvîrîga yonthe ya Isiraeli nî mûvîrîga ûrîkû ûtaathiî mbere ya Ngai-Mûnene kûu Mizipa?” (Nîmeevîtîte makauga atî mûndû ûrîa ûtakaathiî mbere ya Ngai-Mûnene kûu Mizipa nîkwa akaaûragwa.)

⁶ Andû a Isiraeli nîmeguîrîre andû ao ntha a mûvîrîga wa Benjamini na makiuga atîrî, “Ûmûnthî Isiraeli nîaûrîre nî mûvîrîga ûmwe wao.

⁷ Tûgeka atîa nîguo tûve arûme a mûvîrîga wa Benjamini arîa matigarîte aka, nîûndû nîtwevîtire mbere ya Ngai-Mûnene atî tûtikaavecana erîtu etû mavikue nî andû a mûvîrîga wa Benjamini?”

⁸ Nîmaacokire makîûria atîrî, “Gatagatîrî ka mîvîrîga ya Isiraeli, nî mûvîrîga ûrîkû ûtaathiî mbere ya Ngai-Mûnene kûu Mizipa?” Nîmaamenyire atî gûtirî mûndû wanarî ûmwe kuuma Jabeshi-gileadi warî mûcemaniorî ûcio.

⁹ Rîrîa andû maatarirwe, gûtirî mûndû wa kuuma Jabeshi-gileadi warî vo.

¹⁰ Kwoguo gîkundi kîu Kîam andû nîgîatûmire arûme ngiri îkûmi na igîrî (12,000) arîa maarî njamba na makîmatha atîrî, “Thiîni Jabeshi-gileadi na mûrage andû onthe a kuo wa vamwe na aka na ciana.

¹¹ Mûrage arûme onthe na aka onthe arîa matarî nthingi.”

¹² Gatagatîrî ka andû a Jabeshi-gileadi nîmeethîrîrie erîtu magana mana (400) maarî nthingi. Kwoguo nîmaamavirire Shilo kûrîa maambîte magema vûrûrirî wa Kanaani.

¹³ Gîkundi kîonthe Kîam andû nîgîatûmire anjaama mathiî kûrî Aabenjamini arîa maarî îthigarî rîa Rimoni mamavirîre ndûmîrîri ya thayû.

¹⁴ Aabenjamini nîmaacokanîrîre nao kavinda kau, nao Aisiraeli acio engî nîmaamavere arîa maaumîte Jabeshi-gileadi arîa mataaûragwa, nwatî matiamegana.

¹⁵ Aisiraeli nîmeguîrîre Aabenjamini ntha nîûndû Ngai-Mûnene nîwatûmîte kûgîe na nyamûkano gatagatî ka Isiraeli.

¹⁶ Nao atongoria a gîkundi kîu nîmaaugire atîrî, “Nîtwîka atîa nîguo tûve arûme acio matigarîte aka, nîûndû aka onthe a Benjamini nîmaaûragirwe?

¹⁷ Aisiraeli matiagîrîrwe nî gûta mûvîrîga wanarî ûmwe. Nwanginya tûmenye ûrîa tûgwîka tûtigate mûvîrîga wa Benjamini,

¹⁸ nwatî tûtingîmava erîtu etû nîguo mamavikie nîûndû nîtwevîtire, atî mûndû wa cietû ûrîa ûkaavecana mwarî kûrî Mûbenjamini nîguo amûvikie nîakaanyitwa nî kîrumi.”

¹⁹ Kwoguo nîmaaririkanire atî kîrugo Kîam Ngai-Mûnene kîrîa kîthondekagwa wa mwaka wa mwaka kûu Shilo kîrî vakuvî. Shilo îrî mwena wa rûgûrû wa Betheli, na mwena wa îveti wa Lebona. Îrî mwena wa îrathîro wa njîra îrîa yumîte Betheli îthiîte Shekemu.

²⁰ Atongoria acio a gîkundi nîmeerire Aabenjamini atîrî, “Thiîni mûkethithe mîgûndarî ya mîthavibu,

²¹ na mwîkare mûroretie. Rîrîa erîtu a kûu Shilo makaumîra kwîinia vîndî ya kîrugo, mûkaumîra mûgûndarî wa mîthavibu na wa mûndû akenyitîra mûka vo na vinya mûkînathiî nao vûrûrirî wa Benjamini.

²² Methe mao kana aa mûrwang'ina mangîûka kûmûnegenera, mûkaameera, ‘Twamûthaitha mûtwîtîkîrie twîkare nao nîûndû tûtiamocire nîguo matuîke aka etû tûrî mbaararî. Wana tîmue mwatûveere o, kwoguo mûtirî na mavîtia ma kuna kîîranîro kîenyu.’ ”

²³ Andû a Benjamini nîmeekire guo; wa ûmwe wa ciao nîwethuurîre mûka kuuma kûrî aka arîa meeinagia kûu Shilo na makîthiî nao. Nîmaacokire vûrûrirî wao, magîtuma matûûra mao rîngî na magîtûûra kuo.

²⁴ Vîndî wa îo, Aisiraeli nîmaanyaganirie na wa mûndû nîwacokire mûvîrîgarî wake, na kûrî andû a mûciî wake. Maaumire vau na makîthiî wa mûndû kûrî îgai rîake.

²⁵ Vîndî îo Isiraeli gûtiarî na mûthamaki. Wa mûndû eekaga wa ûrîa oonaga kwagîrîrîte.